இவ்ளோதான்யா நீங்களும் உங்க ஜாதகமும். ஆதாரங்களுடன் ஒரு அதிரடி

எனது வலைப்பூவில்: http://kakkaisirakinile.blogspot.in/2013/01/blog-post.html

இது என்னோட 2013 வது புத்தாண்டின் முதல் பதிவு ஆனா பேசப்போறது 2012 ஆண்டு புத்தாண்ட பத்தி. என்னடா சம்மந்தமே இல்லமா ஒருவருஷம் பின்னாடி போயி பேசுறேன்னு பாக்குறிங்களா ..? சம்மந்தம் இருக்குங்க. அதுவும் என்னான்னு கொஞ்சம் பாக்கலாம் வாங்க.

அது என்னவோ தெரியலைங்க. வீட்ல சாம்பார்ல இருந்து பொறியல் வரைக்கும் எதுலயாவது ஒரு சின்ன எறும்பு விழுந்தாகூட வேற யாரு கண்ணுலயும் படாது. என் கண்ணுல மாட்டிக்கும். அதுக்கப்பறம் என்ன, எங்க அம்மா காதுல பஞ்சு வச்சுக்க வேண்டிய தான் பாக்கி. இப்ப நான் வெளியூர்ல இருக்கறதால என் அம்மா கொஞ்சம் சந்தோசமா இருக்கும்னு நெனைக்கிறேன். ஏனா, வீட்ல என் அம்மாவை எப்பவும் திட்ற ஒரே ஜீவன் நானாதான் இருப்பேன் (நீ பக்கத்துல இருந்து திட்டமா இப்பல்லாம் ரொம்ப போர் அடிக்குதுடானு போன்ல அப்பப்ப காலாய்க்க வேற செய்யிறாங்க). இது மாதிரி தான் போன 2012 புதுவருட நீயா நானா ஸ்பெஷல் ஷோல சிலர் என் கண்ணுக்கு மாட்டுனாங்க (சத்தியமா இந்த வாட்டி கோபிய விமர்சிக்கலங்கோ). ஆனா அதப்பத்தி எழுதனும்னா 2012 முடியும் வரம் காத்திருந்துதான் ஆகணும். அப்படி ஒரு கட்டயாம். அதுக்கு முன்னாடிஎழுதிருந்தா என்ன முட்டாள்னு முத்திரை குத்தீருப்பாங்க. ஏனா டாபிக் அப்படி.

அது என்ன ஷோ ? தலைப்பு என்ன ? அதுல என்ன பிரச்சன ? யார் அந்த நண்பர்கள்னு பாக்கா அப்படியே ஒருவருஷம் பின்னாடி போலாமா ..?

2012 வருஷ நீயா நானா ஸ்பெசல் ஷோல பேசப்பட்ட தலைப்பு "2012 ஆண்டில் ஜோதிடம் என்ன சொல்கிறது" என்பதுதான். இந்த நிகழ்ச்சியில் பொதுப்பலன், ஒவ்வொரு ராசிக்கும் உரிய பலன் அப்படின்னு நெறைய விவாதிச்சாங்க. அதுல, கோபி ஒரு கேள்விய கேட்டாரு. 2012 இல் நான் இதைக் கணித்திருக்கிறேன். அது கண்டிப்பாக நடக்கும் என எந்த நிகழ்வையாவது உங்களால் சொல்ல முடியுமா என்று.

அதுக்கு வந்த பதில்கள் நிறைய. அதுல முக்கியமான ரெண்டு, 2012 முடியறதுக்குள்ள "ராஜபக்சே கட்டாயமாக ஆட்சியை விட்டு இறங்குவார்" , "இந்திய-சீன போர் வரும்" என்பதே.

இதுல எதாச்சும் நடந்ததா ..? அவர்கள் பேசிய பகுதியை மட்டும் இந்த காணொளில் ஒரு முறை பார்க்கவும். மீதியை பிறகு பேசுவோம்.



