தடைகளும், வழிகளும்

எதிர்கால வாழ்வுக்கு திட்டமிடும்போது நமக்கு பல தடைகள் குறுக்கிடலாம். அவற்றை அறிந்து திருத்திக் கொண்டால் நமது திட்டம் வெற்றி பெறும்.

முனைப்பு இல்லாமை:

முனைப்புடன் செயல்பட்டால்தான் நிர்ணயித்த இலக்கை அடைய முடியும்.

"வெள்ளத்தனைய மலர்நீட்டம் மாந்தர் தம்
உள்ளத் தனைய உயர்வு''

என்று குறள் நெறி உணர்த்துகிறது. இதன் பொருள் அவரவரின் முனைப்பு என்பது உளப்பாங்கைப் பொறுத்தே அமையும் என்பதாகும்.

எனவே உள்ளத்தில் எவ்வளவு விரும்புகிறீர்களோ அதே அளவில் செயலிலும் முனைப்பை காட்டினால் உங்கள் திட்டம் நிறைவேறும்.

உற்சாகமின்றி செயல்படுதல்:

யதார்த்த நிலையில் முயற்சி மேற்கொள்ளாமல் விலகிச் செல்லுதல். எந்தவித ஈடுபாடும் காட்டாமல் நடைபிணம் போல் செயல்படுதல். இதுவும் ஒரு தடையே ஆகும். விரும்பி செயல்படுவதன் மூலம் இதையும் வெற்றி கொள்ளலாம்.

சோம்பேறித்தனம்:

நீங்கள் பல திறமைகளைக் கொண்டவராக இருக்கலாம். ஆனால் அந்தத் திறமைகளை திரைபோட்டு மறைப்பது போல சோம்பேறித்தனம் குடி கொண்டிருந்தால் உங்கள் கனவு வீணாகிவிடும். 'சோம்பித்திரிபவர் தேம்பித்திரிவர்' என்பது முதுமொழி. எனவே சோம்பலையும் விரட்டிவிடுங்கள்.

தள்ளிப்போடுதல்:

அன்று செய்ய வேண்டிய பணியை அன்றே செய்யாமல் நாளை பார்த்துக் கொள்ளலாம் என்று தள்ளிப் போடுதலும் தடையே ஆகும். தள்ளிப்போடுதல் என்பது செயலை செய்யாமல் தவிர்ப்பதே என்று பொருள் கொள்ளலாம். இதுவும் வெற்றியை பாதிக்கும் பெரும் காரணியாக இருப்பதால் தள்ளிப்போடும் செயலுக்கு தடைவிதியுங்கள்.

குடும்பச்சூழல்:

பாரம்பரியமாக செய்துவரும் குடும்பத்தொழிலை செய்ய வேண்டிய கட்டாயம் அல்லது மாற்று ஏற்பாடு செய்ய வேண்டிய தேவை நீங்கள் கொண்டுள்ள இலக்கிற்கு தடையாக இருக்கலாம். குடும்ப கவுரவத்தை பாதிக்கும் என்ற கருத்து மற்றும் போதிய வசதி இல்லாமை போன்றவையும் தடை களாக அமையலாம். இந்தநிலையில் நிதானமாக செயல்பட்டு, உங்கள் நலம் விரும்பிகளின் உதவியோடு இலக்கை அடையலாம்.

நண்பர்கள்:

நண்பர்கள் சேர்க்கையும் எதிர்கால வாழ்வை நிர்ணயிப்பதில் முக்கிய பங்கு வகிக்கின்றது. "உங்கள் நண்பர் யார்? என்று கூறுங்கள், நீங்கள் யார் என்று கூறுகின்றேன்'' என்று முதுமொழி உள்ளது. நல்ல நண்பர்கள் ஊக்கத்தை அளிக்கும் வகையில் உங்கள் திட்டத்துக்கு உறுதுணையாக செயல்படலாம். தகாத நண்பர் வட்டமும், போலி உறவு கொள்ளும் நட்பும் எதிர்மறை விளைவுகளை ஏற்படுத்தும். அவர்களை நீங்கள் எளிதில் அடையாளம் காண முடியும். அவர்கள், உங்களின் வெற்றிக்கு தடையாக மாறாமல் பார்த்துக் கொள்ளுங்கள்.

உறுதியே வெற்றி தரும்:
இவ்வாறு பல்வேறு தடைகள் மன அழுத்தத்தை ஏற்படுத்தலாம். அவற்றைக் கண்டு மனம் சோர்ந்துவிடாமல் நிதானமாக திட்டமிட்டு செயல்பட பழகிக் கொள்ள வேண்டும். மேலும் திட்டமிடுதல் என்பது காலமாற்றத்திற்கேற்ப மேற்கொள்ள வேண்டிய ஒரு தொடர் முயற்சியாகும். ஆகவே இயல்பாக திட்டமிட்டு வெற்றி கொள்ளுங்கள்.

மிக அருமை. இப்படி ஆக்கப் பூர்வமான தகவல் தர நினைப்பது யாழவனின் பெருங்குணம். நன்றி யாழவன்