விண்வெளி ஆராய்ச்சியில் ஆர்வம் காட்டுங்கள்: இந்திய மாணவர்களுக்கு சுனிதா வில்லியம்ஸ் வேண்டுகோள்

விண்வெளி ஆராய்ச்சியில் ஆர்வம் காட்டுங்கள்: இந்திய மாணவர்களுக்கு சுனிதா வில்லியம்ஸ் வேண்டுகோள்



சுனிதா வில்லியம்ஸ் (வயது 47), இந்திய வம்சாவளிப்பெண். குஜராத் மாநிலத்தை பூர்வீகமாக கொண்டவர். தற்போது அமெரிக்காவில் வசித்துவரும் அவர் அந்த நாட்டின் விண்வெளி ஆராய்ச்சி அமைப்பான நாசாவில் பணிபுரிந்து வருகிறார். அவர் விண்வெளியில் மிதக்கும் சர்வதேச விண்வெளி மையத்துக்கு இரண்டு முறை பயணம் மேற்கொண்டவர். 322 நாட்களை விண்வெளியில் கழித்து சாதனை படைத்திருக்கிறார்.

இதன் காரணமாக விண்வெளியில் அதிக நாட்கள் தங்கிய இரண்டாவது வீராங்கனை என்ற பெயரை சுனிதா வில்லியம்ஸ் பெற்றிருக்கிறார். விண்வெளியில் அதிக நேரம் நடைபோட்ட வீராங்கனை என்ற சிறப்பும் இவருக்கு இருக்கிறது. சுனிதா வில்லியம்ஸ், இந்திய செய்தி நிறுவனம் ஒன்றுக்கு அளித்த சிறப்பு பேட்டியில் கூறியதாவது:-

இந்தியா அதிகளவில் மனிதவளம் கொண்ட நாடு ஆகும். ஆற்றல் வாய்ந்தவர்கள் நிறைய பேர் இருக்கிறார்கள். இது எனது கற்பனைக்கும் எட்டாதது. அவர்கள் விண்வெளிக்கு செல்வார்கள். விண்வெளி திட்டங்களில் பங்கேற்பார்கள் என்ற நம்பிக்கை எனக்கு உண்டு. சர்வதேச விண்வெளி மையத்தில் நிறைய ஆராய்ச்சிகள் நடத்தி இருக்கிறோம்.

உலகமெங்கும் உள்ளவர்கள் இந்த சர்வதேச விண்வெளி மையத்தை நிறுவினார்கள். உலகமெங்கும் உள்ள குழந்தைகளுடன் நாங்கள் பேசுகிறோம். விண்வெளி ஆராய்ச்சியில் இந்திய மாணவர்கள் ஆர்வம் காட்ட வேண்டும். விண்வெளி ஆராய்ச்சியில் ஈடுபட வேண்டும். அனேகமாக வரும் காலத்தில் இந்தியாவுக்கு வருவேன் என்று நம்புகிறேன்.

இந்தியாவில் ஹூஸ்டனைப் போன்று (அமெரிக்க நகரம்) கோடை காலத்தில் வெப்பம் கொஞ்சம் அதிகமாக இருக்கும். எனவே வசந்த காலத்தில் வர விரும்புகிறேன். விண்வெளிக்கு முதன்முதலாக போனபோது நல்ல படம் எதுவும் கிடைக்கவில்லை. ஏனெனில் கடந்த முறை குளிர்காலத்தில் நான் அங்கு சென்றேன்.

கொஞ்சம் கஷ்டப்பட்டுவிட்டேன். இப்போது இந்தியாவை அழகான படங்களாக எடுத்திருக்கிறேன். எனது தந்தை இருக்கிற குஜராத் மாநிலம் சவுராஷ்டிரா கடலோர பகுதி, மும்பை, இமயமலை, பஞ்சாப், டெல்லி, கொல்கத்தா, பெரிய ஆறுகள், பிரம்மபுத்ரா, கங்கை நதியையும் படம் பிடித்திருக்கிறேன்.

எதிர்காலத்திலும் விண்வெளி ஆராய்ச்சியை தொடர விரும்புகிறேன். இளம் விண்வெளி வீரர்கள் அங்கு செல்ல தயாராகி வருகிறார்கள். சர்வதேச விண்வெளி மையத்துக்கு செல்லவும் தயாராகிறார்கள். என்னால் முடிந்த அளவு அவர்களுக்கு உதவி செய்ய விரும்புகிறேன்.

இவ்வாறு அவர் கூறினார்.

நன்றி:மாலைமலர்