நான் நொய்டாவிலிருந்து மாற்றல் வாங்கி வந்த செய்தியைச் சொன்னதும் அம்மா சொன்னாள், " இந்த தடவையாது ஊர்த் திர்ழாக்கு ஒழுங்கா வந்து சேரு". சித்திரை மாதம் என்றாலே திருவிழாக்கள் கலைகட்டிவிடும். எங்கள் இராசையில் ஒரு மாதத்திற்கு முன்னரே மாரியம்மன் கோவிலில் கொடியேற்றிவிடுவார்கள். அன்று அந்தக் கொடியை ஒரு பல்லக்கில் வைத்து ஏழூர் தெருக்களையும் சுற்றி வருவர். அன்று தொடங்கும் த
ிருவிழாக் கலை. எனது சிறுவயது திருவிழாக் காலங்களைக் கொஞ்சம் தூசு தட்டுகிறேன் இங்கே.

திருவிழாவிற்கு சில நாட்கள் முன்னரே அம்மனை வேண்டி முளைப்பாரி போடுவது வழக்கம். தெருவில் பொதுவிடமொன்றில் அத்தெருவிலிருந்து முளை போடும் அனைவரும் ஒன்று கூடி தங்களது முளைப்பாரிகளை வைத்து தினமும் இருமுறை நீரிட்டும், இரவினில் அதைச் சுற்றி கும்மியடித்தும் பாட்டுப்பாடியும் அம்மனை வணங்குவர். அதுதான் பல இளம் காதல்கள் முளைவிடும் தருணம் கூட. தழையத் தழைய தாவணியணிந்து உச்சியில் முடி திருத்தி, நெற்றியில் திலகமிட்டு, மலைப்பாம்புக் கூந்தலில் மல்லிகைப்பூச் சரம் சூடி கும்மியடிக்க வரும் இளம்பெண்களின் ஓரப்பார்வைகளுக்காக காத்திருப்பர் கட்டழகுக் காளைமார்கள்.

கடைக்கணோர சிறுபார்வை, உதட்டோரக் குறுஞ்சிரிப்பு இவைதான் அவர்களின் எஸ்.எம்.எஸ்கள். எந்தவித டேப்பிங்கிற்குள்ளும் சிக்கிவிடாத தகவல் பரிமாற்றங்கள் இவை. பள்ளி, கல்லூரி செல்லும் போது கூட அண்ணன் தம்பிகளின் எஸ்கார்ட் பாதுகாப்புடனே வளைய வரும் தேவதைகளைக் கொஞ்சம் கூண்டுவிட்டு தரிசிக்கக் கிடைக்கும் தருணங்கள் இவையென்பதால் இவற்றை எக்காரணம் கொண்டும் தவரவிடமாட்டார்கள் விடலைப் பையன்கள். அவர்களின் காதல் விளையாட்டுகளில் அவ்வப்போது பகடைளாக்கப் படுவோம் எங்களைப் போன்ற சிறுவயதுப் பையன்கள்.

அதிலும் எங்கள் கூட்டத்திலிருக்கும் குட்டி என்கிற செந்தில்முத்துவுக்கு மட்டும் ஏகபோக கவனிப்பாக இருக்கும் விடலைப் பையன்களிடத்தில். அவனுக்கு மட்டும் கலர் சோடாவும், அரிசி முறுக்கில் ஒன்று அதிகமாகவும் வழங்கப்படும். இதிலிருக்கும் சூட்சம முடிச்சு எங்களுக்குப் புடிபடாமலே இருந்தது நீண்ட நாட்களுக்கு. அது அழகான அக்காக்களைப் பெற்ற தம்பிகளுக்கான சலுகை என்பது புரியும் போது நாங்கள் முறுக்குகளைப் பெறும் நிலையிலிருந்து வாங்கிக் கொடுக்கும் நிலைக்கு உயர்ந்திருந்தோம்.

