எஸ்.ஏ.விலும் கலக்கலாம் வாங்க!

சமச்சீர் கல்வி மற்றும் சி.சி.இ அடிப்படையிலான பாடத் திட்டத்தில் 60 மதிப்பெண்கள் பெறுவதற்கு வழிவகுக்கும் தொகுத்தறி மதிப்பீடு எனப்படும் Summative Assessment-க்குத் தயாராகி வருகிறீர்கள்தானே?

தேர்வுகளை எளிதாக எதிர்கொள்ள நினைவாற்றல் பயிற்சியாளர் ஜான் லூயிஸ் உங்களுக்கு வழங்கும் டிப்ஸ்...

வீட்டில் படிக்க உட்கார்ந்ததும் படிக்கப்போகும் பாடம் பற்றி வகுப்பில் ஆசிரியர் என்ன நடத்தினார் என்பதை நினைத்துப்பாருங்கள்.

படிக்கும் இடம் மனதுக்குப் பிடித்ததாகவும், போதிய வெளிச்சமும் காற்றோட்டமும் உடையதாகவும் இருக்க வேண்டும்.

தேவையானபோது குடிக்க உங்கள் அருகில் தண்ணீர் வைத்துக் கொள்ளுங்கள்.

படிக்க மனதுக்குப் பிடித்த நேரத்தைத் தேர்ந்தெடுத்துக்கொள்ளுங்கள்.

அதிகபட்சம் சேர்ந்தாற்போல 40 நிமிடங்கள் படிப்பது நல்லது. பின்னர், ஒரு நிமிடம் இடைவெளி அவசியம். அப்போது, உங்கள் பார்வையைப் புத்தகத்தில் இருந்து நகர்த்தி தோட்டம், இயற்கைக் காட்சிகளைப் பாருங்கள். பிறகு ஓரிரு நிமிடங்கள் இதுவரை படித்ததை நினைவு கூருங்கள்.

படிப்புக்கு இடையே ஓய்வு எடுங்கள். அம்மாவுக்கு உதவுதல், கடைக்குப்போய் வருவது போன்ற சிறு சிறு வேலைகளுக்குப் பிறகு, மீண்டும் படிக்க அமரலாம்.

இந்த நேரத் திட்டமிடலை அப்படியே பின்பற்ற வேண்டிய கட்டாயம் இல்லை. படிக்கும் வகுப்பு, படிக்க வேண்டிய பாடங்கள், தேர்வு நெருக்கடி இவற்றைப் பொறுத்து, நேர அவகாசத்தில் நீங்களே மாற்றம் செய்துகொள்ளலாம்.

படிப்புக்குப் பின், ரிவிஷன் முக்கியம். எனவே, தினமும் படிப்போடு ரிவிஷனுக்கும் கொஞ்சமாய் நேரம் ஒதுக்கிக்கொள்ளுங்கள். ஒரு பாடத்துக்கு ஒரு நாளில் 10 நிமிடம் ஒதுக்கினாலே போதும். வார இறுதியில் ரிவிஷனுக்கு எனக் கூடுதல் நேரம் ஒதுக்கலாம். அதேபோல் கடினமாக நீங்கள் கருதும் பாடத்துக்குக் கூடுதல் நேரம் ஒதுக்குங்கள்.

முதல் முறை ஒரு பாடத்தைப் படிக்கும்போது, பென்சிலால் முக்கியமான வார்த்தைகளை அடிக்கோடிட்டுச் செல்ல வேண்டும். இரண்டாவது வாசிப்பில், இதுவரை அடிக்கோடிட்ட முக்கிய வார்த்தைகளைத் தொடர்புபடுத்திப் படிக்கலாம். தற்போதைய தொடர் மற்றும் முழுமையான மதிப்பிடலில் அறிதல், புரிதல், பொருள் அறிதல், பயன்படுத்துதல், பகுத்தாய்தல், மதிப்பிடுதல், படைப்பாற்றல் போன்ற அடைவுகள் கணக்கில் எடுத்துக்கொள்ளப்படுவதால், பாடத்தில் எங்கே இருந்தும் கேள்விகள் கேட்கப்படலாம். எனவே, அதிக மார்க்குகளை அள்ள இந்த முழுமையான வாசிப்பு கைகொடுக்கும்.

புரியாமல் மனப்பாடம் செய்ய வேண்டாம். தற்போதைய மதிப்பிடலில் சுயமாய் யோசித்து எழுதும் கருத்துகளுக்கு வரவேற்பு உண்டு. பாடத்தைப் புரிந்து படிப்பதே நல்லது. கடினமான பெயர்களை நினைவில்வைக்க, காட்சிப்படுத்துதல் முறை மிகவும் கைகொடுக்கும்.

உதாரணத்துக்கு, எத்தியோப்பியா என்பதை ஞாபகத்தில் வைக்க, எத்தி ஒதப்பியா என்று ஜாலியாகக் கற்பனை செய்துபார்க்கலாம். என்சைக்ளோபீடியா என்பதை நினைவில் கொள்ள, என் சைக்கிளை பிடிய்யா என்ற ஜோக்கைப் பயன்படுத்தலாம். இந்த வகையில் கடினமான தாவரவியல், விலங்கினப் பெயர்களை மனதில் இருத்த முடியும்.

போதுமான தூக்கம், உணவு, லேசான உடற்பயிற்சி இவற்றைத் தவறவிடக் கூடாது. வீட்டில் படிப்பது, ரிவிஷன் செய்வது ஆகியவற்றைச் சீர்தூக்கிப்பார்க்க, வகுப்புத் தேர்வுகளை நல்ல ஒரு வாய்ப்பாகப் பயன்படுத்திக்கொள்ளலாம். எல்லாத் தேர்வுகளையும் ஒரு சவாலாக எதிர்கொண்டால், இறுதியில் நீங்கள் இறுதித் தேர்வில் கிரேடுகளை அள்ளப்போவது உறுதி.

- எஸ்.ஜானவிகா
சுட்டி விகடன்