அதுமட்டுமில்லாம, அந்த ஜோசியர்களிடே கூட சரியான உடன்பாடில்லை. ஒருவர் ராஜபக்சே ஆட்சியை விட்டு விலகுவார்னு சொல்றாரு, மற்றொருவர் கண்டிப்பா இல்லன்னு எதிர்கிறாரு. அவங்களுக்குள்ளேயே எது சாரின்னு தெரியல. எல்லாரும் ஒரே ஜாதகத்தத்தான படிச்சிருப்பாங்க.? அப்ப ஏன் இந்த மாறுபட்ட கருத்துக்கள் .? இவர்கள் எப்படி நம்மளுடைய வாழ்கைய ஜாதகம் என்கிற போர்வையில தீர்மானிக்க முடியும். இவர்களை நம்பி நாம் ஏன் போகவேண்டும். இவர்கள் என்ன கடவுளா..? நாமளும் கொஞ்சம் யோசிக்க வேண்டாமா ..?

அதோட இங்க நீங்க இன்னும் ஒன்ன சரியா புரிஞ்சுக்கணும். இந்த நிகழ்ச்சியில் கலந்துகொண்ட ஜோசியர்கள் எல்லாரும் தமிழ் நாட்டில் பிரபலமான பெரிய ஜோசியர்கள் என்று சொல்லப்படுபவர்கள். ஷெல்லி என்கிறவர் அடிக்கடி டிவில வாரத பாத்துருப்பிங்க. அவர்தான் ராஜபக்சே 2012 குள்ள ஆட்சியை விட்டு வெளியேற்றப்படுவார்னு சொன்னார். ஆனா நமது உறவுகளை ஈவு இரக்கமின்றி கொன்று குவித்த அவன் என்னவோ சுகபோகமாகத்தான் வாழ்ந்து கொண்டிருக்கிறேன். ஜோசியத்தில் அனைத்தையும் அறிந்த, தமிழ் நாட்டின் பெரிய ஜோசியர்கள் என்று சொல்லப்படும் இவர்கள் வார்த்தைகளே பொய்த்து போகிறதே, அப்ப நம்ம ஊரு அரைகுறை ஜோசியர்களின் கதி என்ன ..? அவர்களை நம்பி நாம ஏன் ஊர் ஊரா கோவில் கோவிலா சுத்தணும், வாழ்க்கைய அழிச்சுக்கணும் ..?

அடுக்கடுக்காக வைக்க என்னிடம் நிறைய கேள்விகள் இருந்தது. அந்த கேள்விகளை ஒட்டுமொத்தமாக "சங்கரி ராஜ்குமார்" என்ற ஒரு இயக்குனர் தன்னோட படத்து கடைசி காட்சில சமூதாயத்திற்கு ஒரு சாட்டையடியாக பதிவு செய்தார். அந்தப் படம் வேற எதுவும் இல்ல. யாருமே பெருசா கவனிக்காத, இப்படி ஒரு படம் வாந்துச்சானு கூட பலருக்கு தெரியாத படம் "வெங்காயம்". நான் பார்த்த சமூக கருத்துள்ள படங்களில் மிக முக்கியமான இடத்தை பிடிக்கும் படம் இது.

அந்த படத்தின் ஐந்து நிமிட கடைசி காட்சியை இங்கு இணைக்கிறேன். கட்டாயம் பாருங்கள்.



இத்தனை கேள்விகள் உதாரணங்கள் கொடுத்தும், நீ என்ன அவ்ளோ பெரியாளா .? உனக்கு அப்படி என்ன தெரியும் ..? உன்ன பெரிய அறிவாளின்னு காட்டிக்க முயற்சி பண்ட்ரியானு தலைப்ப மட்டும் பாத்துட்டு கல்ல விட்டு அடிக்க நம்ம ஊர்ல பல நண்பர்களும் இருப்பாங்க. அடிக்கறதா இருந்தா கொஞ்சம் சின்ன கல்லா வச்சு அடிங்க பாஸ். ஆனா அடிச்சிட்டு, குறைந்த பட்சம் இந்த மூட நம்பிக்கைகளை விட்டு விலகினா ரொம்ப சந்தோசப்படுவேன்.

