அரசு மருத்துவமனையில் அவலம்!!

by **அருண்** Mon Oct 29, 2012 12:44 pm

செங்கல்பட்டு:மருத்துவர்கள் அல்லது செவிலியர்கள் அளிக்க வேண்டிய மருத்துவ சிகிச்சையை, வார்டு உதவியாளர்கள் அளிப்பதால், செங்கல்பட்டு அரசு மருத்துவமனைக்கு வரும் நோயாளிகள் அச்சமடைந்து உள்ளனர்.மாவட்டத்திலேயே பெரிய அர” மருத்துவமனையாக விளங்கும் இதில், சிகிச்சைக்கு தேவையான அனைத்து வசதிகளும், கருவிகளும் உள்ளன. ஆனால், மருத்துவர், செவிலியர் பற்றாக்குறை, குறைந்த மருந்து இருப்பு, காலி ஊழியர் பணியிடங்கள் உள்ளிட்ட ஏராளமான பிரச்னைகளில் மருத்துவமனை சிக்கி தவிக்கிறது. இதனால், இங்கு வரும் நோயாளிகள், தகுந்த சிகிச்சை கிடைக்காமல் அவதிப்படுகின்றனர்.

அலட்சியம்:
இங்கு, 700க்கும் மேற்பட்டோர் உள்நோயாளிகளாக சிகிச்சை பெறுகின்றனர். இவர்களை, தினசரி இரண்டு அல்லது மூன்று வேளை சோதிக்கும் மருத்துவர்கள், அவர்களுக்கு கொடுக்கப்பட வேண்டிய மருந்துகள் என்னென்ன என்பதை, "கேஸ் ஷீட்'டில் (நோய் விபர குறிப்பு) குறிக்கின்றனர்.மருத்துவர்கள் எழுதியுள்ள படி, செவிலியர்கள், "டிரக் ஷீட்' (மருந்து பட்டியல்) தயாரித்து, மருந்துகளை பெற்று, நோயாளிகளுக்கு கொடுக்க வேண்டும். ஆனால், இங்கு செவிலியர்கள் அதை பின்பற்றுவதில்லை.பல செவிலியர்கள், அந்த பணியை, "வார்டு பாய்'கள் எனப்படும், மருத்துவ பயிற்சி பெறாத ஊழியர்களிடம் ஒப்படைத்து விடுகின்றனர். தற்போது, பல வார்டுகளில், செவிலியர்கள் செய்யவேண்டிய, மருந்து கொடுத்தல், காய்ச்சல் உள்ளதா என,சோதித்தல்,

குளுக்கோஸ் ஏற்றுதல் ஆகிய பணிகளை, வார்டு ஊழியர்கள் தான் செய்கின்றனர். இதனால், பல நோயாளிகள் அச்சசடைந்து உள்ளனர்.

நோயாளிகள் பாதிப்பு:
நடைமுறையை பின்பற்றாததால் ஏற்படும் பாதிப்பு குறித்து, கழனிப்பாக்கம் கிராமத்தை சேர்ந்த நந்திவர்மன் கூறியதாவது:எனது சகோதரி பூங்கோதை என்பவருக்கு, கடந்த 24ம் தேதி, சாலை விபத்தில் தலையில் பலத்த காயம் ஏற்பட்டது. ஆம்புலன்ஸ் மூலம், செங்கல்பட்டு மருத்துவமனைக்கு கொண்டு வந்து, அனுமதித்தோம். அன்று மாலை, மருத்துவர் ஒருவர் வந்து பரிசோதனை செய்து விட்டு, அங்குள்ள செவிலியரிடம் குளுக்கோஸ் ஏற்றுமாறு கூறிவிட்டு சென்றார்.ஆனால், அந்த செவிலியர், அருகில் இருந்த வார்டு பாயை அழைத்து, குளுக்கோஸ் ஏற்றுமாறு கூறினார். குளுக்கோஸ் பாட்டிலுடன் வந்த வார்டு பாய், எப்படி ஊசியைஏற்றுவது என்பது தெரியாமல், பல இடங்களில் குத்தினார். இதனால் ரத்த போக்கு ஏற்பட்டது. ஒரு வழியாக, சரியான இடத்தை தேடி ஊசியை வார்டு பாய் ஏற்றினார். அதுவரை, அந்த செவிலியர் உட்கார்ந்த இடத்தைவிட்டு நகராமல் இருந்தார்.இவ்வாறு நந்திவர்மன் கூறினார்.
பல ஆண்டுகள் மருத்துவம் படித்த மருத்துவர்களே, சில நேரங்களில் தவறான சிகிச்சை அளித்து சிக்கலை ஏற்படுத்திக் கொள்கின்றனர். இந்த நிலையில், மருத்துவம் படிக்காதவர்களை கொண்டு, செங்கல்பட்டு அரசு மருத்துவமனையில் சிகிச்சை அளிக்கப்படுவது பெரும் அதிர்ச்சியை ஏற்படுத்தி உள்ளது.

தினமலர்