கிராம பஞ்சாயத்துகள் - ஆலமரத்தடி கோர்ட்டுகள்

“டிஸ்ட்ரிக்ட் கோர்ட், ஐகோர்ட், சுப்ரீம் கோர்ட் என்று எத்தனையோ கோர்ட்டுகள் இருந்தாலும் கிராமத்து மக்களுக்கு இன்னும் ஆலமரத்தடி பஞ்சாயத்துதான் கோர்ட். இங்கு வழங்கும் தீர்ப்புகளுக்கு அப்பீலே இல்லை.’

நம்ம கிராம பஞ்சாயத்துகளின் நடைமுறைகள் தான் என்ன? வழக்கு விசாரிக்கும் முறை எப்படி? என்று சில பஞ்சாயத்துப் பெரியவர்களிடம் பேசினோம்.

“கிராமத்துல சொந்த பந்தத்துல பிரச்னைன்னா, பஞ்சாயத்துப் பேசி முடிக்கும் போது வாதி, பிரதிவாதி ரெண்டு பேரும் ஆளுக்கு ஒரு ரூபாய்க்கு வெத்தல பாக்கு வாங்கிட்டு பஞ்சாயத்துப் பண்ணுவோம். அதை சபையில வச்சுட்டு, சமாதானம் பேசி முடிஞ்சு மனக்கசப்பு இல்லாம வெத்தல மாத்தி ராசி பண்ணுவோம்.

பஞ்சாயத்து வழக்குலே “சண்டி வழக்கு’ வரும். அது சாட்சியே இல்லாம, புடிக்காத நபர் மேல குற்றம் சாட்டி குறை சொல்லி வர்ற வழக்கு. ஒண்ணும் இல்லாத பிரச்னையை ஊர் பஞ்சாயத்துக்கு கொண்டு வர்றது.

அந்த பிரச்னையை சாட்சியோடு நிரூபிக்கலைன்னா சண்டி வழக்குக்கு தெண்டம் வாங்கிருவோம்.

வாதி, பிரதிவாதி, சாட்சிகள விசாரிக்கும் போது கூட்டத்துல இவங்க குத்தவச்சு உட்காரக்கூடாது. காலை மடக்கி, கையை முன்னாடி கட்டணும். பெறங்கை (பின்னாடி கைகட்றது) கட்டக்கூடாது. வேட்டியை இறக்கி விடணும். இது எல்லாம் அருவா, கத்தி வச்சிருக்காங்களான்னு செக் பண்றதுக்கு. பிரச்னையை தீர்த்து வைக்கிற வரைக்கும், பஞ்சாயத்துப் பேசுற யாரும், வாதி-பிரதிவாதி வீட்ல கை நனைக்க மாட்டோம்.

நீதி தவறாம மனசாட்சிக்கு விரோதம் இல்லாம, சொந்தம், பந்தம் பார்க்காம பஞ்சாயத்து பேசினாத்தான் குடம்பம் உருப்படும்ங்கிற நம்பிக்கை.

இன்னைக்கும் சபையில உட்கார்ந்து பல பழமொழிகள சொல்லி, பக்குவமா எடுத்துப் பேசி, நிறைய உதாரணங்களை எடுத்து கோளாறு சொல்லி அப்புறம் தான் பஞ்சாயத்து விவாதமே நடக்கும். அதுலயே, கடுங்கோபம், மனக்கசப்பு கொஞ்சம் மட்டுப்படும். அதுக்குத்தான் அந்த டெக்னிக்.

எதையுமே நேர்மைக்காக, அடுத்தவன் சொத்துக்கு ஆசைப்படாம விட்டுக்கொடுத்துப் போனாலே, எந்த வம்பும் தும்பும் கிடையாது. வரவும் வராது.’

என பஞ்சாயத்து முறைகளைச் சொல்லி முடித்தனர், பஞ்சாயத்து கிராமப் பெரியவர்கள்.

- அரண்மனை சுப்பு.

முக்கியமா சொம்ப விட்டுட்டீங்களே பாஸ்

நன்றி

இந்த கோர்ட்டுல மட்டும் ஏன் வழக்கு நிலுவையில இல்ல?

இப்பொழுது தமிழகத்தில் கட்டப் பஞ்சாயத்து தடை செய்யப்பட்டுள்ளது. கிராமங்களில் இதுபோன்று கூடினால் அவர்களைக் கைது செய்ய சட்டம் வழிவகுக்கிறது. எனவே நாட்டாமை சொம்பும், அரசமரமும் வெறிச்சோடிக் கிடக்கிறது!

கிராமத்தில் கள்ளம் கபடு இல்லாத வெள்ளை உள்ளங்கள் இருந்தன , அதனால் நீதி நியாயம் போன்றவை எல்லோருக்கும் சமமாக இருந்தது. இப்போ அனைத்து இடங்களிலும் ரவுடியிசம் தான் ஆட்சி செய்கிறது.

பஞ்சாயத்து என்பது கட்டை பஞ்சாயத்து என்று ஆகிவிட்டது

இதிலிருந்துதான் மற்றவையெல்லாம் உருவாக்கி இருக்கும்.