வேலைக்கு சென்ற அரசு பள்ளி ஆசிரியர் கொலை

**சிவா** · **சிவா** Fri Nov 23, 2012 7:43 am

கிருமாம்பாக்கம்:புதுச்சேரியில், வேலைக்குச் சென்ற அரசுப் பள்ளி ஆசிரியரை வழி மறித்து, கத்தியால் வெட்டிக் கொலை செய்த சம்பவம் பரபரப்பை ஏற்படுத்தி உள்ளது.

புதுச்சேரி, அரியாங்குப்பம் ராதாகிருஷ்ணன் நகர், பாரதிதாசன் வீதியை சேர்ந்தவர் செழியன், 32. நோணாங்குப்பம் அரசு துவக்கப் பள்ளியில் ஆசிரியராகப் பணியாற்றினார். வீராம்பட்டினத்தை சேர்ந்த எழில் மகேஸ்வரியை, காதலித்து திருமணம் செய்தார். திருமணத்திற்குப் பின், வீராம்பட்டினம் பவானி நகர் வள்ளலார் வீதியில், வசித்து வந்தார்.

நேற்று காலை, 9:00 மணிக்கு, இருசக்கர வாகனத்தில் பள்ளிக்கு புறப்பட்டார். கடலூர் மெயின் ரோட்டிலிருந்து திரும்பி, நோணாங்குப்பம் சாலையில் வந்தபோது, இவரை பின் தொடர்ந்து, இருசக்கர வாகனத்தில் வந்த, மூன்று பேர் கொண்ட கும்பல் வழி மறித்து, செழியனை கத்தியால் வெட்டினர்.தடுக்க முயன்ற செழியனுக்கு, கையில் பலத்த காயம் ஏற்பட்டது. சுதாரித்த செழியன், பைக்கைப் போட்டுவிட்டு, தப்பியோட முயன்றார். ஆனால், அக்கும்பல் விடாமல் துரத்திச் சென்று, தலை உள்ளிட்ட இடங்களில் சரமாரியாக கத்தியால் வெட்டியது. படுகாயமடைந்த செழியன், சம்பவ இடத்திலேயே உயிரிழந்தார்.

பகல் நேரத்தில், போக்குவரத்து மிகுந்த பகுதியில் நடந்த சம்பவத்தால், பதற்றம் நிலவியது. போலீசார், சம்பவ இடத்தில் விசாரணை நடத்தினர். செழியன் ஆசிரியர் பணி மட்டுமின்றி, ரியல் எஸ்டேட் தொழில், மீன்பிடி படகு விற்பனை செய்யும் தொழிலிலும் ஈடுபட்டு வந்துள்ளார். இவர், அனைவருடனும் சகஜமாக பேசி பழகக் கூடியவர் என்பதும் விசாரணையில் தெரிய வந்துள்ளது.ரியல் எஸ்டேட் தொழிலில் ஏற்பட்ட பிரச்னையால், கொலை செய்யப்பட்டாரா, வேறு காரணமா என, மூன்று தனிப்படை அமைத்து போலீசார் விசாரணை நடத்தி வருகின்றனர்.

தினமலர்