பகடை

by ramkumark5 Tue Oct 30, 2012 11:56 pm

பகடை

ஊரில் உள்ள எல்லா குழந்தைகளுக்கும் ஒரு நல்ல பொழுதுபோக்கு என்றால் அது பரமாயி கிழவி தான். அந்த கிழவிக்கு மட்டும் எத்தனை ராஜா, ராணி கதைகள் தான் தெரியுமோ. தினம் தினம் ஊர் குழந்தைகளுக்கு கதைகளை சொல்லிக் கொண்டே இருப்பார்.

கதைகள் சொல்வதில் வல்லவள் என்றால் பகடை உருட்டுவதில் மகா கில்லாடி. கையில் எந்த நேரமும் பகடை வைத்திருப்பாள். இது வரை கிழவியை யாரும் பகடையில் வென்றதில்லை என்றே கூறலாம். கிழவி வைத்திருக்கும் தாயக்கட்டையும், பகடையும் மந்திர சக்தி உடையதோ என்று கூட சில நேரம் எண்ண தோன்றும்.

நல்ல வேலை இவள் மகாபாரத காலத்தில் பிறக்கவில்லை. பிறந்திருந்தால் கௌரவர்களையும், பாண்டவர்களையும் வென்று பரமாயி பாரதம் படைத்திருப்பாள். ஒரு நாள் பரமாயி கிழவியை பற்றி அறிந்து கொள்ள ஒருவன் அந்த ஊருக்கு வந்திருந்தான். பரமாயியுடன் தான் தாயக்கட்டை போட்டி போட்டு வெல்ல போவதாக கூறினான்.

அவர்களுக்கு இடையே நடை பெறவிருக்கும் போட்டி ஊர் முழுக்க பரவியது. ஊரில் பலரும் பரமாயி கிழவியின் வீட்டின் திண்ணை முன் கூடினார்கள். போட்டி ஊர் மக்கள் முன்னிலையில் ஆரம்பம் ஆனது. ஆரம்பத்தில் பரமாயி கிழவி போட்டியில் ஆதிக்கம் செலுத்தினாலும் நேரம் செல்ல செல்ல தோல்வி முகம் காட்ட தொடங்கியது.

தோல்வியின் விளிம்பிற்கே சென்ற நேரத்தில் பரமாயி கிழவியின் பக்கம் அதிர்ஷ்ட காத்து வீச தொடங்கியது. போட்டி மிகவும் விறுவிறுப்பானது.இறுதியில் நான்கு போட்டால் வெற்றி என்ற நிலையிலேயே இருவரும் இருந்தனர். அப்போது ரகு பகடையை உருட்ட மூன்று விழுந்தது.

அப்போது திடீரென்று பரமாயி கிழவி மூச்சு பேச்சு இன்றி சுவற்றில் சாய்ந்தாள். அங்கிருந்தவர்கள் ஊர் வைத்தியருக்கு சொல்லி அனுப்பினார்கள். ஊர் வைத்தியர் வரவழைக்கப்பட்டார். ஊர் வைத்தியர் வந்து அவள் நாடி பிடித்து பார்த்து விட்டு உயிர் பிரிந்து விட்டதாக கூறினார்.

ஊரே சோகத்தில் ஆழ்ந்தது. இந்த மோசமான செய்தியை சொல்லி விட்டு அவர் கையை விட அந்த கையில் இருந்த பகடை கீழே விழுந்தது. பகடையை ரகு பார்க்க பகடையில் நான்கு விழுந்தது. ரகு அந்த முதுமையின் பெருமை உணர்ந்து கண்ணீர் சிந்தினான்.