நாட்டிலேயே முதல் முறையாக கொச்சி விமான நிலையத்தில் சூரியஒளி மின்சாரம்: தினமும் 100 கிலோவாட் கிடைக்கும்

by அச்சலா Mon Dec 03, 2012 2:20 am

நாட்டிலேயே முதல் முறையாக கொச்சி விமான நிலையத்தில் சூரியஒளி மின்சாரம்: தினமும் 100 கிலோவாட் கிடைக்கும்...

நாடு முழுவதும் பல மாநிலங்களில் கடுமையான மின்சார பற்றாக்குறை நிலவுகிறது. இதனால் சூரிய ஒளி மின்சாரம் பற்றிய விழிப்புணர்வு அதிகரித்துள்ளது. சூரிய ஒளியால் மின்சாரம் தயாரிக்கும் உபகரணங்களை பல தனியார் நிறுவனங்கள் அமைத்து தருகின்றன. கேரளாவில் மின்சார தட்டுப்பாடு காரணமாக கொச்சி விமான நிலையத்தில் சீரான மின்சாரம் கிடைக்க வில்லை. இதனால் பாதிப்பு ஏற்படுவதை தடுக்க சூரிய ஒளியில் இருந்து மின்சாரம் தயாரித்து சப்ளை செய்ய முடிவு செய்யப்பட்டுள்ளது.

கொல்கத்தாவைச சேர்ந்த விக்ரம் சோலார் பவர் நிறுவனம் இதை அமைத்து தருகிறது. கொச்சியில் நெடும்பச்சேரில் விமான நிலையம் அமைந்துள்ளது. அங்கு தினமும் 100 கிலோ வாட் மின்சாரம் தயாரிக்கும் வகையில் சூரியஒளி மின்சாரம் தயாரிப்பு உபகரணங்கள் நிறுவப்படுகிறது. இதில் இருந்து கிடைக்கும் மின்சாரத்தின் மூலம் விமான நிலையத்தின் அனைத்து செயல்பாடுகளும் இயக்கப்படும். இதன்மூலம் நாட்டிலேயே முதல் முறையாக கொச்சி விமான நிலையம் முழுக்க சூரியஒளி மின்சாரத்தில் இயங்கும்.

இதற்காக கொல்கத்தா நிறுவனம் இந்திய விமான போக்குவரத்து ஆணையம் இடையே ஒப்பந்தம் செய்யப்பட்டுள்ளது. இது வெற்றிகரமாக செயல்பட்டால் மற்ற விமான நிலையங்களுக்கும் விரிவுபடுத்த முடிவு செய்யப்பட்டுள்ளது. சூரியஒளி மின்சாரத்தில் சுற்றுச்சூழல் பாதிப்பு ஏற்படாது. ஒருமுறை உபகரணங்கள் நிறுவ மட்டும் செலவாகும். அதன்பிறகு செலவு இல்லாமலேயே மின்சாரம் கிடைக்கும் என்பதால் சிக்கனமானது. ஏற்கனவே இந்த கொல்கத்தா நிறுவனம் ஒடிசா மாநிலம் பூரி ஜெகநாதர் கோவிலில் 30 கிலோவாட் சூரியஒளி மின்சாரம் தயாரிப்பு சாதனங்களை நிறுவி உள்ளது குறிப்பிடத்தக்கது.

நன்றி: மாலைமலர்