போலி வெடிகுண்டை வைத்து இளம் பெண்ணை மிரட்டிய ஆஸ்திரேலியருக்கு 13 ஆண்டு சிறை

DERAR BABU · DERAR BABU Wed Nov 21, 2012 5:26 pm

சிட்னி;இளம் பெண்ணின் கழுத்தில், போலி வெடிகுண்டை வைத்து, 10 மணி நேரம் அச்சுறுத்தியவருக்கு, ஆஸ்திரேலிய கோர்ட், 13 ஆண்டு சிறை தண்டனை விதித்துள்ளது.
ஆஸ்திரேலியாவை சேர்ந்தவர் டக்ளஸ் பீட்டர்ஸ். கடந்த ஆண்டு ஆக., மாதம் மெடிலீன் புல்வர், 18, என்ற பெண்ணின் கழுத்தில், போலி வெடிகுண்டை மாட்டி, வெடிக்கச் செய்வதாக, 10 மணி நேரம் மிரட்டியுள்ளார்.இதனால், இந்த பெண், பயந்து நடுங்கினார். பின், போலீசார் விரைந்து வந்து மெடிலீனை விடுவித்தனர். இது தொடர்பாக வழக்கு பதிவு செய்யப்பட்டது.

அமெரிக்காவில், கென்டகி பகுதியில், தனது முன்னாள் மனைவியின் வீட்டில் ஒளிந்திருந்த டக்ளஸ், ஆஸ்திரேலியாவுக்கு அழைத்து வரப்பட்டு விசாரிக்கப்பட்டார்.இளம் பெண் கழுத்தில், போலி வெடிகுண்டை மாட்டி, அவரை மிரட்டியதை ஒப்புக்கொண்டார். மனைவி விவாகரத்து செய்ததால், மன வருத்தத்தில் இருந்த டக்ளஸ், அதிகப்படியாக மது அருந்தியதால், இந்த தவறை செய்ததாக, அவரது வழக்கறிஞர்கள் வாதாடினர்.டக்ளசின் இந்த நடவடிக்கையால், மெடிலீன் எந்த அளவு பயந்திருப்பார் என்பதை எங்களால் உணர முடிகிறது. எனவே, டக்ளஸ் மீது கருணை காட்டமுடியாது என, கூறிய நீதிபதி, அவருக்கு பதிமூன்றரை ஆண்டுகள் சிறை தண்டனை விதித்து தீர்ப்பு கூறினார். 10 ஆண்டுகளுக்கு அவர் பரோலில் வெளியே வரமுடியாத படி, தீர்ப்பு கூறியுள்ளார்