அதிசயம் சிங்கார வேலனுக்கு வியர்க்கிறது!

நெருப்புக்குப் பக்கத்தில் யார் போனாலும் வியர்க்கும். ஆனால் நெருப்புக்கு வியர்க்குமா?
இது என்ன அபத்தமான கேள்வி என்று உங்களுக்குத் தோன்றலாம். ஆனால் நீங்கள் கந்தசஷ்டித் திருநாளில் சூரசம்ஹாரம் நடக்கும் சமயத்தில் சிக்கல் திருத்தலத்தில் இருந்தால், இந்தக் கேள்விக்கு “டக்’கென்று பதில் சொல்வீர்கள்.... அக்னிக்கு வியர்க்கும் என்று....
அதுவும் கொஞ்சநஞ்சமில்லை, ஏதோ வியர்வைக் குளத்திலேயே மூழ்கி எழுந்ததுபோல், துடைக்கத் துடைக்க வியர்க்கும். பெரும் பக்தர் கூட்டம் அதைப் பார்த்துப் பார்த்து வியக்கும்.
என்ன ஆச்சரியமாக இருக்கிறதா? சிக்கல் திருத்தலத்தில் வியர்வையில் குளிக்கும் அந்த நெருப்புக்குப் பெயர் சிங்காரவேலன்.
முக்கண்ணனின் மூன்றாவது கண்ணான அக்னியின் வடிவமான ஆறுமுகனுக்கு, அங்கே வியர்ப்பது ஏன்?
அதற்குக் காரணம், அவன் தாய் வேல்நெடுங்கண்ணி. அது எப்படி என்று தெரியாதவர்களுக்காக சுருக்கமாக கதை.
முருகனின் அவதார நோக்கமான சூரசம்ஹாரம் நிகழவேண்டும் என்பதற்காக, ஈசன், தன் சக்தியின் அம்சமான ஓர் ஆயுதத்தை, ஆறுமுகனுக்கு அளிக்க விரும்பினார்.
அப்பா தன் குழந்தைகளுக்கு எதையாவது தர விரும்பினால், அதை அம்மாவிடம் தந்து, குழந்தையிடம் தரச் சொல்வார் அல்லவா? பரமனும் அதேமாதிரி அந்த ஆயுதத்தை வேல்நெடுங்கண்ணியான பார்வதியிடம் கொடுத்தார்.
அசுரனை அழிக்கப் புறப்படும்போது அம்மாவிடம் ஆசி வாங்க வந்தார், சிங்காரவேலன். சியோடு அந்த ஆயுதத்தினையும் அளித்தாள் தாய். வேலனுக்கு அளிக்கப்பட்டதாலும் அம்பிகை வேல்நெடுங்கண்ணி தந்ததாலும் அந்த ஆயுதத்தின் பெயர் வேல் என்று ஆனது.
ஆண்டுதோறும் அந்த நிகழ்ச்சி சிக்கல் திருத்தலத்தில் நடக்கும்போதுதான் வேலனுக்கு வியர்க்கும் அதிசயம் நடக்கிறது. அன்னை வேல்நெடுங்கண்ணியிடம் இருந்து வேலினை வாங்கும் வேலனுக்கு முத்து முத்தாக வியர்க்கிறது.
உஷ்ணமான தீயின் உருவமான உமாசுதனின் கரத்தில் அன்னை அளித்த வேல் வந்ததுமே, சூரனை அழிக்க உக்ரத்துடன் புறப்படுகிறான் வேலன்.
உக்ரமும் உஷ்ணமும் இணைவதால் அங்கே வேலனுக்கு வியர்க்கிறது. அர்ச்சகர் பட்டுத் துணியால் துடைக்கத் துடைக்க, வியர்வை வெள்ளமாகப் பெருகி வழிகிறது. இன்று நேற்றல்ல ஆண்டாண்டு காலமாக இந்த அற்புதம் நடக்கிறது. வியர்வை சிந்தும் வேலனைக் கண்டு அவன் அருள்மழையில் நனைய பக்தர் கூட்டமும் நிறைகிறது.
உங்களுக்கு நேரமும் வாய்ப்பும் கிடைத்தால் ஒரு வருடம் கந்தசஷ்டி திருவிழாவுக்குச் சிக்கல் திருத்தலம் சென்று சிங்காரவேலனை தரிசியுங்கள். வியர்வையில் குளிக்கும் அவன் உங்களை ஆனந்த மழையில் நனைய வைப்பான்.
ஒரு முக்கியமான விஷயம்... இங்கே மூலவரேதான் உற்சவராகவும் உலாவருவார். அதனால் உலாவரும் காலத்தில் சிங்கார வேலனை தரிசிப்பது இரட்டிப்பு நன்மை தரும்!
என்ன, சிங்காரவேலனை தரிசித்து வரத் தயாராயிட்டீங்களா?

இதை நானும் என் உறவினர்  சொல்லி கேள்விப்பட்டிருக்கேன் (மாமா பார்த்திருக்கார் ) ஆனால் நான்  பார்த்தது இல்லை, பார்க்க ஆவலாக இருக்கு