ஒபாமாவின் சரித்திர ட்வீட்டும் சமூக வலைத்தளங்களின் தாக்கமும்!

by **சிவா** Wed Nov 07, 2012 4:59 pm

நாம் வாழ்ந்துகொண்டிருப்பது 'சமூக வலைத்தள யுகம்' என்பது இன்று மீண்டும் ஆதாரப்பூர்வமாக நிரூபிக்கப்பட்டுள்ளது.

அமெரிக்க அதிபர் தேர்தலுக்கான அறிவிப்பு வெளியானதில் தொடங்கி டிவிட்டர், ஃபேஸ்புக் உள்ளிட்ட சமூக வலைத்தளங்கள் விவாதங்களும் பிரசாரங்களும் சூடுபிடிக்கத் தொடங்கின.

தனது பிரசாரத்துக்குக் கைகொடுத்த மிக முக்கிய பங்களிப்பாகவே சமூக வலைத்தளங்களைக் கருதிச் செயல்பட்டு வருகிறார், பராக் ஒபாமா. இது, தனது வெற்றித் தருணத்தை முதலில் பகிர்ந்துகொண்ட விதத்தில் இருந்தே வெளிப்பட்டது.

ஆம், இன்று அமெரிக்க அதிபர் தேர்தல் முடிவுகள் வெளியாகிக் கொண்டிருந்த நேரத்தில், வெற்றி உறுதி என்ற தகவல் தெரிந்தவுடன் ஒபாமா மக்களுக்கு நன்றி சொல்லப் பயன்படுத்திய தளம்... டிவி பேட்டி, பத்திரிகை அறிக்கை போன்றவை அல்ல; ட்விட்டர், ஃபேஸ்புக் சமூக வலைத்தளங்கள்தான்.

முதலில் ட்விட்டரில் 'உங்களால்தான் இது சாத்தியமானது. உங்களுக்கு நன்றி' என்று ட்வீட் செய்தார். அந்த ட்வீட் அடுத்த சில நிமிடங்களில் 2 லட்சம் ஃபாலோயர்களால் ரீட்வீட் செய்யப்பட்டது.

அதோடு முடியவில்லை. அமெரிக்காவின் 44வது அதிபராக தான் தேர்ந்தெடுக்கப்பட்டதும், ''மேலும் நான்கு ஆண்டுகள்'' என்று குறிப்பிட்டு, மனைவி மிஷேலைக் கட்டித் தழுவியபடி ஒரு புகைப்படத்தை ட்வீட் செய்தார். அது, இந்திய நேரம் மாலை 3.30 மணி நிலவரப்படி 5.5 லட்சம் முறை ரீட்வீட் செய்யப்பட்டது.

அந்த ட்வீட்தான் உலக அளவில் அதிக எண்ணிக்கையிலான ஃபாலோயர்களால் பகிரப்பட்ட ட்வீட் என்ற புதிய சரித்திர சாதனையை நிகழ்த்தி இருக்கிறது என்று தனது செய்திக் குறிப்பு ஒன்றில் ட்விட்டர் தெரிவித்தது. இதற்கு முன் இந்தச் சாதனையை வசப்படுத்தி இருந்தவர், அமெரிக்காவின் இளம் பாப் இசைப் பாடகர் ஜஸ்டின் பீபர்.

இதேபோல், ஒபாமா தனது ஃபேஸ்புக் பக்கத்தில் பகிர்ந்துகொண்ட மகிழ்ச்சித் தகவலும் லைக்குகளாலும் ஷேர்களாலும் மூழ்கியது.

விஷயம் இதுமட்டும் இல்லை. அமெரிக்க அரசியல் வரலாற்றில் தேர்தல் தொடர்பாக ஒரே நாளில் 3 கோடியே 10 லட்சம் ட்வீட்கள் பறந்ததும் இப்போதுதான். சராசரியாக, நிமிடத்துக்கு 3,27,452 ட்வீட்கள் (குறுந்தகவல்கள்) பகிரப்பட்டுள்ளன.

2008 தேர்தலின்போது, இணையப் பிரசாரத்தின் வீரியத்தை உலகுக்கு உணர்த்தினார் ஒபாமா. அதன் தாக்கத்தைப் புரிந்துகொண்ட குடியரசு கட்சியின் வேட்பாளர் ரோம்னி சமூக வலைத்தளங்களுக்கு அதிக நேரம் ஒதுக்கியது கவனத்துக்கு உரியது.

தலைவர்கள் நேரடியாக மக்களைச் சென்றடைவதற்கு இணையத்தைப் போன்ற சக்திவாய்ந்த ஊடகம் எதுவும் இல்லை என்பதையே ஒபாமாவின் அணுகுமுறையும் வெற்றியும் பறைசாற்றி இருக்கிறது.

மேலும், சமூக வலைத்தளங்களில் அமெரிக்க இணையவாசிகள் மேற்கொண்ட விவாதங்கள், கருத்துப் பகிர்வுகள் முதலானவை ஒபாமாவை மீண்டும் தேர்ந்தெடுக்கலாமா? வேண்டாமா? என்ற மக்களின் குழப்பத்தை நீக்குவது பெரும் துணைபுரிந்திருக்கக் கூடும்.

இணையம் சார்ந்த தொழில்நுட்பத்தில் இந்தியர்கள் அதிக கவனம் செலுத்தத் தொடங்கியுள்ளச் சூழலில், இன்றைய அமெரிக்க அரசியல் நிகழ்வுகள் சுட்டிக்காட்டுவது என்ன?

‘இந்திய அரசியலில் மாற்றங்களை உண்டாக்குவதில் இணையவாசிகளுக்கு மிக முக்கியப் பங்குண்டு’ என்ற வாக்கியம் மெய்ப்படுவதற்கான காலம் வெகுதொலைவில் இல்லை என்பதே அது.

- சரா @ விகடன்