ஆலு ஸ்டஃப்ட் பரோட்டா

**Muthumohamed** · **Muthumohamed** Thu Dec 13, 2012 2:47 pm

தேவையானவை:
மேல் மாவுக்கு:
மைதா- 1 கப்
கோதுமை- 1/2 கப்
நெய்- 4 தேக்கரண்டி
எண்ணெய்- 1 மேசைக்கரண்டி
ஸ்டஃபிங் செய்ய:
வேக வைத்த உருளைக்கிழங்கு- 3
மிளகாய்தூள், தனியாத்தூள், சீரகம்- 1/2 மேசைக்கரண்டி
மஞ்சள்தூள்- சிறிதளவு
கரம் மசாலாத்தூள்- 1 தேக்கரண்டி
நெய்- 1 மேசைக்கரண்டி
கொத்துமல்லித்தழை- 1 கைப்பிடி
உப்பு- தேவையான அளவு
செய்முறை:
மேல்மாவு செய்ய தேவையான பொருள்களை தண்ணீர் சேர்த்து மிருதுவாகப் பிசைந்து ஒரு மணி நேரம் ஊற வைக்கவும். ஸ்டஃபிங் செய்யக் கொடுத்துள்ள பொருள்களை ஒன்றாகச் சேர்த்துப் பிசையவும். ஊறிய மாவிலிருந்து ஒரு பிடி எடுத்து வடை போல தட்டி, நடுவில் பிசைந்து வைத்திருக்கும் உருளைக்கிழங்கு கலவையை வைத்து உருட்டி சப்பாத்தி போல தேய்க்கவும். இதை தவாவில் நெய் ஊற்றி இருபுறமும் திருப்பிப் போட்டு வேகவிட்டு எடுக்கவும்.

தினமணி

**Muthumohamed** · **Muthumohamed** Thu Dec 13, 2012 2:48 pm

சாபுதானா கிச்சடி

தேவையானவை:
சாபுதானா (ஜவ்வரிசி)- 2 கப்
பச்சைமிளகாய்- 2
வேர்க்கடலை- 1 கப்
சீரகம்- 1 தேக்கரண்டி
உருளைக்கிழங்கு-1
எண்ணெய்- 2 தேக்கரண்டி
கொத்தமல்லித்தழை- சிறிதளவு
உப்பு- தேவையான அளவு
செய்முறை:
ஜவ்வரிசியைக் களைந்து சிறிது தண்ணீர் ஊற்றி முதல் நாள் இரவே ஊற வைக்கவும். மறுநாள் காலை இந்த ஜவ்வரிசியை வடிதட்டில் கொட்டி நீரை வடிக்கவும். வேர்க்கடலையில் ஒரு மேசைக்கரண்டி தனியாக எடுத்து வைத்துவிட்டு மீதியை வெறும் வாணலியில் வறுத்து தோல் நீக்கிப் பொடிக்கவும். வாணலியில் எண்ணெய் ஊற்றி காய்ந்ததும் பச்சை மிளகாயை இரண்டாக நறுக்கிச் சேர்க்கவும். தனியாக எடுத்து வைத்திருக்கும் வேர்க்கடலையைச் சேர்த்து வறுக்கவும். உருளைக்கிழங்கை வேக வைத்து தோல் உரித்து சிறுசிறு துண்டுகளாக நறுக்கவும். வேர்க்கடலை நன்றாக வறுபட்டதும் வடிகட்டி ஜவ்வரிசியைச் சேர்த்துக் கிளறவும். பிறகு சிறிதளவு உப்பு சேர்த்து நறுக்கிய உருளைக் கிழங்கு துண்டுகளைச் சேர்த்து நன்றாகக் கிளறவும். கலவை நன்றாகச் சேர்ந்து வந்ததும் பொடித்த வேர்க்கடலை மற்றும் சீரகம் சேர்த்துக் கிளறி இறக்கவும். கொத்தமல்லி தூவி பரிமாறவும்.காரமும், எண்ணெயும் குறைவாக இருக்கும்; நீண்ட நேரம் பசி தாங்கும்.

- போளூர் ஆர். வசந்தி(தினமணி)