வைகோவுக்கு இளங்கோவன் கண்டனம்

**சிவா** · **சிவா** Fri 23 Nov 2012 - 9:11

கோபிசெட்டிபாளையம்: ""கொலையாளிகளை உற்சாகப்படுத்தி, தீவிரவாதத்தை ஆதரித்து பேசும், வைகோவின் செயல் கண்டத்துக்குரியது,'' என, முன்னாள் மத்திய மந்திரி இளங்கோவன் தெரிவித்தார்.

கோபிசெட்டிபாளையத்தில் நிருபர்களிடம் அவர் கூறியதாவது: கசாப் தூக்கிலிட்டதை நாடு முழுவதும் மக்கள் வரவேற்றுள்ளனர். அதேபோல், லோக்சபாவில் துப்பாக்கி சூடு நடத்திய தீவிரவாதிகள், தர்மபுரியில் மாணவிரை உயிரோடு பஸ்சில் வைத்து கொளுத்திய அரசியல் வன்முறையாளர்களுக்கு, தண்டனையை நிறைவேற்றும் வகையில், தூக்கிலிட ஏற்பாடு செய்ய வேண்டும். அப்போதுதான், தீவிரவாதிகளை ஒடுக்குவதில் மத்திய, மாநில அரசு முழு வீச்சோடு இருப்பதாக மக்களிடம் பரவலாக பேசப்படும்.

இந்தியாவில், சிலர் வன்முறையில் ஈடுபடுவதால் மக்களின் அமைதியான வாழ்க்கை பாதிக்கிறது. தீவிரவாதிகளுக்கு ஆதரவாக பேசுவோர் மீதும், தண்டனை கொடுக்க கூடாது என்போரையும் நாடு கடத்த வேண்டும். அல்லது அவர்களாகவே படகில் ஏறி செல்லக் கூடி வழிவகை செய்ய வேண்டும். கொலையாளிகளை உற்சாகப்படுத்துவது, தீவிரவாதத்தை ஆதரிப்பது போல் பேசும் வைகோவின் செயல் கண்டத்துக்குரியது.

தமிழகத்தில், ஜெயலலிதா ஆட்சிக்கு வந்தால் ஒளிமயமாக இருக்கும் என, மக்கள் நம்பினர். இரண்டு மணி நேரம் மின்தடையால், தி.மு.க.,வை மக்கள் புறக்கணித்தனர். 20 மணி நேர மின்தடையால் மக்கள் பாதிக்கப்படுகின்றனர்.

கூடங்குளம் செயல்படாமைக்கு முதல் காரணம் ஜெயலலிதா. உதயகுமாருக்கு ஆதரவாக ஜெயலலிதா செயல்பாடுகிறார். கரும்பு டன் ஒன்றுக்கு, 4,000 ரூபாய் வழங்க தமிழக நடவடிக்கை எடுக்க வேண்டும். இவ்வாறு அவர் தெரிவித்தார்.

தினமலர்