19 ஆண்டுகளாக கடாபியின் எதிர்ப்பாளர் உடல் பிணவறையில் பதுக்கல்

**Muthumohamed** · **Muthumohamed** Mon Dec 03, 2012 7:10 am

திரிபோலி, டிச.3-

லிபியா முன்னாள் அதிபர் கடாபியின் அரசில் முன்னாள் வெளியுறவு துறை மந்திரியாக இருப்பவர் மன்சூர் அல்-இகியா. இவர் கடாபிக்கு எதிராக செயல்பட தொடங்கியவுடன் கடந்த 1993-ம் ஆண்டு முதல் திடீரென மாயமாகி விட்டார்.

அவர் நாட்டை விட்டு தப்பி ஓடியதாக தெரிவிக்கப்பட்டது. ஆனால் அவர் கடாபியால் கொலை செய்யப்பட்டு உடல் உளவுத்துறை தலைமை அலுவலகத்தின் பிணவறையில் வைக்கப்பட்டிருந்தது கண்டுபிடிக்கப்பட்டது. அதுவும் ஓராண்டு, ஈராண்டு அல்ல, 19 ஆண்டுகள் பிணவறையில் வைக்கப்பட்டிருந்தது.

இந்த தகவலை கடாபி அரசில் உளவுத்துறை தலைவராக இருந்த அப்சல்லா அல்-செனூசி தெரிவித்தார். இவர் கடாபி கொல்லப்பட்ட பிறகு தற்போதைய அரசால் கைது செய்யப்பட்டு சிறையில் அடைக்கப்பட்டுள்ளார்.

இதற்கிடையே கிகியாவின் உடல் அடக்கம் இன்று நடைபெற உள்ளது. முன்னதாக அவரது உடல் பிரேத பரிசோதனை செய்யப்பட்டது. அதில் அவரது மார்பில் கத்திக்குத்து காயங்கள் இருந்தது கண்டுபிடிக்கப்பட்டது.

மாலைமலர்