பல துறைகளில் சாதனை படைத்து வரும் சகோதரிகள்!

ஸ்ரீநிதி சகோதரிகளின் சாதனைப் பக்கங்கள் நிறையவே இருக்கிறது. துப்பாக்கி சுடுதல், குதிரையேற்றம், ஜூடோ, சிலம்பம், நீச்சல், யோகா, செஸ், தடகளம் துவங்கி... பரதநாட்டியம் வரையில் சாதித்து, கோவை நகரை கலக்கலாக வலம் வருகிறார்கள் ஸ்ரீநிதி அபிராமி, ஸ்ரீநிதி மாளவிகா.

கோவையில் உள்ள சுகுணா ரிப் பள்ளியில் ஸ்ரீநிதி அபிராமி 11-ம் வகுப்பும், அதே பள்ளியில் அவரது தங்கை ஸ்ரீநிதி மாளவிகா 8-ம் வகுப்பும் படித்து வருகின்றனர்.

பள்ளிக்கூடம் சென்று வந்த அவர்களை நாம் சந்தித்தபோது, களைப்பு தெரியாமல் உற்சாகமாகப் பேசினார்கள். முதலில் பேசியவர் ஸ்ரீநிதி அபிராமி...
நன்றி:கூடல்
எப்படி பல துறைகளில் புகுந்து விளையாட முடிகிறது?

"அப்பா வெங்கடேஷ், அம்மா லதா தரும் உற்சாகம்தான் இதற்கெல்லாம் காரணம். சின்ன வயது முதலே அவர்கள் எங்களது விளையாட்டு ஆர்வத்தை கண்டறிந்து, இன்று வரையிலும் எங்களது ஆர்வம் குறைந்து விடாமல் ஊக்கமளித்து வருகிறார்கள்.

முதல் வெற்றி எப்போது?

2003-ம் ஆண்டில்தான் விளையாட்டுத்துறையில் எங்களது சாதனைப் பயணம் துவங்கியது. முதன் முதலாக அதே ஆண்டு மாவட்ட அளவில் நடந்த கராத்தே போட்டியில் தங்கப்பதக்கம் பெற்றேன். அதுதான் எனது முதல் வெற்றி.

பிற சாதனைகள்...?

2007-ல் புதுடெல்லியில் நடைபெற்ற தேசிய துப்பாக்கி சுடுதல் போட்டியில் பங்கேற்று சிறப்பிடம் பெற்றேன். 2009-ல் மதுரையில் நடைபெற்ற மாநில துப்பாக்கி சுடுதல் போட்டி மற்றும் கோவையில் நடைபெற்ற மண்டல மற்றும் மாநில சிலம்பம் போட்டி, மாநில செஸ் போட்டி ஆகியவற்றில் தங்கப்பதக்கம் கிடைத்தது. 2010-ல் கரூரில் நடைபெற்ற தேசிய சப்-ஜூனியர் ஜூடோ போட்டி, மாநில சிலம்ப போட்டி, மாவட்ட சிலம்ப போட்டி, மாநில அளவிலான ஜூடோ போட்டிகளிலும் தங்கப்பதக்கம் வென்றேன். 2010-2011-ல் மண்டல அளவிலான சிலம்ப போட்டியில் தங்கப்பதக்கம் கிடைத்தது. சமீபத்தில் சென்னையில் நடைபெற்ற மாநில அளவிலான துப்பாக்கி சுடுதல் போட்டியில் 4 தங்கம் உள்பட 10 பதக்கங்கள் வென்றேன். மேலும், விளையாட்டு மேம்பாட்டு ஆணையம் சார்பில் நடைபெற்ற மாநில ஜூடோ போட்டியிலும் தங்கம் வென்று திரும்பியுள்ளேன். இப்படியாக, இதுவரை நூற்றுக்கும் மேற்பட்ட பதக்கங்களை வாங்கி குவித்துள்ளேன்.

இவ்வளவு வெற்றிகள் எப்படி சாத்தியமாயிற்று?

தோல்வி வந்தாலும் துவண்டு விடாத முயற்சி இருந்தாலே சாதித்துவிடலாம். இதோடு, சிறந்த பயிற்சியும் அவசியம். என்னைப் பொறுத்தவரை, பங்கேற்கும் ஒவ்வொரு போட்டியிலும் தங்கம் வெல்ல வேண்டும் என்கிற வைராக்கியத்தோடு தினமும் பயிற்சியில் ஈடுபடுவேன். நாள்தோறும் தவறாது நான் மேற்கொள்ளும் பயிற்சிதான் எனது வெற்றிக்கெல்லாம் மூலக்காரணம்.

வேறு ஏதேனும் விசேஷ பயிற்சிகள் உண்டா?

