இன்ஸ்பெக்டர், எஸ்.ஐ.,க்கள் துப்பாக்கி எடுத்துச் செல்ல தடை: போலீசார் அதிர்ச்சி

சேலம்: "தமிழக போலீஸில் பணியாற்றும், இன்ஸ்பெக்டர்கள், எஸ்.ஐ.,க்கள், உயர் அதிகாரிகளின் அனுமதி இன்றி, துப்பாக்கி எடுத்துச் செல்லக் கூடாது' என, வாய்மொழி உத்தரவு பிறப்பிக்கப்பட்டுள்ளது.

தமிழகம் முழுவதும், ஒரு லட்சத்து, 13 ஆயிரத்து, 629 போலீஸார், 1,432 போலீஸ் ஸ்டேஷன்களில் பணியாற்றுகின்றனர். தமிழக மக்கள் தொகையில், 635 பேருக்கு ஒரு போலீஸ் என்ற விகிதாச்சார அடிப்படையில் போலீசார் உள்ளனர்.போலீஸ் துறையில் பணியில் உள்ள, 3,250க்கும் மேற்பட்ட இன்ஸ்பெக்டர்கள், 4,600 எஸ்.ஐ.,க்கள் ஆகியோருக்கு துப்பாக்கி (ரிவால்வர்) வழங்கப்பட்டுள்ளது. இதை அவர்கள் வெளியில் பாதுகாப்புக்கு செல்லும் நிலையிலும், குற்றங்களை தடுத்தல், குற்றவாளிகளை கைது செய்யும் நிலையில் தொடர்ந்து கையில் வைத்திருக்க வேண்டும்.

ஆனால், இவர்கள் தங்களுக்கு வழங்கப்பட்டுள்ள, ரிவால்வாரை எடுத்துச் செல்வது என்பது குறைந்து வருகிறது. இதற்கு உயர்அதிகாரிகள் தான் காரணம் எனக் கூறப்படுகிறது. உயர்அதிகாரிகளின் அனுமதி இன்றி, இன்ஸ்பெக்டர்கள், எஸ்.ஐ.,க்கள் துப்பாக்கியை எடுத்துச் செல்லக் கூடாது என, வாய்மொழி உத்தரவு பிறப்பிக்கப்பட்டு இருப்பதாக, போலீஸ் வட்டார தகவல்கள் தெரிவிக்கின்றன.

கடந்த அக்டோபர், 27ம் தேதி, சிவகங்கை மாவட்டம், காளையார்கோவிலில், மருதுபாண்டியர் குருபூஜை பாதுகாப்புக்கு சென்ற, எஸ்.ஐ., ஆல்பின்சுதன், போலீசார் சிவக்குமார், கர்ணன் ஆகியோர் ரவுடிகளின் தாக்குதலுக்கு உள்ளாகி, கத்தியால் குத்தப்பட்டனர். இதில், எஸ்.ஐ., ஆல்பின்சுதன் பரிதாபமாக பலியானார். காயம் அடைந்த போலீஸாருக்கு சிகிச்சை அளிக்கப்பட்டு வருகிறது.
பலியான எஸ்.ஐ., ஆல்பின்சுதன் தனக்கு வழங்கப்பட்ட துப்பாக்கியை (ரிவால்வாரை) உடன் எடுத்துச் செல்லாததால் தான், தாக்கப்பட்டதும் தெரிய வந்தது. இந்த சம்பவத்துக்கு பின்னர், பாதுகாப்பு பணிக்கு செல்லும் போதும், குற்றவாளிகளை கைது செய்ய செல்லும் போதும், எஸ்.ஐ., இன்ஸ்பெக்டர் அந்தஸ்திலான அதிகாரிகள், தங்களுடன் துப்பாக்கிகளை எடுத்துச் செல்ல வேண்டும் என்ற உத்தரவை அரசு பிறப்பிக்க வில்லை.

இதன் காரணமாக தற்போதும் பல, எஸ்.ஐ.,க்கள், இன்ஸ்பெக்டர்கள் தங்களுடன் துப்பாக்கியை எடுத்துச் செல்வதை தவிர்த்து வருகின்றனர். இதனால், பெரும் அசம்பாவிதம் ஏற்பட வாய்ப்புள்ளதாகவும், இந்த பிரச்சனையில் முதல்வர் தலையிட்டு, உயர் அதிகாரிகளுக்கு உரிய உத்தரவுகளை பிறப்பிக்க வேண்டும் என்ற கோரிக்கை எழுந்துள்ளது.

டி.எஸ்.பி., ஒருவர் கூறியதாவது:எஸ்.பி., அந்தஸ்திலான அதிகாரிகளின் பாதுகாப்புக்கு போலீசார் நியமிக்கப்படுவதால், அவர்கள் எப்போதும் துப்பாக்கி வைத்திருப்பதால், அவர்களுக்கு எவ்வித பிரச்சனையும் ஏற்படுவது இல்லை. ஆனால், எஸ்.ஐ., இன்ஸ்பெக்டர்கள் அந்தஸ்திலான அதிகாரிகளுக்கு தான் பிரச்சனை ஏற்பட வாய்ப்பு உள்ளது.எனவே, தமிழக அரசு, சிவகங்கை சம்பவத்தை முன் உதாரணமாக கொண்டு, பணியில் இருக்கும் போது, எஸ்.ஐ., இன்ஸ்பெக்டர்கள் தங்களுக்கு வழங்கப்பட்டுள்ள துப்பாக்கிகளை (ரிவால்வாரை) கட்டாயம் எடுத்துச் செல்ல வேண்டும் என உத்தரவு பிறப்பிக்க வேண்டும் என்றார்.

தினமலர்

இது கொடுமை ....

போலீசாரே ரேவுடிகளின் தாக்குதலில் கொல்லபட்டிருக்கிறார் என்றால் அப்ப சாதாரண பொதுமக்களின் கதி. இவர்களை கண்டு இடத்தில் என்கவுண்டர் போடவேண்டும். அதற்கு கண்டிப்பாக காவலர்களிடம் அதற்குண்டான ஆயுதங்கள் கையில் இருக்க வேண்டும்

போர்க்களத்தில் எவ்வித ஆயுதமும் இல்லாத போர் வீரன் அனைத்து திறமைகள் இருந்தும் போர்க்களத்தில் வெற்றி பெறுவது என்பது கேள்விக்குறியான நிலை தான்.அனைத்து உயிர்களும் பாதுகாக்கும் காவலருக்கே பாதுகாப்பு இல்லாத நிலை நாட்டின் பாதுகாப்பிற்கு அச்சத்தை ஏற்படுத்தக் கூடியது