100வது டெஸ்டில் சேவக் சதம் விளாச வேண்டும் : கபில், வெங்சர்க்கார் வாழ்த்து

by **Muthumohamed** Wed Nov 21, 2012 6:45 pm

இந்திய கிரிக்கெட் அணி யின் அதிரடி வீரரான சேவக் இதுவரை 99 டெஸ்ட் போட்டிகளில் ஆடியுள்ளார். 23 சதங்கள், 32 அரைசதங்களுடன் 8,448 ரன்கள் குவித்துள் ளார். இந்திய வீரர்களில் 2 முறை முச்சதம் அடித்த வீரர் என்ற சாதனையும் அவர் படைத்துள்ளார். அவரது அதிகபட்ச ஸ்கோர் 319 ஆகும். ஸ்ட்ரைக் ரேட் 85.45. ஆறு முறை இரட்டை சதம் அடித்துள்ளார். 14 முறை 150 ரன்களை கடந்துள்ளார். 5 முறை 90 ரன்களிலும், தலா ஒருமுறை 195 ரன்னிலும், 99 ரன்னிலும் ஆட்டமிழந்துள்ளார். மும்பையில் வருகிற 23ம் தேதி இங்கிலாந்துக்கு எதிராக தொடங்கும் டெஸ்ட் போட்டி சேவக்கிற்கு 100வது ஆட்டமாகும். இந்திய வீரர்களில் டிரா விட், லட்சுமண், சச்சின், கும்ப்ளே, கபில்தேவ், கவாஸ்கர், வெங்சர்க்கார், கங்குலி ஆகியோர் 100 டெஸ்ட் போட்டிக்கு மேல் ஆடியுள்ளனர். அந்த வகையில் சேவக் 9வது வீரராக 100வது டெஸ்டில் கால் எடுத்து வைக்கிறார்.

இந்நிலையில் சேவக் 100வது டெஸ்டில் சதம் விளாச வேண்டுமென மாஜி வீரர்கள் கபில்தேவ், வெங்சர்க்கார் ஆகியோர் வாழ்த்து தெரிவித்துள்ளனர். கபில்தேவ் கூறு கையில், சேவக் மாதிரி நிறைய வீரர்கள் டெஸ்ட் போட்டிக்கான அணிக்கு தேவை. அவரை போன்றவர்களால் மட்டும் தான் டெஸ்ட் போட்டியை மைதானத்தில் பார்ப்பதற்கு ரசிகர்களை இழுத்துவர முடியும். 100வது டெஸ்டில் சேவக் சதம் அடிக்க வேண்டுமென விரும்புகிறேன். இதற்காக அவருக்கு வாழ்த்து தெரிவிக்கிறேன் என்றார். வெங்சர்க்கார் கூறுகையில், சேவக் தலைசிறந்த வீரர். நான் அவருடைய மிகப்பெரிய ரசிகன். அவருடைய டெஸ்ட் போட்டி ரன்குவிப்பு பிரமிக்க வைக்கும். மோசமான பார்மில் இருந்த சமயங்களில் கூட அவர் தனது ஆட்ட ஸ்டைலை மாற்றியது கிடையாது. 100வது டெஸ்ட்டில் அவர் நிச்சயம் சதம் அடிப்பார் என்ற நம்பிக்கை உள்ளது என்றார்.

தினகரன்