ஹைக்கூ ! கவிஞர் இரா .இரவி .

by **eraeravi** Sun Dec 02, 2012 12:38 pm

ஹைக்கூ ! கவிஞர் இரா .இரவி .

நிமிர்த்த முடியாது
படுத்திருக்கும் ஏணி
தண்டவாளம் !

துணைவனை இழந்தவளுக்கு
துணையானது
பூ வியாபாரம் !

நன்றி தொலைக்காட்சிகளின்
விளம்பர இடைவெளிக்கு
கிடைத்தது உணவு !

கண்களால் காண்பதும் பொய்
மரங்கள் நகர்ந்தன
சன்னலோரப் பயணத்தில் !

காகத்தின் அறியாமையில்
பிறந்தன
குயில்கள் !

விருந்தினர் வருவதாக
கரைந்த காகம்
விருந்தானது !

ஹைக்கூ கவிதைகளின்
விளம்பரத் தூதுவர்கள்
அணில்கள் !

இன்றும் தொடரும் புராணம்
ஞானப்பழச் சண்டை
சகோதரர்களிடையே !

by யினியவன் Sun Dec 02, 2012 12:49 pm

ஹைக்கூ அருமை இரவி

ஹைக்கூ எழுதும் வரைமுறைகள் நண்பர்கள் குறிப்பிடவும்..ஹைக்கூவில் ஒப்பீடு செய்யலாமா...உதாரணத்திற்கு
//நிமிர்த்த முடியாது
படுத்திருக்கும் ஏணி
தண்டவாளம் !// இங்கு தண்டவாளத்திற்கு ஏணியை ஒப்பிட்டு இருக்கிறது அல்லவா..?
( தெரிந்துகொண்டு யாமும் முயற்சித்துப் பார்க்கவே இந்த கேள்வி...)

by **eraeravi** Sun Dec 02, 2012 5:06 pm

ஹைக்கூ மூன்று வரிகளில் இருக்க வேண்டும் மூன்றாவது வரியில் விடை இருக்க வேண்டும் .சொற்ச் சிக்கனம் இருக்க வேண்டும் அவ்வளுவுதான் .நீங்களும் எழுதலாம் ஹைக்கூ வாசகர்களே ஹைக்கூ படைக்கலாம் .வேலை இல்லாத் திண்டாட்டம் பற்றி நான் எழுதிய ஹைக்கூ.

அட்சயப் பாத்திரம்
திருவோடானது
பட்டச் சான்றிதழ் !

மத சண்டைகள் பற்றி நான் எழுதிய ஹைக்கூ.

அன்று நெறி
இன்று வெறி
மதங்கள் !

காதலி பற்றி நான் எழுதிய ஹைக்கூ.

அமாவாசையன்று
நிலவு
எதிர் வீட்டு சன்னலில் !
ஒப்பிடு இருக்கலாம் மனதில் பட்டத்தை எழுதுங்கள் பின் நுட்பமாக செதுக்குங்கள் .ஹைக்கூ கிடைக்கும் .

அமாவாசையன்று
நிலவு
எதிர் வீட்டு சன்னலில் !
......................................................................சிறப்பாக இருக்கிறது இரா.இரவி அவர்களே.