அதிமுகவின் நிலை என்ன?

மத்திய அரசுக்கு எதிராக திரிணமூல் காங்கிரஸ் கொண்டு வரவுள்ள நம்பிக்கையில்லாத் தீர்மானம் குறித்து தங்களுடைய கட்சி இன்னும் எந்த முடிவும் எடுக்கவில்லை என்று அதிமுக பொதுச் செயலாளரும், முதல்வருமான ஜெயலலிதா செவ்வாய்க்கிழமை தெரிவித்தார்.

அதிமுக எம்.பி.க்களுடன் தலைமைச் செயலகத்தில் ஆலோசனை நடத்திய பிறகு செய்தியாளர்களிடம் பேசிய அவர், நாடாளுமன்றத்துக்கு எந்த நேரத்தில் தேர்தல் வந்தாலும் அதைச் சந்திக்கத் தயாராக இருப்பதாகவும் கூறினார்.

நாடாளுமன்றக் கூட்டத் தொடர் தொடங்குவதை ஒட்டி, அதிமுக எம்.பி.க்களுடன் முதல்வர் ஜெயலலிதா செவ்வாய்க்கிழமை ஆலோசனை நடத்தினார். காலை 11.30 மணியளவில் தொடங்கிய இந்தக் கூட்டம் சுமார் 1 மணி வரை நடைபெற்றது. கூட்டத்துக்குப் பிறகு, செய்தியாளர்களின் கேள்விகளுக்கு முதல்வர் ஜெயலலிதா பதிலளித்தார். அதன் விவரம்:

கட்சி எம்.பி.க்களுடன் என்ன ஆலோசனை நடத்தினீர்கள், சில்லறை வர்த்தகத்தில் அன்னிய நேரடி முதலீட்டினை அனுமதிப்பது தொடர்பாக உங்களுடைய நிலைப்பாடு என்ன என்ற கேள்விக்கு முதல்வர் பதிலளித்தார்.

இந்தப் பிரச்னை குறித்து ஏற்கெனவே தெளிவான அறிக்கையை வெளியிட்டுள்ளேன். தமிழகத்தில் சில்லறை வர்த்தகத்தில் அன்னிய நேரடி முதலீட்டை அனுமதிக்க மாட்டோம் என அறிக்கை மூலம் தெரிவித்திருந்தேன். அதில் எந்தவித மாற்றமும் இல்லை.

மத்திய அரசுக்கு எதிராகவோ, சில்லறை வர்த்தகத்தில் அன்னிய நேரடி முதலீட்டுப் பிரச்னை தொடர்பாக நாடாளுமன்றத்தில் நம்பிக்கையில்லாத் தீர்மானம் கொண்டு வருவது தொடர்பாகவோ அதிமுகவின் ஆதரவை இதுவரை யாரும் கேட்கவில்லை. அப்படி யாரேனும் ஆதரவு கோரினால் அதுகுறித்து பரிசீலிப்போம் என்றார் முதல்வர் ஜெயலலிதா.

சில்லறை வர்த்தகத்தில் அன்னிய நேரடி முதலீடு குறித்து நாடாளுமன்றத்தில் வாக்கெடுப்பு நடத்தப்பட்டால் அதிமுகவின் நிலைப்பாடு என்னவாக இருக்கும் என்று செய்தியாளர்கள் எழுப்பிய கேள்விக்கு, நாங்கள் (அதிமுக) நிச்சயமாக எதிர்த்து வாக்களிப்போம் என்றார்.

நாடாளுமன்றத்தில் திரிணமூல் காங்கிரஸ் கட்சி கொண்டு வரும் நம்பிக்கையில்லாத் தீர்மானம் வெற்றி பெற்றால் அதை தாங்கள் வரவேற்போம் எனவும், அதனால் மத்தியில் தேர்தல் வந்தால் அதை எந்த நேரத்திலும் சந்திக்கத் தயாராக இருப்பதாகவும் முதல்வர் ஜெயலலிதா உறுதிபட தெரிவித்தார்.

மத்திய அரசுக்கு எதிராக நாடாளுமன்றத்தில் நம்பிக்கையில்லாத் தீர்மானம் கொண்டு வரப்பட்டால் அதிமுக அதை ஆதரிக்குமா என்ற கேள்விக்குப் பதிலளித்த முதல்வர், நம்பிக்கையில்லாத் தீர்மானம் கொண்டு வரப்பட்டால் அது வெற்றியடைய வேண்டும். ஆனால், இந்த விவகாரத்தில் ஆதரவு கேட்டு இதுவரை எங்களை யாரும் அணுகவில்லை. நம்பிக்கையில்லாத் தீர்மானம் கொண்டு வந்தால் அதை எத்தனை பேர் ஆதரிக்கிறார்கள், யாரெல்லாம் ஆதரிக்கிறார்கள் என்பதைப் பார்த்துவிட்டுத்தான் நாங்கள் (அதிமுக) முடிவு செய்வோம் என்றார்.

மத்திய அரசின் மிகப்பெரிய நாடகம்

இரண்டாம் தலைமுறை அலைக்கற்றை மறு ஏலம் என்பது காங்கிரஸ் தலைமையிலான மத்திய அரசு நடத்திய மிகப்பெரிய நாடகம் என்று முதல்வர் ஜெயலலிதா குற்றம்சாட்டினார்.

அண்மையில் 2ஜி அலைக்கற்றை ஏலம் குறைவான தொகைக்குத் போனதை வைத்து இந்த விவகாரத்தில் ஊழலே நடக்கவில்லையென்று பேசத் தொடங்கியிருக்கிறார்களே என்ற கேள்விக்கு முதல்வர் ஜெயலலிதா பதிலளிக்கையில், இது காங்கிரஸ் தலைமையிலான மத்திய அரசே நடத்திய ஒரு மிகப்பெரிய நாடகம் என்றார்.

காங்கிரஸ் கட்சியின் பிரதமர் வேட்பாளராக ராகுல் காந்தியை முன்னிலைப்படுத்தப் போவதாக பேசப்படுகிறதே என்ற கேள்விக்குப் பதிலளித்த முதல்வர் ஜெயலலிதா, பிரதமர் பதவிக்கான வேட்பாளராக யாரை முன்னிலைப்படுத்துவது என்பது பற்றிக் கூற அந்தக் கட்சிக்கு சுதந்திரமும், உரிமையும் உள்ளது என்றார்.

கரைட்டா! சொன்னிங்க சிவா...