பெண்களைப் பெரிதும் பாதிக்கும் 10 வியாதிகள்

ஒவ்வொரு குடும்பத்தின் அச்சாணியாகத் திகழ்பவர்கள் பெண்களே. எனவே அவர்கள் தங்களுக்காகவும், தமது குடும்பத்துக்காகவும் தம் உடல்நலத்தைப் பேண வேண்டும்.

பெண்களைப் பெரிதும் பாதிக்கும் 10 வியாதிகள் இவை என்று மருத்துவ நிபுணர்கள் பட்டியலிடுகிறார்கள்...

1.மார்பகப் புற்றுநோய்

இரவு ஷிப்ட்களில் பணிபுரியும் பெண்களுக்கு மற்ற பெண்களைவிட மார்பகப் புற்றுநோய் ஏற்படும் அபாயம் நான்கு மடங்கு அதிகம் என்கிறார்கள் ஆய்வாளர்கள். இரவில் பணிபுரிவது, உடல் கடிகாரத்தை திரும்பிச் சுழலச் செய்கிறது. அது, உடலில் மெலட்டோனின் ஹார்மோன் அளவை மாற்றுகிறது, மார்பக செல் வளர்ச்சிக்கான ஹார்மோன்களை பாதிக்கிறது.

2. உடல் பருமன்

உட்கார்ந்தே வேலை செய்யும் பெண்களுக்கு உடல்பருமன் கூடும்போது, அது சர்க்கரை நோய், மனஅழுத்தம், மூட்டுப் பிரச்சினைகள், பாலிசிஸ்டிக் ஒவேரியன் டிசீஸ் போன்ற வேறு சில வியாதிகளை அழைத்து வந்துவிடுகிறது. விளம்பரங்களில் கூறப்படுவதைப் போல, உடல் பருமனைக் குறைக்க குறுக்கு வழிகள் எல்லாம் கிடையாது. ஆரோக்கியமான உணவுமுறையும், நடை, நீச்சல், சைக்கிள் ஓட்டுதல் போன்ற பயிற்சிகளும்தான் உதவும்.

3. தூக்கமின்மை

சீரற்ற ஷிப்ட்கள், இரவில் வெகு நேரம் கண்விழித்துப் பணிபுரிவது, கணினியில் பணிபுரிவது போன்றவை அதிக மனஅழுத் தத்தை ஏற்படுத்தி, பெண்களின் தூக்கத்தைத் துரத்தி விடுகின்றன. தியானமும், இரவில் படுக்கப் போகும் முன் மிதமான சூட்டில் பால் அருந்துவதும் இன்சோம்னியாவுக்கு (தூக்கமின்மை) தீர்வாக அமையும்.

4. Cervical spondylosis

கழுத்தை ஒட்டிய தண்டுவடத்தைப் பாதிக்கும் இந்த வியாதி, ஒழுங்காக அமராதது போன்றவற்றால் ஏற்படுகிறது. இதில், தசைகள் இறுக்கமாகி, கழுத்துத் தண்டுவடம் பாதிக்கப்படுகிறது. தோள்பட்டை மற்றும் கழுத்துக்கு உரிய பயிற்சிகள் செய்வதன் மூலம் தசைகள் தளர்வ டையும், வலி விடைகொடுக்கும்.

5. Endometriosis

பணிபுரியும் பெண்கள் வியாதி என்று கூறப்படும் இந்நோய், மிகவும் நெருக்கடியான வாழ்க்கைமுறையில் உள்ள பெண்களைப் பாதிக்கிறது. இதில் கர்ப்பப் பை அடுக்கில் உள்ள திசுக்கள், உடம்பின் பிற பாகங்களுக்கு இடம்பெயர்கின்றன.

6. Polycystic Ovarian Syndrome

ஹார்மோன் சமச்சீரற்ற நிலையால் ஏற்படும் பாதிப்பு இது. மகப்பேறை பாதிக்கக்கூடிய இவ்வியாதிக்கு அறுவைச்சிகிச்சை தேவைப்படலாம். எடைக் குறைப்பு, மருந்துகள் மூலம் இன்சுலின் எதிர்ப்பைக் குறைப்பது, அன்றாட உடற்பயிற்சி மூலமும் பி.சி.ஓ.டி.யில் இருந்து குணம் பெறலாம்.

7. Hypothyroidism

உடலியல் செயல்பாடுகளுக்கு (மெட்டபாலிசம்) முக்கியமான தைராய்டு ஹார்மோனை தைராய்டு சுரப்பி குறைவாகச் சுரக்கும் போது ஹைப்போதைராய்டிசம் ஏற்படுகிறது. சோர்வு, மனஅழுத்தம், உடல் எடை கூடுவது, குளிர் தாங்காமை போன்றவை ஹைப்போதைராய்டிசத்தின் அறிகுறிகள்.

8. முதுகுவலி

நீண்ட நேரம் அமர்ந்து பணிபுரியும் பெண்களுக்கு விடாது துன்புறுத்தும் முதுகுவலியும், சோர்வும் ஏற்படுகின்றன. சுறுசுறுப்பான செயல்பாடுகள், சமச்சீரான உணவு ஆகியவை முதுகுவலியையும், சோர்வையும் கட்டுப்பாட்டில் வைக்கும்.

9. முடி உதிர்வு

உடல்ரீதியான, உணர்வுரீதியான நெருக்கடி முடி வளர்ச்சியைப் பாதிக்கிறது. பலவீனமடையும் அவை, முடி வாரும்போது எளிதில் உதிர்ந்துவிடுகின்றன. சத்தான உணவு, தலைக்கேச வளர்ச்சியை ஊக்குவிக்கும்.

10. மன அழுத்தம்

எதிர்பார்ப்புக்கு ஏற்ப செயல்பட முடியாமை, குறிப்பிட்ட டெட் லைனுக்குள் வேலையை முடிக்க இயலாமல் போவது, வீட்டு வேலைகளால் ஏற்படும் நெருக்கடி போன்றவை ஒன்று சேர்ந்து பெண்களுக்கு விரக்தியை ஏற்படுத்தி, மனஅழுத்தத்துக்கு வித்திடுகின்றன.

தினத்தந்தி

மிகச் சரியானவை அறிவுறுத்தலுக்கு நன்றி

பெண்களே கவனமாக இருந்துகொள்ளுங்கள்.

அவசியமான அறிவான கட்டுரை அண்ணா