சாம்பியன்ஸ் கோப்பை ஆக்கி: நியூசிலாந்தை தோற்கடித்து இந்திய அணி 2-வது வெற்றி

by **சிவா** Mon Dec 03, 2012 9:34 am

34-வது சாம்பியன்ஸ் கோப்பை ஆண்கள் ஆக்கி போட்டி ஆஸ்திரேலியாவின் மெல்போர்ன் நகரில் நடந்து வருகிறது. 9-ந் தேதி வரை நடக்கும் இந்த போட்டியில் பங்கேற்றுள்ள 8 முன்னணி அணிகளும் இரு பிரிவாக பிரிக்கப்பட்டு, தங்கள் பிரிவில் உள்ள மற்ற அணிகளுடன் லீக் ஆட்டத்தில் மோதுகின்றன.

இதில் 'ஏ' பிரிவில் இடம் பிடித்துள்ள இந்திய அணி தனது 2-வது லீக் ஆட்டத்தில் நியூசிலாந்தை சந்தித்தது. விறுவிறுப்பான இந்த மோதலில் 3-வது நிமிடத்தில் இந்திய வீரரின் சுயகோல் மூலம் நியூசிலாந்து அணிக்கு முதல் கோல் கிடைத்தது. பின்னர் ஆக்ரோஷமாக ஆடிய இந்திய அணி அடுத்தடுத்து 3 கோல்கள் திணித்தது.

ஆகாஷ்தீப்சிங் 10-வது நிமிடத்திலும், குர்விந்தர்சிங் 14-வது நிமிடத்திலும், ரகுநாத் 25-வது நிமிடத்திலும் கோல் போட்டனர். இதனால் முதல் பாதியில் இந்தியா 3-1 என்ற கணக்கில் முன்னிலை வகித்தது. 37-வது நிமிடத்தில் நியூசிலாந்து அணி 2-வது கோல் அடித்தது. இதற்கு பதிலடி கொடுத்த இந்திய வீரர் டேனிஷ் முஸ்தபா, 65-வது நிமிடத்தில் கோல் திருப்பினார்.

முடிவில் இந்திய அணி 4-2 என்ற கோல் கணக்கில் நியூசிலாந்தை வீழ்த்தியது. இந்திய அணி பெற்ற 2-வது வெற்றி இதுவாகும். முன்னதாக முதல் ஆட்டத்தில் 3-1 என்ற கோல் கணக்கில் இங்கிலாந்தை வென்று இருந்தது. ஏ பிரிவில் தோல்வியை சந்திக்காத ஒரே அணியான இந்தியா கடைசி லீக் ஆட்டத்தில் நாளை (செவ்வாய்க்கிழமை) ஜெர்மனியை எதிர்கொள்கிறது.

'ஏ' பிரிவில் நடந்த மற்றொரு லீக் ஆட்டத்தில் இங்கிலாந்து அணி 4-1 என்ற கோல் கணக்கில் ஒலிம்பிக் சாம்பியன் ஜெர்மனிக்கு அதிர்ச்சி அளித்தது. ஜெர்மனி அணி வீரர் நிக்லாசுக்கு 2-வது முறை மஞ்சள் அட்டை காண்பிக்கப்பட்டதால் அந்த அணி கடைசி 15 நிமிடங்கள் 10 வீரர்களுடன் ஆட வேண்டிய நிலை ஏற்பட்டது.

இதில் 14-வது நிமிடத்தில் இங்கிலாந்து அணிக்கும், 33-வது நிமிடத்தில் ஜெர்மனிக்கும் சுய கோல் கிட்டியது குறிப்பிடத்தக்கது. 'பி' பிரிவில் நடந்த ஒரு ஆட்டத்தில் பாகிஸ்தான் 2-0 என்ற கோல் கணக்கில் பெல்ஜியத்தை வீழ்த்தியது. ஒலிம்பிக்கில் வெள்ளிப்பதக்கம் வென்ற நெதர்லாந்து-நடப்பு சாம்பியன் ஆஸ்திரேலியா அணிகள் இடையிலான ஆட்டம் கோல் எதுவுமின்றி டிராவில் முடிந்தது.