கண்டிப்பாக. உடல்நிலை ஆரோக்கியமாக இருந்தால்தான் விளையாட்டில் வெற்றி பெற முடியும். அதற்காக தினமும் உடற்பயிற்சிகளும் மேற்கொள்கிறேன். தொடர்ந்து ஒருவர் உடற்பயிற்சி செய்து வந்தால் மனதிற்கு தெளிவும், புத்துணர்ச்சியும் கிடைக்கும். உடற்பயிற்சியோடு தினமும் யோகா செய்வதும் என்னுடைய வழக்கம்.

பயிற்சி முறைகளைப் பார்த்தால் படிப்பதற்கு நேரம் இருக்காது போல் தெரிகிறதே...

அப்படியெல்லாம் இல்லை. படிப்பதற்கும் உரிய நேரம் ஒதுக்குகிறேன். பயிற்சி முடிந்த பிறகு நிச்சயமாக படிப்புதான்!

உங்களது லட்சியம்?

தேசிய அளவிலான போட்டிகள் வரை பங்கேற்று விளையாடி பதக்கங்களும் வென்றுள்ளேன். இதேபோல், சர்வதேச மற்றும் ஒலிம்பிக் போட்டிகளில் இந்தியா சார்பில் விளையாடி தங்கப்பதக்கம் வெல்ல வேண்டும் என்பது எனது லட்சியம். அதற்காக கடுமையாக உழைத்து வருகிறேன். நிச்சயம் என் லட்சியம் நிறைவேறும் என்று நினைக்கிறேன். இதேபோல், இன்னொரு லட்சியமும் இருக்கிறது. ஐ.ஏ.எஸ். அதிகாரியாகி, சேவை செய்ய வேண்டும் என்பதுதான் அது!" என்கிற ஸ்ரீநிதி அபிராமியின் பேச்சில் சாதிக்க முடியும் என்கிற தன்னம்பிக்கை நிறையவே பளிச்சிடுகிறது.

அக்காவின் சாதனைகளே பெரும் பட்டியல் என்றால், தங்கையின் வெற்றிகளும் அதற்கு சளைத்தது அல்ல என்பதை நிரூபிக்கின்றன.

2009-ல் மதுரையில் நடைபெற்ற மாநில துப்பாக்கி சுடுதல் போட்டியில் வெண்கலப் பதக்கம், 2010-ல் கரூரில் நடைபெற்ற தேசிய சப்-ஜூனியர் ஜூடோ போட்டி, சத்தீஸ்கரில் நடைபெற்ற தேசிய ஜூடோ போட்டி மற்றும் விழுப்புரத்தில் நடைபெற்ற மாநில சிலம்பம் ஆகிய போட்டிகளில் தங்கப்பதக்கம், சமீபத்தில் சென்னையில் நடைபெற்ற மாநில ஜூடோ போட்டியில் தங்கப்பதக்கம்... என்று, இதுவரை 50-க்கும் மேற்பட்ட பதக்கங்களை குவித்து இருக்கிறார் ஸ்ரீநிதி மாளவிகா.

அக்காவைப் போன்று இவரும் தைரியமாகப் பேசுகிறார்.

"அக்காவைப் பார்த்துதான் நானும் விளையாட ஆரம்பித்தேன். அவர் என்னவெல்லாம் விளையாடுவாரோ அவை அத்தனையும் நானும் விளையாடுவேன். அக்காவைப் போன்று குதிரையில் வேகமாக சவாரி செய்வதும் பிடிக்கும். ஓவியமும் நன்றாக வரைவேன். அதற்காக 'இளம் ஓவியர்' என்ற விருதையும் பெற்றுள்ளேன். அக்காவைப் போன்று ஐ.ஏ.எஸ். அதிகாரி ஆகவேண்டும் என்பதுதான் என்னுடைய லட்சியமும்" என்கிறார், ஸ்ரீநிதி மாளவிகா.

பல துறைகளில் அடியெடுத்து வைத்து சாதித்து வரும் இந்த ஸ்ரீநிதி சகோதரிகளின் பரதநாட்டியம் கோவை பகுதியில் பிரபலம். கலை, இலக்கியப் போட்டிகளுக்காக தமிழக அரசின் 'இலக்கிய செல்வர்', 'கலை இளமணி' ஆகிய விருதுகளை ஸ்ரீநிதி அபிராமி பெற்றிருக்கிறார் என்பது குறிப்பிடத்தக்கது.

நன்றி:கூடல்

தொடர்ந்து பல சாதனைகளை பெற வாழ்த்துகிறோம் ..

புதுமை பெண்கள் கிளம்பிவிட்டார்கள் என்று சொன்னேனே...
பெண்கள் இன்னும் பல துறைகளில் உள்ளனர்..