தீபாவளி பண்டிகை கோலாகல கொண்டாட்டம் தமிழகம் முழுவதும் 1 லட்சம் போலீசார் பாதுகாப்பு

தீபாவளி பண்டிகையையட்டி, தமிழகம் முழுவதும் 1 லட்சம் போலீசார் பாதுகாப்பு பணிகளில் ஈடுபடுத்தப்படுகிறார்கள். சென்னையில் அதிரடிப்படை போலீசார் ரோந்து சுற்றிவர ஏற்பாடு செய்யப்பட்டுள்ளது.

கோலாகல கொண்டாட்டம்

நாடு முழுவதும் தீபாவளி பண்டிகை கோலாகலமாக கொண்டாடப்படுகிறது. தமிழகத்திலும் மக்கள் தீபாவளியை கொண்டாடுகிறார்கள். பொதுமக்கள் அவரவர் சொந்த ஊர்களில் தீபாவளியை கொண்டாட படையெடுத்துள்ளனர். பட்டாசு வெடிகள் நேற்றிலிருந்தே வானவெளியில் வண்ணஜாலம் காட்டத்தொடங்கிவிட்டன. தெருக்களில் மக்கள் குடும்பத்தோடு பட்டாசு கொளுத்தி மகிழ்ந்த காட்சியை நேற்று இரவே காண முடிந்தது.மக்களின் உற்சாக வெள்ளம் ஒருபுறம் இருக்க, விபத்து இல்லாமல் மக்கள் மகிழ்ச்சியாக தீபாவளியை கொண்டாட, தீயணைப்பு துறையும், போலீஸ் துறையும் இணைந்து பல்வேறு பாதுகாப்பு ஏற்பாடுகளை செய்துள்ளன.

1 லட்சம் போலீஸ் பாதுகாப்பு

போலீஸ் டி.ஜி.பி. ராமானுஜம் விபத்து இல்லாத தீபாவளியை மக்கள் மகிழ்ச்சியோடு கொண்டாட அனைத்து பாதுகாப்பு ஏற்பாடுகளையும் செய்திடுமாறு, மாவட்ட போலீஸ் சூப்பிரண்டுகளுக்கு அறிவுரை வழங்கி உள்ளார்.இதனால் தமிழகம் முழுவதும் 1 லட்சம் போலீசார் பாதுகாப்பு பணிகளில் ஈடுபடுத்தப்பட்டுள்ளனர். மக்கள் அதிகமாக கூடும் கோவில்களில் கூடுதல் பாதுகாப்பு போடப்பட்டுள்ளது.

அதிரடிப்படை

சென்னையிலும் கமிஷனர் ஜார்ஜ் உத்தரவின் பேரில், கூடுதல் கமிஷனர்கள் தாமரைக்கண்ணன், ராஜேஷ்தாஸ் ஆகியோர் மேற்பார்வையில் நேற்று இரவில் இருந்தே பாதுகாப்பு தீவிரப்படுத்தப்பட்டது. பட்டாசு தீ விபத்தினால் அசம்பாவிதம் ஏற்படாமல் தடுக்க தீயணைப்பு படையினருடன், அதிரடிப்படை போலீசாரும், ஆங்காங்கே ரோந்து பணியில் ஈடுபடுத்தப்பட்டனர்.மக்கள் தங்கள் உதவிக்கு 100 மற்றும் 101 டெலிபோன் எண்ணில் பேசினால், போலீசாரும், தீயணைப்பு வீரர்களும் மின்னல் வேகத்தில் பாய்ந்து வருவார்கள் என்று அறிவிக்கப்பட்டுள்ளது. உரிய விதிமுறைகளுக்குட்பட்டு, பட்டாசை வெடித்து, மக்கள் மகிழ்ச்சியோடு தீபாவளியை கொண்டாட, கமிஷனர் ஜார்ஜ் மற்றும் தீயணைப்புத்துறை இயக்குனர் போலாநாத் ஆகியோர் வாழ்த்து தெரிவித்துள்ளனர்.

பாவம் போலிஸ்காரங்களுக்கு தான் கொண்டாட முடியாம போச்சு