தடையை மீறி இயங்கும் சாய பட்டறைகள்

ஈரோடு: ஈரோடு மாவட்டத்தில், மூடி, சீல் வைக்கப்பட்ட சாயப்பட்டறைகள், தீபாவளி உற்பத்திக்காக சத்தமின்றி இயங்கி வருகின்றன.ஈரோடு மாவட்டம் தோல் மற்றும் ஜவுளி உற்பத்தியில் முன்னோடியாக திகழ்கிறது.பள்ளிபாளையம், ஓட்டமெத்தை, வைராபாளையம், கருங்கல்பாளையம் உள்ளிட்ட பல பகுதிகளில், சாயப்பட்டறைகள், தோல் தொழிற்சாலைகள் உள்ளன.ஈரோட்டில் இயங்கிய, சாயப்பட்டறை, தோல் தொழிற்சாலையில் இருந்து ஒரு வினாடிக்கு, 125 கன அடி சாய கழிவுநீர், காவிரி மற்றும் காளிங்கராயன் வாய்க்காலில் கலக்கிறது.

விவசாய நிலங்கள் விஷமாக மாறுவதாக எழுந்த புகாரால், ஈரோடு மாவட்டத்தில் இயங்கிய, 500க்கும் மேற்பட்ட சாயப்பட்டறைகள் மற்றும் தோல் தொழிற்சாலைகளை அதிகாரிகள் சீல் வைத்தனர். பல சாயப்பட்டறைகள், இடித்து தள்ளப்பட்டன.தீபாவளிக்காக, "கவனிப்பை' பெறும் அதிகாரிகளால், நசியனூர், கனிராவுத்தர்குளம், நரிப்பள்ளம், தண்ணீர்பந்தல்பாளையம், சொட்டையம்பாளையம் பகுதிகளில், மீண்டும் சாயப்பட்டறைகள் முழு அளவில் இயங்கி வருகின்றன.இப்பகுதியில், 50க்கும் மேற்பட்ட சலவை பட்டறைகள், சாயப்பட்டறைகளாக மாறி உள்ளன.வரும், 13ல் தீபாவளி வருவதால், ஜவுளி வகைகளுக்கு கடும் கிராக்கி ஏற்பட்டுள்ளது. ஈரோட்டில், இரவு, பகலாக சாயமேற்றும் பணிகள் ஜரூராக நடக்கின்றன.தடையை மீறி செயல்படும் சாயப்பட்டறைகளில் இருந்து, வெளியேறும் சாயக்கழிவு நீர், கனிராவுத்தர் குளம் துவங்கி, சுண்ணாம்புக்கார ஓடை, பி.பி. அக்ரஹாரம், காளிங்கராயன் வாய்க்கால் வழியாக, காவிரி ஆற்றில் கலக்கிறது.

காவிரி ஆற்றில் இருந்து, பம்பிங் ஸ்டேஷன் மூலம், வீரப்பன்சத்திரம், சூரம்பட்டி நகராட்சி பகுதி மக்களுக்கு குடிநீர் வினியோகம் செய்யப்பட்டு வருகிறது. தீபாவளிக்காக சத்தமின்றி இயங்கும், சாயப்பட்டறைகளால், காவிரியாறும், சாயக்கழிவு நீராக மாறுவதால் பொதுமக்கள் அதிருப்தியில் உள்ளனர்.ஈரோடு மாவட்ட அனைத்து தொழில் வணிக சங்கங்களின் கூட்டமைப்பின் தலைவர் சிவனேசன் கூறியதாவது: ஈரோடு மாவட்டத்தில் கைத்தறி, விசைத்தறி மூலம் தயாரிக்கப்படும் நூல்கள், துணிகள் அனைத்தையும் பதப்படுத்த, 1,570க்கும் மேற்பட்ட பிளிச்சிங், சாயம், பிரிண்டிங், காலண்டரிங் நிறுவனங்கள் இயங்கின. பதப்படுத்தும் பணிஇதன் மூலம் துணிகளுக்கு வண்ணம் ஏற்றி, பதப்படுத்தும் பணி, குறைந்தது, ஏழு முதல், 10 நாளில் முடிக்கப்படும்.தற்போது, சாயகழிவு நீர் பிரச்னை, சாயப்பட்டறைகள் இடிப்பால், 91 சாயப்பட்டறைகள் மட்டுமே, சுத்திகரிப்பு கலன் அமைத்து செயல்படுகின்றன.இதனால், இதர நிறுவனங்கள் காடா துணி தயாரித்து, அதில் வண்ணம் ஏற்ற, கோல்கட்டா, சூரத், ஐதராபாத் ஆகிய மாநிலங்களுக்கு அனுப்புகின்றன. இங்கிருந்து அனுப்பப்படும் துணிகள், திரும்பவும் ஈரோடு வர, ஒரு மாதகாலம் ஆகிறது.இதனால் ஆண்டுக்கு, 3,000 கோடி ரூபாய் அளவிற்கு இருந்த துணி ஏற்றுமதி, தற்போது, 300 கோடி ரூபாயாக குறைந்துஉள்ளது.

தீபாவளி சீசனில் ஜவுளிகளுக்கு தேவை அதிகம் உள்ளது. மின் வெட்டையும் பொருட்படுத்தாமல், சிறு, குறு நிறுவனங்கள் பண்டிகையை யொட்டி, தயாரிக்கப்பட்ட துணிகளை, வண்ணம் ஏற்ற, வெளிமாநிலங்களுக்கு அனுப்பி வைக்கின்றன.தீபாவளிக்கு இன்னும், ஒரு வாரமே உள்ள நிலையில், பண்டிகைக்குள் துணிகள் வந்து சேர சாத்தியமில்லை. இந்த துணிகள் அடுத்து வரும் பண்டிகைக்கு தான் விற்பனை செய்ய முடியும். இதனால், 500 கோடி ரூபாய் வரை உற்பத்தியாளர்களுக்கு இழப்பு நேரிடும். இதனால், பல இடங்களில் சாயமேற்றும் பணிகளை இங்கேயே முடித்து விற்பனைக்கு அனுப்புகின்றனர். இவ்வாறு அவர் கூறினார்.

தினமலர்

கொஞ்ச நாள் நஞ்சு கலக்காத காவிரியும் காவிரி மற்றும் காளிங்கராயன் கால்வாயும் மீண்டும் அசுத்தம் அடைகிறது.