இத்தனை சொல்லியும்.. உனக்கு என்ன தெரியும், இந்த கட்டுரை உன்னோட அறியாமையைக் காட்டுது அப்படின்னு நம்மாளுக கமெண்ட் அடிக்காம இருக்க மாட்டாங்க. அவங்களுக்கு மட்டும் என் வாழ்கையை ஒரு உதாரணமாகச் சொல்லி இந்த பதிவை முடித்துக்கொள்கிறேன்.

2011 ஆகஸ்ட் 18 தேதி, நான் இந்த உலகில் ஒரு தனிமரம் என்று நினைத்துக் கொண்ட நாள். என் வாழ்க்கையில், ஈடு செய்ய முடியாதா ஒன்றை இழந்த நாள். என் வாழ்வில் இதற்கு மேலும் ஒரு பெரிய இழப்பு வர இயலாத, அந்த இழப்பு என் அண்ணன் என்பதை இன்னும் ஜீரணித்துக் கொள்ள முடியாத நாள். ஒரு விபத்தில் சிக்கி, சில லட்சங்கள் செலவு செய்தும் இரண்டு நாட்கள் மருத்துவமனையில் இருந்தபின் 29 வது வயதில் எனது அண்ணனின் உயிர் பிரிந்தது. என் அப்பாவிற்கு ஜாதகத்தில் அதீத நம்பிக்கை. ஆனால் எனக்கு எப்போதுமே இருந்ததில்லை.

அந்த நம்பிக்கையால் உயிர் பிரிவதற்கு சில மணி நேரங்களுக்கு முன்னும் என் அப்பா, என் மாமாவிடம் சொல்லி எனது அண்ணனின் ஜாதகத்தைப் பார்க்கச் சொன்னார். ஜோசியர் சொன்னது, "இவரின் ஆயுள் கெட்டியானது. எதற்கும் பயப்படாதீர்கள். இப்போது எதுவும் ஆகாது. கண்டிப்பாக திரும்பிவருவார் என்பதே". என் அண்ணனும் திரும்பி வந்தார், ஆனால் உயிர் மட்டும் இல்லை.

என் அண்ணனின் ஆயுள் ஜாதகம், எங்களுடைய சுற்றுப்புற ஊர்களிலேயே மிகவும் பிரபலமான ஜோசியர் ஒருவரால் முத்தான எழுத்துக்களில் 73 வயதுவரை வாழ்வார் என எழுதப்பட்டு, அதற்கு மேலும் ஆயுள் உண்டு என்ற குறிப்போடு இன்னும் எங்கள் வீட்டில் உறங்கிக் கொண்டிருக்கிறது.

இத்தனை மாதங்களாகியும் உயிருக்கு இணையான என் அண்ணனைப் பற்றி சிந்திக்கவே எனது மனம் இன்னும் பக்குவப்படவில்லை. இருந்தும் இந்த உதாரணத்தைத் தர காரணம், சிலருக்காவது உதவும் என்ற நம்பிக்கையில்.

யோசிப்பீர்கள் என்று நம்புகிறேன்..!

நன்றி,

அன்புடன்,
அகல்

ஆமாம் அண்ணா நான் யோசிக்கிறேன்.

தங்களின் தகவலுக்கு நன்றி,,,

மனிதனிடம் உள்ள பல நம்பிக்கைகளில் ஒன்று ஜோதிடம்....இது கணித சாஸ்திர அடிப்படையில் எழுதப்பட்டாலும் பலன் சொல்லும் முறை ஒவ்வொரு முறைக்கும், சொல்பவரின் முதிர்ச்சியைப் பொறுத்தும் மாறும்.

எப்படி கடவுள் இருப்பதை நம்மால் நிரூபிக்க முடியாதோ, அது போல் தான் ஜோதிடம் எதிர்காலத்தின் அனைத்தையும் 100% துல்லியமாக கணிக்க இயலாது. இன்றைய உலகில் கணிக்கப்படும் weather ரிப்போர்ட் இது போன்றதொரு கணித அடிப்படையை அறிவியல் பூர்வமாக செய்கிறது. ஆயினும் கணிக்கப்படும் அனைத்தும் அப்படியே நடைபெறுவதில்லை, ஆகையால் இவை அனைத்தும் தவறு என்று எண்ண இயலாது. அது போல் தான் ஜோதிடமும்.....

