குஜராத் சட்ட சபை தேர்தலில் பாரதீய ஜனதா கட்சிக்கு 124 இடங்கள் கிடைக்கும்

**சிவா** · **சிவா** Sun Nov 25, 2012 12:11 pm

குஜராத் மாநில சட்டசபைக்கு அடுத்த மாதம் (டிசம்பர்) இரு கட்டங்களாக தேர்தல் நடைபெற உள்ளது. டிசம்பர் 13-ந்தேதி நடைபெற உள்ள முதல் கட்ட தேர்தலில் போட்டியிட 1523 பேர் மனு தாக்கல் செய்துள்ளனர்.

இந்த நிலையில் குஜராத் சட்டசபை தேர்தலில் எந்த கட்சி வெற்றி பெற்று ஆட்சி அமைக்கும் என்று ஒரு இந்தி தொலைக்காட்சி சானலுக்காக ஏசி நீல்சன் நிறுவனம் கருத்து கணிப்பு நடத்தியது.

எல்லா தொகுதி வாக்காளர்களிடமும் இதற்காக பல்வேறு கேள்விகள் கேட்கப்பட்டன. இந்த கருத்துக்கணிப்பில் குஜராத் மாநிலத்தில் முதல்- மந்திரி நரேந்திர மோடிக்கு ஆதரவான அலை வீசுவது தெரிய வந்துள்ளது.

சுமார் 80 சதவீத வாக்காளர்கள் நரேந்திர மோடிதான் மீண்டும் முதல்-மந்திரி ஆக வேண்டும் என்று விருப்பம் தெரிவித்துள்ளனர். மோடி தலைமையிலான பா.ஜ.க.வுக்கு 124 இடங்களில் வெற்றி கிடைக்கும் என்று ஏசி நீல்சன் நிறுவனம் கருத்துகணிப்பு தகவலை வெளியிட்டுள்ளது. இந்த எண்ணிக்கை அதிகரிக்க வாய்ப்புள்ளதாகவும் அந்த நிறுவனம் தெரிவித்துள்ளது.

கடந்த 2007-ம் ஆண்டு குஜராத் சட்டசபைக்கு நடந்த தேர்தலில் பாரதீய ஜனதா கட்சி 117 இடங்களில் வெற்றி பெற்றிருந்தது. இந்த தடவை அந்த எண்ணிக்கை உயரும் என்று இதுவரை நடத்தப்பட்டுள்ள எல்லா கருத்து கணிப்பு முடிவுகளிலும் தெரிய வந்துள்ளது.

காங்கிரஸ் கட்சி இந்த தடவை 51 இடங்களில் மட்டுமே வெற்றி பெறும் வாய்ப்புடன் இருப்பதாக தெரிய வந்துள்ளது. கடந்த தேர்தலில் காங்கிரஸ் கூட்டணிக்கு 59 இடங்கள் கிடைத்து இருந்தன.

இந்த தடவை காங்கிரஸ் 8 முதல் 15 இடங்களை பறிகொடுக்கும் என்று கருத்து கணிப்பில் கூறப்பட்டுள்ளது. வேட்பாளர் தேர்வில் கடும் குழப்பம் ஏற்பட்டுள்ளதால் காங்கிரஸ் மீது குஜராத் வாக்காளர்களிடம் அதிருப்தி அதிகரித்து இருப்பதாக தகவல்கள் வெளியாகியுள்ளன.

மாலைமலர்