வெற்றி கண்ட சத்யஜித் ரே!

உலகப் புகழ்பெற்ற திரைப்பட இயக்குநர் சத்யஜித்ரே. அவர் உருவாக்கிய முதல் திரைப்படம் "பதேர் பாஞ்சாலி'. அப்படத்தை தனது லட்சியப்படி எடுக்க அவர் விரும்பினார். வணிக நோக்கம் இல்லாத கலைப்படைப்பாக அது இருக்க வேண்டும் என்று உறுதி கொண்டார்.
திரைக்கதையை உருவாக்கிய பின் அதனைத் தயாரிக்க நிதியுதவி கோரிப் பலரையும் நாடினார். சிலர் கதை சரியில்லை என்று கூறிவிட்டனர். மற்றும் சிலர் நல்ல கதைதான் அதனைப் புகழ்பெற்ற இயக்குநர் ஒருவர் இயக்குவதாக இருந்தால் நிதியுதவி செய்வதாகக் கூறிவிட்டனர்.
தன் விருப்பப்படி திரைப்படம் அமைய வேண்டுமானால் தானே இயக்க வேண்டும் என்று முடிவு செய்தார் ரே. தன் மனைவியின் நகைகளை விற்றார். அதில் கிடைத்த சொற்பத் தொகையைக் கொண்டு படப்பிடிப்பைத் தொடங்கினார். ஐந்தாயிரம் அடி வரைதான் படத்தை எடுக்க முடிந்தது.
எடுத்தவரை படத்தைப் போட்டுக் காட்டிப் பலரிடமும் நிதியுதவி கோரினார். யாரும் உதவ முன்வரவில்லை. அப்போது இங்கிலாந்திலிருந்து பிரபலமான திரைப்பட விமர்சகர் ஒருவர் இந்தியாவிற்கு வந்தார். அவர் ஏற்கெனவே ரேக்கு நண்பர். அவருக்கு படம் எடுத்த வரை போட்டுக்காட்டினார். படம் கலை அழகோடு இருப்பதாகவும், இந்தியத் திரையுலகில் ஒரு மேதை உருவாகிவிட்டதாகவும் கருதிய அந்த விமர்சகர், அச்சமயம் வங்காள முதலமைச்சராக இருந்த பி.சி.ராய் அவர்களிடம் விபரத்தை விளக்கமாகக் கூறி, அரசு படத்தை முடிக்க நிதியுதவி அளிக்க வேண்டும் என்று வேண்டிக் கொண்டார்.
முதலமைச்சர் பி.சி.ராய் அரசாங்க அதிகாரிகள் சிலரை அழைத்து அந்தப் படத்தைப் பார்த்து கருத்துக் கூறுமாறு ஆணையிட்டார். அவர்கள் படத்தைப் பார்த்துவிட்டு பிரயோஜனம் இல்லை என்று கூறிவிட்டனர். அதனால் எதுவும் உதவி செய்ய இயலாது என்று முதலமைச்சர் கூறிவிட்டார்.
இங்கிலாந்து விமர்சகர் அத்துடன் பிரச்னையை விடவில்லை. தில்லிக்குச் சென்று அப்போதைய பிரதமர் நேருவைச் சந்தித்து அவரிடம் நிலைமையை விளக்கினார். அவரும் ரேக்கு உதவி அளிக்குமாறு வங்காள முதல்வர் பி.சி.ராயைக் கேட்டுக் கொண்டார்.
வங்காள மாநில அரசு ஒரு நிபந்தனையுடன் நிதியுதவி அளிக்க முன்வந்தது. படத்தின் முழு உரிமையும் அரசிடம் இருக்கும் என்றும், ரே தனது விருப்பப்படி படம் எடுக்கலாம் என்றும் கூறியது.
அப்படி எடுக்கப்பட்ட படம் பதேர் பாஞ்சாலி சர்வதேச திரைப்பட விழாவிற்கு அனுப்பிவைக்கப்பட்டது. அது மிகச்சிறந்த படம் என்று தேர்வு செய்யப்பட்டு முதல் பரிசையும் பெற்றது.

செவல்குளம் ஆச்சா(தினமணி)

"பதேர் பாஞ்சாலி' சிறப்பான படம் என்று கேள்விப்பட்டு இருக்கேன் ..வாய்ப்பு கிடைத்தால் பார்க்கவேண்டும் .

லிங்க் கிடைக்குமா

கிடைத்தால் தருகிறேன் நண்பரே

நானும் தேடி பார்க்கிறேன்..நண்பரே!!