இந்தப் பதிவுக்காக உங்களைப் பாராட்டியே ஆகவேண்டும். ஆண்டாண்டுகாலமாய் நம் மக்களைப் பிடித்திருக்கும் ஜாதகப் பைத்தியத்தை தெளிவிக்க முயற்சித்திருக்கிறீர்கள். அதற்காக நீங்கள் சுட்டிக் காட்டியிருக்கும் நிரூபணங்கள் ஒதுக்கித் தள்ள முடியாதவை.
உங்கள் சொந்த வாழ்வின் அந்த வேதனை நிறைந்த அனுபவத்தையும் சொல்லியிருக்கிறீர்கள். மக்கள் இந்த மூட நம்பிக்கையிலுருந்து வெளிவரவேண்டும் என்ற உங்களின் ஆழமான ஆதங்கமும் புரிகிறது. ஆனாலும் என்ன செய்ய? நம்மவர்கள் மாறுவார்கள் என்றா நினைக்கிறீர்கள்?

இயக்குனர் விக்கிரமன் இயக்கிய உன்னை நினைத்து எனும் திரை படத்தில்

செத்த ஒருவருக்கு ஜோதிடம் பார்க்கும் நகைச்சுவை காட்சி வரும், அதுபோல இங்கு என்னதான் நடந்தாலும் மூட நம்பிக்கைகளை விலக்க முடியாது.

நேற்று ஒரு செய்தி படித்தேன், ஒரு அம்மா வாஸ்துவில் அதீத நம்பிக்கை உடையவராம், பத்தாவது படிக்கும் அவரது பையன் சரியாக படிக்கவில்லை. அந்த பெண்ணின் நண்பர் பகுதி நேர போதனையில் (tution) சேர்த்து விடும்படி கூரியுள்ளார், ஆனால் அப்பெண்மணி தனது மகனுக்கு நேரம் சரியில்லை எனவும் கல் வைத்த மோதிரம் போட்டால் தேர்வாகி விடுவான் என்னவும் கூறி மோதிரம் அணிவித்துள்ளர், பையன் பத்தாவது பொது தேர்வில் தேறவில்லை, அதற்கப்புறம் அந்த அம்மா தனது தவறை உணர்ந்துள்ளார், அவரின் தோழி இதை வருத்தமுடன் கூரியிருந்தார்.

இது ஒரு சின்ன உதாரணம்

இவ்வளவு நீங்க எனக்கு சொல்ல வேண்டாம் அகல் - இதை இதை நான் நம்பறேன்

இழப்புகளுக்கு பின் தான் சிலருக்கு வெறுப்பு வருகிறது - ஆனால் அதை நம்பிக்கை போய்விட்டது என எடுத்துக் கொள்ள இயலாது என்பதே என் கருத்து

யினியவன் wrote:இவ்வளவு நீங்க எனக்கு சொல்ல வேண்டாம் அகல் - இதை இதை நான் நம்பறேன்

இழப்புகளுக்கு பின் தான் சிலருக்கு வெறுப்பு வருகிறது - ஆனால் அதை நம்பிக்கை போய்விட்டது என எடுத்துக் கொள்ள இயலாது என்பதே என் கருத்து

மன்னிக்கவும் அண்ணே இழப்பிற்கு பின் எனக்கு வெறுப்பு வரவில்லை .. சிறுவயது முதல் எனக்கு இதில் உடன்பாடில்லை... ஏமாற்று வேலை...

சதாசிவம் wrote:எப்படி கடவுள் இருப்பதை நம்மால் நிரூபிக்க முடியாதோ, அது போல் தான் ஜோதிடம் எதிர்காலத்தின் அனைத்தையும் 100% துல்லியமாக கணிக்க இயலாது

துல்லியமாக கணிக்க முடியாத ஒன்றை நாம் ஏன் அண்ணா நம்பி சீரழிய வேண்டும்..?

அகல் wrote:

சதாசிவம் wrote:எப்படி கடவுள் இருப்பதை நம்மால் நிரூபிக்க முடியாதோ, அது போல் தான் ஜோதிடம் எதிர்காலத்தின் அனைத்தையும் 100% துல்லியமாக கணிக்க இயலாது

துல்லியமாக கணிக்க முடியாத ஒன்றை நாம் ஏன் அண்ணா நம்பி சீரழிய வேண்டும்..?

