அபுதாபியில் கேரளாவை சேர்ந்த டாக்டர், கழுத்தை அறுத்து கொடூர கொலை

**சிவா** · **சிவா** Wed 7 Nov 2012 - 16:52

கேரள மாநிலம், திருவனந்தபுரத்தை சேர்ந்தவர், டாக்டர் ராஜன் டேனியல் (வயது 54). கடந்த 5 ஆண்டுகளாக, அபுதாபியில் உள்ள தனியார் ஆஸ்பத்திரியில் அவர் பணிபுரிந்து வருகிறார். அவர் ஆஸ்பத்திரியில் நோயாளிகளுக்கு சிகிச்சை அளித்துக் கொண்டு இருந்தபோது, மர்ம மனிதன் ஒருவன் அவருடைய அறைக்குள் பாய்ந்து சென்றான். ஊழியர்கள் தடுத்தும், அவர்களைப் பிடித்து தள்ளிவிட்டு, டாக்டர் ராஜன் டேனியலின் கழுத்தை ஆட்டை அறுப்பது போல் கத்தியால் அறுத்தார். இதனால் அந்த இடத்திலேயே அவர் துடிதுடித்து இறந்தார். பின்னர் போலீசார் வரும் வரை அங்கேயே காத்திருந்த கொலையாளி, போலீசாரிடம் சரண் அடைந்தான்.

விசாரணையில், டாக்டரை கொலை செய்தவன், பாகிஸ்தானை சேர்ந்தவன் என்று தெரிய வந்தது. அவனுடைய உறவினர் ஒருவர் அதே ஆஸ்பத்திரியில் சிகிச்சை பயனின்றி இறந்ததால் ஆத்திரம் அடைந்து டாக்டரை கொலை செய்ததாக அவன் வாக்குமூலம் அளித்து இருப்பதாக தெரிகிறது. பலியான டாக்டர் ராஜன் டேனியல், மனைவி கீதா ஜார்ஜ், ஒரே மகள் ஜுனு ஆகியோருடன் அபுதாபியில் வசித்து வந்தார். மனைவி, மகள் இருவரும் கணவரின் உடலைப் பார்த்து கதறி அழுதது நெஞ்சை உருக்குவதாக இருந்தது.

தினத்தந்தி