காற்றாலை நிலுவைத்தொகை பிரச்னைக்கு தீர்வு : மத்திய மந்திரி அறிவிப்புக்கு வரவேற்பு

"காற்றாலை மின் உற்பத்திக்கான பணத்தை, மத்திய அரசே நேரடியாக வழங்கும் என்ற அறிவிப்பு வரவேற்புக்குரியது' என, காற்றாலை உற்பத்தியாளர்கள் சங்கம் அறிவித்துள்ளது. மேலும், இந்நடைமுறையை, விரைவில் செயல்பாட்டுக்கு கொண்டு வர வேண்டும் என, வலியுறுத்தி உள்ளது.

சென்னையில் நடக்கும், "காற்றாலை மின் உற்பத்தி - 2012' சர்வதேச கருத்தரங்கு மற்றும் கண்காட்சியில், பங்கேற்ற மரபுசாரா எரிசக்தி துறை அமைச்சர் பரூக் அப்துல்லா பேசியதாவது: காற்றாலை மின் உற்பத்தியாளர்களிடம் செய்த, மின் கொள்முதலுக்கான தொகையை, தமிழகம் உள்பட, சில மாநிலங்கள், பல மாதங்களாக வழங்கவில்லை. உற்பத்தியாளர்களிடமிருந்து, கொள்முதல் செய்த மின்சாரத்திற்கு, உரிய நேரத்தில் பணம் வழங்கா விட்டால், காற்றாலை மின் உற்பத்தி பாதிக்கும். எனவே, காற்றாலை மின் உற்பத்தியாளர்களுக்கு அளிக்க வேண்டிய தொகையை, மத்திய அரசு வழங்கி விட்டு, மாநில அரசுகளுக்கு அளிக்கும் நிதியிலிருந்து, அத்தொகையை பிடித்தம் செய்து கொள்ளும். இத்திட்டத்தை, நிதியமைச்சகத்துடன் ஆலோசித்து நிறைவேற்றுவோம். இவ்வாறு அவர் பேசினார்.

மத்திய அரசின், இந்த திட்டத்தை, இந்திய காற்றாலை உற்பத்தியாளர்கள் சங்கம் வரவேற்றுள்ளது. அதன் தலைவர், கஸ்தூரி ரங்கையன் கூறியதாவது: மின் உற்பத்திக்கான பணத்தை, உரிய காலத்தில் வழங்கா விட்டால், தொடர்ந்து உற்பத்தி செய்வது கடினம். தமிழகம் உட்பட பல மாநிலங்கள், தனியார் காற்றாலை உற்பத்தியாளர்களிடமிருந்து, கொள்முதல் செய்த மின்சாரத்திற்கு, பல ஆயிரம் கோடி ரூபாய் பாக்கி உள்ளது.
தமிழகத்தில் மட்டும் கடந்த ஆறு மாதத்தில், 6,900 மில்லியன் யூனிட் மின்சாரத்தை உற்பத்தி செய்து வழங்கி உள்ளோம். வாரியம், கொள்முதல் செய்த மின்சாரத்திற்கு, இதுவரை பணம் வழங்கவில்லை. ஆறு மாதத்திற்கான தொகை மட்டும், 3,500 கோடி ரூபாய் பாக்கி உள்ளது. ஏற்கனவே, கடந்த, 10 மாதங்களுக்கான கொள்முதல் விலையையும் வழங்கவில்லை. இந்நிலையில், மத்திய அரசு நேரடியாக, காற்றாலை உற்பத்தியாளர்களுக்கு, கொள்முதல் தொகையை அளிக்கும் என்ற அறிவிப்பு வரவேற்கத்தக்கது. இதன் நடைமுறையை, உடனே வெளியிட வேண்டும். இவ்வாறு அவர் கூறினார்.

-தினமலர்