மூடு விழா காணப்போகிறதா காங்கிரஸ் கட்சி

**கேசவன்** · **கேசவன்** Sun Nov 04, 2012 9:45 am

காங்கிரஸ் கட்சியின் அங்கீகாரத்தை ரத்து செய்ய வேண்டும் எனக்கோரி, தேர்தல் கமிஷனில், ஜனதா கட்சித்தலைவர் சுப்ரமணிய சாமி இன்று மனுத்தாக்கல் செய்கிறார்.

ஜனதா கட்சித்தலைவர் சுப்ரமணிய சாமி, நேற்று முன்தினம் நிருபர்களிடம் பேசுகையில், காங்கிரஸ் தலைவர் சோனியாவும், அவரது மகன் ராகுலும் சேர்ந்து, பொதுத்துறை நிறுவனத்தை தனியார் நிறுவனமாக்கும் முயற்சியில் ஈடுபட்டுள்ளதாகவும், இதையொட்டி, 25 தனியார் நிறுவனங்களை ஒன்றிணைத்து யங் இந்தியன் என்ற நிறுவனத்தை துவக்கியுள்ளதாகவும், அத்துடன் அசோசியேட்டட் ஜர்னல்ஸ் லிட்., என்ற பொதுத்துறை நிறுவனத்தையும் கைப்பற்றியுள்ளதாகவும் குற்றம் சாட்டினார். இந்த அசோசியேட்டட் ஜர்னல்ஸ் நிறுவனத்திற்கு நேஷனல் ஹெரால்டு அண்டு க்வாமி ஆவாஸ் செய்திதாள் நிறுவனம் மட்டுமன்றி, ஏராளமான சொத்துக்கள் உள்ளன. இதன் மூலம் டில்லியில் உள்ள ரூ. 1600 கோடி மதிப்பிலான ஹெரால்டு இல்லத்தை இருவரும் கைப்பற்ற திட்டமிட்டுள்ளதாகவும் குற்றம் சாட்டினார். இதுமட்டுமன்றி, இந்த நிறுவனத்துக்கு காங்கிரஸ் கட்சி சார்பில் ரூ. 90 கோடி கடன் வழங்கப்பட்டதாகவும் கூறினார்.

சுப்ரமணிய சாமியின் இந்த குற்றச்சாட்டை காங்கிரஸ் கட்சியும், ராகுலும் கடுமையாக மறுத்தனர். இது தொடர்பாக கோர்ட்டை அணுகப்போவதாக ராகுல் கூறியிருந்தார். சாமியின் குற்றச்சாட்டு குறித்து கருத்து தெரிவித்த பா.ஜ., ராஜ்யசபா எதிர்க்கட்சித்தலைவர் அருண் ஜேட்லி, அரசியல் கட்சி ஒன்று, வர்த்தக நோக்கில் தனியார் நிறுவனம் ஒன்றிற்கு கடன் கொடுத்திருப்பது இதுவே முதன் முறை. இது உண்மையாக இருந்தால் அது தேர்தல் விதிமுறை மற்றும் வருமான வரித்துறையின் விதிமுறைகளை மீறிய செயல் என்று தெரிவித்திருந்தார்.

இதுகுறித்து கருத்து தெரிவித்த காங்கிரஸ் கட்சியின் ஜனார்த்தன் திவேதி, அசோசியேட்டடு ஜர்னல்ஸ் நிறுவனத்துக்கு காங்கிரஸ் கட்சியின் சார்பில் வட்டியில்லா கடன் வழங்கப்பட்டது. முன்னாள் பிரதமர் ஜவஹர்லால் நேருவால் தொடங்கப்பட்ட இந்நிறுவனத்தின் சார்பில் வெளிவந்த "நேஷனல் ஹெரால்டு' செய்தித்தாள் சுதந்திரப் போராட்டத்தில் முக்கிய பங்கு வகித்தது. ஆனால் அந்தப் பத்திரிகை இப்போது வெளிவரவில்லை. நேஷனல் ஹெரால்டு பத்திரிகையை மீண்டும் பிரசுரிக்க வேண்டும் என்பதற்காக சட்டத்திற்கு உள்பட்டு அசோசியேட்டடு நிறுவனத்துக்கு கடன் கொடுக்கப்பட்டது. இதில் வர்த்தக நோக்கம் எதுவும் இல்லை என தெரிவித்திருந்தார்.

இந்நிலையில், இன்று காலை தனது டுவிட்டரில் பதிலளித்துள்ள சுப்ரமணிய சாமி, தனியார் நிறுவனம் ஒன்றிற்கு அரசியல் கட்சி கடன் கொடுத்திருப்பது தேர்தல் விதிமுறைகளை மீறிய செயல் என்றும், இதற்காக அக்கட்சியின் அங்கீகாரத்தை ரத்து செய்யக்கோரி, தேர்தல் கமிஷனில் தான் மனுத்தாக்கல் செய்யப்படும் என்று தெரிவித்தார்.

http://www.dinamalar.com/News_Detail.asp?Id=578828