14 ஆணிகள், 9 கத்திகள் உட்பட பல பொருட்களை : மூக்கில் நுழைத்து வாலிபர் சாதனை

கொல்லம்: தலையில் இருமுடி ஏந்தி, 24 மணி நேரத்தில், 150 கி.மீ., தூரம் ஓடி சாதனை படைத்த கேரள வாலிபர், தற்போது, ஒன்பது கத்திகள், 14 ஆணிகளை, தன் மூக்கில் நுழைத்து, மேலும் ஒரு சாதனை படைத்துள்ளார்.கேரளா, கொல்லம் மாவட்டம், முகத்தலாவைச் சேர்ந்தவர் சஜீஷ், 32. இவர் நேற்று முன் தினம், கொல்லம் பிரஸ் கிளப்பில், சாதனை ஒன்றை நிகழ்த்திக் காட்டினார்.முதலில், 4.5 அங்குல நீளமுள்ள கத்தியை, தன் மூக்கில், நுழைத்து, நிகழ்ச்சியை துவக்கினார். தொடர்ந்து, அதே அளவிலான, ஒன்பது கத்திகளை, ஒன்றன் பின், ஒன்றாக, நுழைத்து வெளியே எடுத்து, பார்வையாளர்களை வியக்க வைத்தார்.இதுமட்டுமின்றி, சுவர் துளைக்க பயன்படும், "டிரில்லிங் மிஷினை' இயக்கி, வேகமாக சுழன்று கொண்டிருந்த, அதன் துளைப்பானை (ஆணி போன்றது), தன் மூக்கில் நுழைத்தது, பலரையும் மீண்டும் வியக்க வைத்தார். இதைத் தொடர்ந்து, 4.5 மற்றும் 4 அங்குல நீளமுடைய, 14 ஆணிகளை, ஒன்றன் பின் ஒன்றாக, மூக்கின் இரு துவாரங்களிலும் மாற்றி, மாற்றி நுழைத்தார்.மூக்கில் நிறைய ஆணிகளை நுழைத்து, அவற்றை வெளியே எடுக்காமலேயே, அங்கிருந்த கரும்பலகையில், இடப்பக்கத்திலிருந்து வலப்பக்கமாகவும், வலப்பக்கத்திலிருந்து இடப்பக்கமாகவும் எழுதினார். அத்துடன், கத்திரிக்கோலையும், ஸ்க்ரூ டிரைவரையும் மூக்கினுள் நுழைத்தெடுத்தார். பலத்த கைத்தட்டலுக்கு இடையே நடத்தப்பட்ட இந்த சாதனை நிகழ்ச்சி, கின்னஸ் சாதனை புத்தகத்தில் இடம் பெறவுள்ளது.சஜீஷ், இதற்கு முன், 27 கி.மீ., தூரத்திற்கு, பின்னோக்கி ஓடி சாதனை படைத்தார். மேலும், முல்லை பெரியாறு அணையின் பாதுகாப்பை வலியுறுத்தி, தன் சொந்த ஊரான, முகத்தாலாவில் இருந்து, இரு முடி ஏந்தி, 24 மணிநேரத்தில், 150 கி.மீ., தூரத்தில் உள்ள, சபரிமலை வரை ஓடியும் சாதனை படைத்துள்ளார்.
தினமலர் .