சர்வதேச ஒலிம்பிக் கமிட்டி-இந்திய ஒலிம்பிக் சங்கம் இடையிலான பிரச்சினைக்கு விரைவில் தீர்வு: அரசு நம்பிக்கை

**Muthumohamed** · **Muthumohamed** Thu Dec 20, 2012 12:17 am

புதுடெல்லி, டிச. 19-

இந்திய ஒலிம்பிக் சங்கம், சர்வதேச ஒலிம்பிக் கமிட்டி இடையிலான பிரச்சினை விரைவில் தீர்க்கப்படும் என்று மத்திய அரசு நம்பிக்கை தெரிவித்துள்ளது.

இந்திய ஒலிம்பிக் சங்கத்தின் அங்கீகாரத்தை சர்வதேச ஒலிம்பிக் கமிட்டி தற்காலிகமாக நீக்கியது. இதுபற்றி டெல்லி மேல்சபையில் இன்று பா.ஜனதா உறுப்பினர் ஜெகத் பிரகாஷ் நட்டா, ஐக்கிய ஜனதா தளம் உறுப்பினர் என்.கே.சிங், திரிணாமுல் காங்கிரஸ் உறுப்பினர் விவேக் குப்தா ஆகியோர் கவன ஈர்ப்பு தீர்மானம் கொண்டு வந்தனர்.

இதற்கு பதில் அளித்து பேசிய இளைஞர் நலம் மற்றும் விளையாட்டுத்துறை இணை மந்திரி ஜிதேந்திர சிங், ஒலிம்பிக் சங்க பிரச்சினையைத் தீர்க்க அரசு தேவையான நடவடிக்கை எடுத்து வருவதாகவும், விளையாட்டு வீரர்கள் பாதிக்கப்பட மாட்டார்கள் என்றும் தெரிவித்தார்.

“ஒலிம்பிக் சங்க பிரச்சினை குறித்து சர்வதேச கமிட்டியிடம் நாங்கள் பேசியிருக்கிறோம். அப்போது, இந்திய வீரர்கள் பாதிக்கப்பட மாட்டார்கள் என்று அவர்கள் உறுதி அளித்திருக்கிறார்கள். பிரச்சினையை தீர்ப்பதற்காக அரசு 24 மணி நேரமும் செயல்பட்டு வருகிறது.

இந்திய ஒலிம்பிக் சங்கத்தை சர்வதேச ஒலிம்பிக் கமிட்டி சஸ்பெண்ட் செய்திருப்பது மிகவும் துரதிர்ஷ்டவசமானது. இதனால் சர்வதேச போட்டியில் இந்திய வீரர்கள் பங்கேற்பதில் உடனடியாக பாதிப்பு ஏற்படாது. எனவே சரியான நேரத்தில் பிரச்சினை தீர்க்கப்படும் என்று அரசு நம்புகிறது” என்று ஜிதேந்திர சிங் தெரிவித்தார்.

மாலை மலர்