அப்துல் கலாமை நெகிழ வைத்த பார்வையற்ற மாணவர்

by GOPIBRTE Sat 8 Dec 2012 - 12:30

அப்துல் கலாமை நெகிழ வைத்த பார்வையற்ற மாணவர்
குடியரசுத் தலைவராக இருந்தபோது பார்வையற்ற மாணவர் ஒருவர் தன்னை மிகவும் நெகிழவைத்துவிட்டதாக முன்னாள் குடியரசுத் தலைவர் அப்துல் கலாம் தெரிவித்தார்.

சென்னை சாந்தோமில் உள்ள புனித ரபேல்ஸ் பெண்கள் மேல்நிலைப் பள்ளியின் நூற்றாண்டு விழாவில் வியாழக்கிழமை பேசும்போது அவர் இதைத் தெரிவித்தார்.

...
ஒவ்வொரு மாணவருக்கும் மிகப்பெரிய லட்சியம் வேண்டும் என்பதை தொடர்ந்து வலியுறுத்தி வருகிறேன். குடியரசுத் தலைவராக இருந்தபோது குடியரசுத் தலைவர் மாளிகையில் தினமும் 200 மாணவர்களைச் சந்திப்பதை வாடிக்கையாகக் கொண்டிருந்தேன்.

அப்படியொரு நாள், ஆந்திரப் பிரதேசத்தின் மலைப் பகுதிகளிலிருந்து மாணவர்கள் என்னைச் சந்திக்க வந்தனர். அவர்களிடம் என்னவாக விரும்புகிறீர்கள் என்று கேட்டேன். பல மாணவர்கள் மருத்துவர், பொறியாளர், விஞ்ஞானி, ஐ.ஏ.எஸ்., ஐ.பி.எஸ்., ஆசிரியர் என பல்வேறு லட்சியங்களைக் கூறினார்.

கடைசியாக அங்கிருந்த பார்வையற்ற மாணவர் ஒருவர், தான் இந்தியாவின் பார்வையற்ற முதல் குடியரசுத் தலைவராக விரும்புவதாகக் கூறினார். அது என்னை மிகவும் நெகிழ வைத்தது. அந்த மாணவருக்கு அந்த இலக்கை அடையத் தேவையான 4 அறிவுரைகளை வழங்கினேன்.

இப்போது, அந்த மாணவர் எம்.ஐ.டி.யில் படித்து வருகிறார். அண்மையில், அவர் தனது லட்சியம் தொடர்பாகக் கூறும்போது, குடியரசுத் தலைவர் வேலை கிடைக்கவில்லையென்றால், பிற வேலைகளுக்குச் செல்வது குறித்து யோசிப்பேன் என்று கூறினார்.

ஒவ்வொரு மாணவரும் இதுபோல் தங்களால் எதுவும் முடியும் என்று நம்ப வேண்டும். அறிவுப் புதையலைத் தேட வேண்டும். தோல்வி மனப்பான்மைக்கு தோல்வி தர வேண்டும். கடுமையாக உழைக்க வேண்டும்.

உங்கள் அனைவருக்கும் ஒன்றைக் கூற விரும்புகிறேன். உறக்கத்தில் வருவதல்ல கனவு, உங்களை உறங்கவிடாமல் செய்வதுதான் கனவு. ஒவ்வொரு இளைஞருக்கும் கனவு வேண்டும். அறிவைத் தேடும் லட்சியம் வேண்டும் என்றார் அப்துல் கலாம்.

--
நன்றி தினமணி