இறைவனை துதித்து அந்தாதி நூறு – நாகசுந்தரம்

by **நாகசுந்தரம்** Thu Nov 01, 2012 5:07 pm

பொது

எளிமையான இறைவனாம் எந்தனுக்கு சொந்தமாம்
களிப்பெய்தும் கடவுளாம் கார்த்திகேயன் முதல்வனாம்
விளித்தபோது வந்துமே வினைவேறாய் அறுப்பனாம்
அளிப்பதில் ஆண்டவன் அருளுவதில் மன்னனாம்
களிறுஎன்னை காப்பதை கருத்தாக கொள்ளுமே (1)

by **நாகசுந்தரம்** Thu Nov 01, 2012 5:10 pm

கொள்ளவேண்டும் மனதிலே கமலமுறும் கடவுளை
அள்ளஅள்ள குறையாமல் அறிவுபெற வேண்டுமே
மெள்ளமெள்ள மேதினி மறைந்திட நாளுமே
விள்ளவிள்ள விளங்கிடும் வேதத்தின் பொருளுமே
உள்ளத்தினில் உன்னைநான் உன்னியே நிற்பனே (2)

by **நாகசுந்தரம்** Thu Nov 01, 2012 5:12 pm

நேற்றிருந்த நோயினை நன்றாக அறுத்தனை
காற்றிருந்த தூசென காசினியில் இருக்கிறேன்
சாற்றியே நின்றனன் சேயென காத்தனை
மாற்றியே விட்டனை மைந்தநென் விதியினை
வீற்றிருப்பாய் உள்ளத்தில் விளக்கமாய் நின்றனை (3)

by **நாகசுந்தரம்** Thu Nov 01, 2012 8:50 pm

அனைவரும் உனதடி வினையற வேண்டினோம்
சினந்தனை கொன்றிட சாத்திரம் சொல்லுவோம்
தனந்தனை தந்திட உனதருள் உன்னினோம்
மனந்தனை மாற்றிடு மங்களம் அருளிடு
அனலென அழித்திடு அகத்தினில் இருளையே (4)

by **நாகசுந்தரம்** Thu Nov 01, 2012 8:53 pm

இருளையே போக்கிடும் இனிமையை ஈன்றிடும்
கருணையால் காத்திடும் இருவினை இற்றிடும்
பெருவிரல் அளவிலே பெருமையாய் நின்றிடும்
திருவென தோன்றிடும் தெய்வமாய் ஆக்கிடும்
கருவினில் செல்லாத காட்சியை தந்திடும் (5)

by **நாகசுந்தரம்** Thu Nov 01, 2012 9:04 pm

திடுமென வந்திடும் தீயவை தொலைத்திடும்
அடுத்தது அன்னையாய் அருளினை நல்கிடும்
கொடுத்தனை நல்மணம் தொடுத்தநல் மலரென
மடமனம் மாற்றினை மக்களை காத்தனை
தடுத்தெனை ஆட்கொள தூயதாய் ஆக்கினை (6)

by **நாகசுந்தரம்** Thu Nov 01, 2012 9:14 pm

ஆக்கினை நடுவிலே ஆண்டவன் அவனுள்ளான்
போக்கினான் பசியினை பல்லுயிர் பாரிலே
போக்கிடம் வேறில்லை பதமதை பணிவமே
தேக்கிய வினையெலாம் தீதென போக்கிடு
வாக்கிலே வந்திடு விதமான கவியென (7)

by **நாகசுந்தரம்** Fri Nov 02, 2012 12:14 pm

எனதுயிர் நீயென எண்ணியே இருந்தனம்
மனமதில் மங்களம் மன்னியே வருகநீ
இனமதில் இன்முகம் எந்தியே இருந்தனம்
தனதென இருந்தவை தாயுனக் கீந்தனம்
கனவினில் காட்சியாய் கடிதுநீ மறைந்தனை (8)

by **நாகசுந்தரம்** Fri Nov 02, 2012 12:26 pm

மறைந்தது மலர்ந்தது மனதிலே உறைந்தது
நிறைந்தது நல்வழி நாட்டமுன் தாளிலே
கரைந்தது கன்மமும் காட்டமும் மனதிலே
குறைந்தது குற்றமும் குவலயம் காத்தது
பறந்தது பேதமை பரம்பொருள் பார்க்கவே (9)

by **நாகசுந்தரம்** Fri Nov 02, 2012 12:28 pm

வேதம்நீ நாதம்நீ வேதாந்த வாக்குநீ
பேதமை போக்கிடும் பேரான பரமும்நீ
ஆதவன் ஒளியும்நீ அறிந்திடும் அறிவுநீ
ஏதுமே எனக்கிலை என்றதும் வந்தனை
போதுமே சோதனை போக்கிடம் வேறிலை (10)