நல்ல கேள்வி...

வானிலை அறிக்கை ஒரு சில நேரங்களில் பொய்யாகப் போகிறதே, அதனால் மீனவர்கள் கடலுக்குள் எப்போது வேண்டுமானால் செல்லலாம், இவற்றை சட்டை செய்யத் தேவையில்லை என்று முடிவு செய்வது எப்படி தவறோ, அது போல் தான் ஜோதிடத்தை முற்றிலும் தவிர்க்க நினைப்பது. இக்கணிதம் செயல்படும் விதத்தை புரிந்து கொண்டால், இதன் எல்லைகள் என்ன எதை நம்ப வேண்டும் எதை நம்பக்கூடாது என்று முடிவுக்கு நாம் வரலாம்.

இண்டர்நெட்டை பயன்படுத்தி அறிவையும் வளர்க்கலாம், சீரழிவையும் பெறலாம். ஜோதிடமும் இப்படி தான்.

உங்களுக்கு மேலும் புரிய மேலும் ஓர் உதாரணம்....

பங்குச் சந்தை, பொருளாதார வல்லுனர்கள் என்று சிலர் இருக்கிறார்கள். இவர்களில் சிறந்த பத்து நபர்களிடம் சென்று அடுத்த வருடம் இந்திய ரூபாயின் மதிப்பு எப்படி இருக்கும், கச்சா எண்ணெய், தங்கம் விலை எப்படி ஏறி இறங்கும் என்று கேட்டால், ஒவ்வொருவரும் ஒரு வகையாக விவரங்களை கொடுப்பார்கள். இது கிட்டத்தட்ட ஒன்றாக இருக்குமே ஒழியே, கண்டிப்பாக 100 % ஒத்துப் போகாது. சில நேரங்களில் ஏட்டிக்குப் போட்டியான கருத்துகள் வரலாம். இவர்கள் இதை எப்படி கணிக்கிறார்கள் என்று யோசித்தால், இது ஏன் 100 % ஒரே பதிலைத் தருவதில்லை என்ற கேள்விக்கு பதில் விளங்கும்...அவர்கள் கடந்த பல ஆண்டுகளின் ஏற்ற இறக்கங்களை ஆய்வு செய்து, அடுத்து வரும் ஆண்டுகளில் நடைபெற இருக்கும் நிகழ்வுகளை எதிர்ப்பார்த்து, தங்களின் அனுபவ முதிர்ச்சியை பொறுத்து இது இப்படி மாறலாம் என்று கணிக்கின்றனர்.

பல நேரங்களில் இது போன்ற கணிப்புகள் பொய்த்துப் போகிறது, ஆயினும் முதலீடு செய்பவர்களுக்கு இவர்களின் அறிவுரையே வழிகாட்டி. இதை விடுத்து நான் என் இஷ்டப்படி முதலீடு செய்வேன் என்று கூறினால் அது முறையாகாது..

ஜோதிடமும் பல ஆண்டுகளாக இது போன்ற பல்வேறு possibilities கலந்த ஒரு DATABASE அடிப்படையிலே கணிக்கப்படுகிறது. இதில் பல முறைகளும் உண்டு....

இன்றுள்ள பிரச்சனை மனிதன் தன் எதிர்காலத்தை எதிர்கொள்ளத் தயாராக இல்லை. பேராசையின் காரணமாக அதை மாற்ற முயற்சிக்கிறான். இதை சிலர் தங்களுக்கு லாபமாக பயன்படுத்துகிறார்கள்...இதில் பாதித்த சிலரால் ஜோதிடம் பொய், வீணான வேலை என்ற வதந்தி நிலவுகிறது.

இது இருட்டில் நடப்பவனுக்கு உதவும் விளக்கு போல், ஒரு வழிகாட்டி மட்டுமே, உங்கள் வழியை, பயணத்தை, உங்களை மாற்றாது, ஆனால் நீங்கள் தடுக்கி விழுந்து கால் உடையாமல் செல்ல உதவும்...