சென்னை கிங்ஸ் "திரில்' வெற்றி *மும்பை அணி பரிதாபம்!!

ஜோகனஸ்பர்க்: மும்பை அணிக்கு எதிரான சாம்பியன்ஸ் லீக் போட்டியில், சென்னை சூப்பர் கிங்ஸ் அணி, 6 ரன்கள் வித்தியாசத்தில் "திரில்' வெற்றி பெற்றது. தினேஷ் கார்த்திக், போலார்டின் கடைசிநேர போராட்டம் வீணானது.
தென் ஆப்ரிக்காவில் நான்காவது சாம்பியன்ஸ் லீக் "டுவென்டி-20' தொடர் நடக்கிறது. இதன் "பி' பிரிவு போட்டியில் நேற்று, ஏற்கனவே அரையிறுதி வாய்ப்பை இழந்துவிட்ட சென்னை சூப்பர் கிங்ஸ், மும்பை இந்தியன்ஸ் அணிகள் மோதின. "டாஸ்' வென்ற மும்பை அணி கேப்டன் ஹர்பஜன் சிங், "பீல்டிங்' தேர்வு செய்தார்.
"ஜெட்' வேகம்:
சென்னை அணிக்கு டுபிளசி, முரளிவிஜய் இணைந்து "ஜெட்' வேகத்தில் துவக்கம் கொடுத்தனர். ஓஜா பந்தில் முரளிவிஜய் முதலில் ஒரு சிக்சர் அடித்தார். ஜான்சன் ஓவரில் ஒரு சிக்சர், 2 பவுண்டரி என தொடர்ந்து விளாசினார் டுபிளசி. பின், மலிங்கா ஓவரிலும் 3 பவுண்டரி பறக்க விட, 4.1 வது ஓவரில் சென்னை அணி 50 ரன்களை கடந்தது.
குல்கர்னி ஓவரில் முரளிவிஜய், ஒரு சிக்சர், 2 பவுண்டரி அடித்தார். முதல் விக்கெட்டுக்கு 8 ஓவரில் 86 ரன்கள் சேர்த்த போது, முரளிவிஜய் (39) அவுட்டானார். ஹர்பஜன் பந்தில் டுபிளசி ஒரு பவுண்டரி விளாச, சென்னை அணி 10 ஓவரில் 100 ரன்களை எட்டியது.
திடீர் சரிவு:
இதன் பின் எல்லாம் தலைகீழானது. மலிங்காவின் அடுத்தடுத்த பந்துகளில் அரைசதம் அடித்த டுபிளசி (52), ரெய்னா (8) வெளியேறினர். பத்ரிநாத், 10 பந்துகளில் 2 ரன்கள் எடுத்தார். ஸ்மித், மலிங்கா ஓவரில் தலா ஒரு சிக்சர், பவுண்டரி அடித்த கேப்டன் தோனி, 35 ரன்களுக்கு (19 பந்து) திரும்பினார். ஆல்பி மார்கல் "டக்' அவுட் ஆனார்.
சகா (5), ரவிந்திர ஜடேஜா (12) ஏமாற்றினர். சென்னை அணி 20 ஓவரில், 8 விக்கெட்டுக்கு 173 ரன்கள் எடுத்தது. அஷ்வின் (13) அவுட்டாகாமல் இருந்தார். மும்பை அணி சார்பில் மலிங்கா 5 விக்கெட் கைப்பற்றினார்.
சச்சின் மோசம்:
கடின இலக்கை துரத்திய மும்பை அணிக்கு சச்சின் (2) வழக்கம் போல விரைவில் அவுட்டாகி அதிர்ச்சி தந்தார். ஸ்மித் (13) இம்முறை நிலைக்கவில்லை. அடுத்து இணைந்த ரோகித் சர்மா, தினேஷ் கார்த்திக் இருவரும் அதிரடியாக ரன்கள் சேர்த்தனர். மார்கல், ஜடேஜா பந்துகளை ரோகித் சர்மா சிக்சருக்கு விரட்டினார்.
கார்த்திக் அரைசதம்:
மறுமுனையில் தினேஷ் கார்த்திக், ஜடேஜா ஓவரில் அடுத்தடுத்து இரண்டு சிக்சர், பவுண்டரி அடித்தனர். இந்த ஜோடி 7.2 ஓவரில் 64 ரன்கள் சேர்த்த போது, ரோகித் சர்மாவை (32) வெளியேற்றினார் மார்கல். அஷ்வின் ஓவரில் அடுத்தடுத்து பவுண்டரி, சிக்சர் அடித்த தினேஷ் கார்த்திக், அரைசதம் கடந்தார்.
கடைசி நேரத்தில் எழுச்சி பெற்ற போலார்டு, அஷ்வின் ஓவரில் 3 சிக்சர், ஒரு பவுண்டரி <உட்பட 24 ரன்கள் விளாச, போட்டியில் "டென்ஷன்' எகிறியது. 45 பந்தில் 74 ரன்கள் எடுத்து தினேஷ் கார்த்திக் அவுட்டாக, மும்பை அணியின் வெற்றிக்கு, கடைசி ஓவரில் 19 ரன்கள் தேவைப்பட்டன.
ரெய்னா அபாரம்:
ஜடேஜா வீசிய முதல் பந்தில், போலார்டு சிக்சர் அடித்தார். அடுத்த பந்தில் ரெய்னாவின் "சூப்பர்' கேட்சில் போலார்டு (31) அவுட்டானார். 3, 4வது பந்தில், ஒரு பவுண்டரி உட்பட 6 ரன்கள் எடுத்தார் ஹர்பஜன். 5வது பந்தில் ஹர்பஜன் (6), சகாவிடம் சிக்கினார். மும்பை அணி 20 ஓவரில் 7 விக்கெட்டுக்கு 167 ரன்கள் எடுத்தது. சென்னை அணி 6 ரன்கள் வித்தியாசத்தில் "திரில்' வெற்றிபெற்றது.

வெளியேறுகின்றன சென்னை, மும்பை
நேற்று யார்க்ஷயர் அணிக்கு எதிரான வெற்றியின் மூலம், லயன்ஸ் அணி மொத்தம் 12 புள்ளிகள் பெற்று, "பி' பிரிவில் இருந்து இரண்டாவது அணியாக அரையிறுதிக்கு முன்னேறியது. ஏற்கனவே இப்பிரிவில் சிட்னி சிக்சர்ஸ் (12 புள்ளி) அரையிறுதிக்கு தகுதிபெற்றது. இதனால் சென்னை, மும்பை, யார்க்ஷயர் அணிகள் அரையிறுதி வாய்ப்பை இழந்து வெளியேறுகின்றன.

தினமலர்

பயனற்ற வெற்றி.... பாவம் சென்னை கிங்ஸ்