பதிமூன்று ஆண்டுகளாக தொடரும் சோகம்: கார்கில் வீரரின் குடும்பத்துக்கு நியாயம் கிடைக்குமா?

புதுடில்லி: கார்கில் போர் முடிந்து 13 ஆண்டுகள் ஆன நிலையில், பாகிஸ்தான் ராணுவத்தால் பிடித்துச் செல்லப்பட்டு கொடூரமாக கொல்லப்பட்ட ராணுவ வீரர் லெப்டினென்ட் சவுரப் காலியா குடும்பத்திற்கு இதுவரை நியாயம் கிடைக்க வில்லை. நீதியை வேண்டி தற்போது அவரது குடும்பம் சுப்ரீம் கோர்ட்டின் கதவை தட்டியுள்ளது.

கடந்த 1999ம் ஆண்டு கார்கில் போர் நடந்த போது, மே 15ம் தேதி 4வது ஜாட் ரெஜிமென்ட்டைச் சேர்ந்த சவுரப் காலியா உள்ளிட்ட 6 ராணுவ வீரர்கள் பாகிஸ்தான் ராணுவத்தால் பிடித்துச் செல்லப்பட்டனர். பின்னர் கடும் சித்ரவதைக்குப்பின் கொடூரமாக சிதைக்கப்பட்ட நிலையில், 5 பேரின் உடல்களும் இந்தியாவிடம் ஒப்படைக்கப்பட்டன. இந்நிலையில், தங்களது மகன் கொடூரமாக கொல்லப்பட்டதற்கு கண்டனம் தெரிவித்துள்ள சவுரப்பின் பெற்றோர் இந்த படுகொலையை போர்க்குற்றமாக அறிவிக்கக்கோரியும், இதற்காக பாகிஸ்தான் மன்னிப்பு கேட்க வேண்டும் என்றும் கோரி வருகின்றனர். ஆனால் இதுவரை அதற்கான எந்த முயற்சியும் எடுக்கப்பட்டதாக தெரியவில்லை. கடந்த 13 ஆண்டுகளாக இதற்காக போராடி ஓய்ந்த அவர்கள், தற்போது நியாயம் வேண்டி சுப்ரீம் கோர்ட்டின் கதவுகளை தட்டியுள்ளனர்.

இதுகுறித்து சவுரப் காலியாவின் தந்தை டாக்டர் காலியா கூறுகையில், தங்கள் மகனின் மரணம் தொடர்பாக இதுவரை மத்திய அரசு எந்த ஒரு நடவடிக்கையும் எடுக்க வில்லை. அப்போதைய பிரதமரும், பாதுகாப்புத்துறை அமைச்சரும் நடவடிக்கை எடுப்பதாக உறுதியளித்தும் இதுவரை எதுவும் நடக்கவில்லை என வேதனையுடன் தெரிவித்தார்.

சவுரவ் காலியாவின் தாயார் கூறுகையில், சம்பவம் நடந்து 13 ஆண்டுகளாகியும் தங்களுக்கு நீதி கிடைக்க வில்லை என்றும் இதற்காகவே சுப்ரீம் கோர்ட்டை அணுகியதாகவும் தெரிவித்தார்.

இதுகுறித்து கருத்து தெரிவித்துள்ள காங்கிரஸ் கட்சியின் பொதுச்செயலாளர் திக்விஜய் சிங், இவ்விஷயத்தை மத்திய அரசு நிச்சயம் பாகிஸ்தான் அரசிடம் கொண்டு செல்ல வேண்டும் என்றும், இதற்காக அப்போதைய தேசிய ஜனநாயக கூட்டணி என்ன நடவடிக்கை எடுத்தது என்றும் வினவியுள்ளார்.

காலியா மரணம் குறித்து கருத்து தெரிவித்துள்ள முன்னாள் வெளியுறவுத்துறை அமைச்சர் ஜஸ்வந்த் சிங், ஒரு முன்னாள் ராணுவ வீரராக தனது உடல் துடிப்பதாகவும், இது முற்றிலும் ஏற்றுக்கொள்ள முடியாத செயல் என்றும் தெரிவித்துள்ளார்.

இதனிடையே, மத்திய வெளியுறவுத்துறை அமைச்சர் சல்மான் குர்ஷித் கூறும் போது, இச்சம்பவம் முற்றிலும் சோகமானது. இது தொடர்பாக இந்தியாவின் கவலையை பல முறை பாகிஸ்தானிடம் எடுத்துச் சென்ற போதும், பாகிஸ்தானிடமிருந்து உரிய பதில் வரவில்லை. சவுரவின் குடும்பத்திற்கு எனது ஆழ்ந்த இரங்கலை தெரவித்துக்கொள்கிறேன். இது தொடர்பாக இயன்றதை செய்வோம். தற்போது இவ்வழக்கு சுப்ரீம் கோர்ட்டில் உள்ளது என்று முடித்துக்கொண்டார்................... தினமலர் ....................