விசேச தினங்களைக் காட்டிலும் அவற்றிற்கு முந்தை நாட்கள் அதிக சுகமானவை. விடிந்தால் திருவிழா. திருவிழா நாளுக்கு முந்தைய தினம் சாயும் காலம் தெருவின் அனைத்து வீட்டிலிருக்கும் இடிஉரல்கள் எடுத்து கழுவப்பட்டிருக்கும். அன்றைய மாலைப் பொழுதுகளில்தான் மாவிளக்கு ஏற்றுவதற்காக அரிசிமாவு இடிக்கும் நிகழ்ச்சி நடைபெறும். தெருவெங்கும் வீட்டிற்கு வீடு வண்ண மாக்கோலமிட்டு, ட்யூப் லைட் ஏற்றி, வேப்ப மரங்கள் அத்தனையும் சீரியல் விளக்கு உடையணிந்து தெருவே ஜொலி ஜொலித்துக் கொண்டிருக்கும். உடைவிலாகாத கவனத்துடன் தாவணியணிந்த தேவதைகள் உலக்கு இடிக்கும் அழகு காண அணிவகுக்கும் இளைஞர் படைகள்.

திருவிழா நாள். தெருவெங்கும் நீர் தெளித்து குளுமையூட்டி, அதன் இருமங்கிலும் நாற்காலிகளில் தாம்பூலத்தட்டுகளில் பழம் மற்றும் வெற்றிலைப் பாக்கு வைத்து, வாசனைப் பத்தி கொளுத்தி பூச்சப்பரத்தில் பவனிவரும் ஆத்தாளை வரவேற்க தெருவே காத்திருக்கும். ஆனை ஒன்று அசைந்தாடி முன்னே வர, அதைக் கண்டு அழும் சிறுபிள்ளைகளைத் தேற்றிக் கொண்டிருப்பர் நேற்றைய இளைஞர்களான இன்றைய இளம் அப்பாக்கள். சப்பரத்திற்கு முன்னால் ஆனைக்குப் பின்னால் தாவணி மட்டும் தேடும் கூகிள் கண்களுடன் அணிவகுத்துக் கொண்டிருப்பர் அன்றைய இளைஞர்கள். பவனி வரும் அம்மனையே பொறாமைப் பட வைக்கும் அழகு தேவதைகள், களைந்தே இருக்காத தாவணியை களைந்ததாய் கற்பனை செய்து நொடிக்கு நூறு தடவை சரி செய்து கொண்டிருப்பர் ஆ.வியில் வரையப்படும் இளையராஜாவின் ஓவியத்திற்குச் சற்றும் குறைவில்லாத அழகுப் பதுமைகள்.

அழகான பெண்களின் வீட்டின் முன்புறம் மட்டும் கொஞ்சம் அதிகமாய் நின்று போகும் அம்மனின் சப்பரம் கூட. நிற்கும் அந்த நிமிடங்களில் பரிமாறப்படும் பார்வைகளின் அர்த்தம் புரிபடும் முன்னரே அடுத்த திருவிழாக்கள் வந்துவிடுவதுண்டு.

இதோ இந்த ஏப்ரல் 17 ஆம் தேதி ஊரில் திருவிழா. கல்லூரித் தேர்வுகள், நொய்டாவில் பணி என கடந்த ஐந்து வருடங்களாக திருவிழாவிற்கு செல்ல இயலவில்லை. இதோ தயாராகிக் கொண்டிருக்கிறேன் இந்த ஆண்டு திருவிழாவிற்கு. உரல்கள் மாறி கிரைண்டர்களும், மண் தரைகள் மாறி சிமெண்ட் வீதிகளும், மாக்கோலம் மாறி ரங்கோலிகளும் இன்றைய திருவிழாக்களை ஆக்கிரமித்திருப்பதாகக் கேள்விப் பட்டேன். யாருக்குத் தெரியும் எனக்காக காத்திருக்கக் கூடும் ஜீன்ஸ் அணிந்த தேவதை ஒன்று.



நன்றி:ரிலாக்ஸ் பிளீஸ்