வச்ச குறி தப்பாது!

சாதாரண ஏழை கூலித் தொழிலாளியின் மகளான சுபாலெட்சுமி வில்வித்தை மற்றும் கராத்தே போட்டிகளில் மாவட்ட அளவில், மாநில அளவிலும் தேசிய அளவிலும் வெற்றி பெற்று வாங்கி குவித்துள்ள பதக்கங்கள் எண்ணிலடங்கா. சுபா லட்சுமிக்கு வயது 13. நெல்லை மாநகராட்சி பள்ளியில் 8-ஆம் வகுப்பு மாணவி.
தமிழ்நாடு வில்வித்தைக் கழகம் நவம்பர் 17, 18 தேதிகளில் சென்னையில் நடத்திய மாநில அளவிலான வில்வித்தை போட்டியில் மினி ஜூனியர் பிரிவில் 2-ம் இடம் பெற்றுள்ளார். முதல் பரிசை வெல்ல முடியவில்லையே என்ற வருத்தம் இருந்தாலும், தேசிய அளவிலான போட்டிக்குத் தகுதி பெற்றிருப்பது அவருக்குள் புதிய உற்சாகத்தை ஏற்படுத்தியிருக்கிறது.
தேசிய அளவிலான வில்வித்தை போட்டி வரும் டிசம்பர் 26-ம் தேதி முதல் சென்னையில் நடைபெறுகிறது. இந்தப் போட்டியில் எப்படியும் முதல் பரிசை வென்றே தீர வேண்டும் என்ற குறிக்கோளுடன் பாளையங்கோட்டை பெருமாள்புரத்தில் மாஸ்டர் ஜே.எம்.விமல்குமாரிடம் தினமும் 3 மணி நேரம் பயிற்சி பெற்று வருகிறார். இனி அவரின் பேச்சிலிருந்து...
""நான் திருநெல்வேலி மாநகராட்சி கல்லணை பெண்கள் மேல்நிலைப் பள்ளியில் படித்து வருகிறேன். தந்தை வடிவேல் கூலித் தொழிலாளி. தாய் ஈஸ்வரி இல்லத்தரசி. எனக்கு இரண்டு தங்கைகள் உள்ளனர்.
கராத்தே படிக்க வேண்டும் என்பது எனது நீண்ட நாள் ஆசை. எனக்கு 9 வயது இருக்கும்போது எனது தந்தை என்னை கராத்தே பயிற்சியில் சேர்த்து விட்டார். வில்வித்தை மீதும் எனக்கு ஆர்வம் ஏற்பட்டது. இதையடுத்து வில்வித்தை பயிற்சியைத் தொடங்கினேன். கராத்தே பயிற்சியை அளித்த மாஸ்டர் விமல்குமாரே வில்வித்தை நுணுக்கங்களையும் எனக்குக் கற்றுத் தந்தார். ஒரே ஆண்டில் வில்வித்தையில் தேர்ச்சி பெற்று போட்டிகளில் பங்கேற்கத்
தொடங்கினேன்.
வில்வித்தைப் போட்டியில் மாவட்ட அளவில் இரு முறை சாம்பியன் பட்டம் வென்றுள்ளேன். மேலும் பலமுறை 2-வது, 3-வது பரிசுகளை வென்றுள்ளேன். 2011-ம் ஆண்டு நவம்பரில் தமிழ்நாடு ஒலிம்பிக் சங்கம் நடத்திய மாநில அளவிலான போட்டியில் 3-ம் இடம் கிடைத்தது.
கடந்த ஜனவரி மாதம் மும்பையில் மத்திய விளையாட்டு அமைச்சகம் நடத்திய தேசிய அளவிலான வில்வித்தைப் போட்டியில் கலந்து கொண்டேன். ஆனால், பரிசு கிடைக்கவில்லை. நவம்பர் 17, 18 தேதிகளில் சென்னையில் நடைபெற்ற மாநில அளவிலான போட்டியில் 2-ம் இடம் பெற்றேன். இந்த வெற்றியின் மூலம் டிசம்பர் 26 முதல் சென்னையில் நடைபெறும் தேசிய அளவிலான போட்டிக்குத் தகுதி பெற்றிருக்கிறேன். அதில் எப்படியும் முதலிடம் பெறுவேன் என்ற நம்பிக்கை எனக்கு உள்ளது. அதற்காக தீவிர பயிற்சியில் ஈடுபட்டு வருகிறேன்.
கடந்த ஜூலை மாதம் கொல்கத்தாவில் நடைபெற்ற தேசிய அளவிலான போட்டியில் பங்கேற்கத் தகுதி பெற்றும், எனது குடும்ப வறுமை காரணமாக போட்டியில் கலந்து கொள்ள முடியவில்லை. இதனால், ஒரு மாதம் வீட்டில் அழுது கொண்டே இருந்தேன்.
இந்திய வில்வித்தை வீராங்கனை தீபிகா குமாரியைப் போன்று, இந்தியாவுக்காக வில்வித்தைப் போட்டியில் சாதிக்க வேண்டும் என்ற ஆசை என்னுள் ஏற்பட்டுள்ளது. ஆசிய விளையாட்டு, காமன்வெல்த் போட்டி, ஒலிம்பிக் போட்டி ஆகியவற்றில் இந்தியாவுக்காக விளையாட வேண்டும் என்பதுதான் எனது கனவு.
ஆனால், குடும்ப வறுமைதான் எனக்குப் பெரிதும் தடையாக உள்ளது. எனது தந்தையின் வருமானத்தில்தான் எங்கள் குடும்பமே வாழ்கிறது. எனது குடும்ப வறுமையைக் கருதி மாஸ்டர் என்னிடம் பயிற்சிக் கட்டணம் எதுவும் வாங்குவதில்லை. எனக்கு இலவசமாகவே கற்றுத் தருகிறார்.
தமிழக விளையாட்டுத் துறை அமைச்சர் என்.ஆர். சிவபதியை ஒரு முறை பெற்றோருடன் சென்று பார்த்தேன். அப்போது வில்வித்தைப் போட்டிக்குத் தேவையான உபகரணங்கள், சீருடைகளை ரூ.25 ஆயிரத்துக்கு வாங்கித் தந்தார். அவற்றை வைத்துக் கொண்டுதான் தற்போது போட்டிகளில் பங்கேற்று வருகிறேன்.
போட்டிகளில் பங்கேற்கச் செல்ல பஸ், ரயில்களில் கட்டண சலுகை, உதவித் தொகை போன்ற உதவிகளை அரசு செய்தால் உதவியாக இருக்கும். மேலும், எனக்கு "ஸ்பான்சர்ஷிப்' அளிக்க யாராவது முன்வந்தால் வில்வித்தைப் போட்டியில் என்னால் மேலும் பல சாதனைகளை படைக்க முடியும்'' என்கிறார் சுபாலெட்சுமி.

- ரெ. ஜாய்சன்
தினமணி