சுற்றுலா ஆசையை நிறைவேற்ற கால் ஊனமுற்ற தாயுடன் 3500 கி.மீட்டர் நடந்த மகன்

by பூவன் Sun Oct 21, 2012 11:42 pm

சீன தலைநகர் பெய்ஜிங்கை சேர்ந்தவர் கியூ மின்ஜூன். இவர் பிறவியிலேயே பக்கவாத நோயினால் பாதிக்கப்பட்டார். எனவே, கால் ஊனமுற்ற இவரால் நடக்க முடியாது.

இவரை 10 ஆண்டுகளுக்கு முன்பு கணவர் விவாகரத்து செய்து விட்டார். கியூ மின்ஜுனுக்கு பான்மெங் (26) என்ற ஒரே மகன் இருக்கிறார். இந்த நிலையில் வீட்டுக்குள்ளேயே சக்கர நாற்காலியில் முடங்கி கிடந்த கியூமின்ஜுனுக்கு ஸ்ஷ§யாங் பானா என்ற சுற்றுலா நகருக்கு சென்று சுற்றி பார்க்க வேண்டும் என்ற ஆசை இருந்தது.

ஏனெனில் அந்த நகரை பற்றி பத்திரிகைகள் மற்றும் டி.வி. நிகழ்ச்சிகள் மூலம் அறிந்து வைத்திருந்தார். அந்த ஆசையை தனது மகனிடம் தெரிவித்தார். உடனே பான்மெங் தனது தாயாருக்கு வெளி உலகத்தை காட்ட விரும்பினார். அதற்காக வாகனத்தை பயன்படுத்தாமல் நடந்து சென்று ஒவ்வொரு நகரமாக சுற்றி காட்ட முடிவு செய்தார்.

அதன்படி தனது தாயாரை சக்கர நாற்காலியில் வைத்து தள்ளியபடியே தனது பயணத்தை கடந்த ஜூலை 11-ந்தேதி தொடங்கினார். சுமார் 100 நாட்களாக தனது தாயருடன் சுமார் 3500 கி.மீட்டர் தூரம் நடந்து சென்றார்.

அப்போது அவர் தனது தாயாரை நெடுஞ்சாலை வழியாக ஹெபி, ஹெனான், ஹுபே, ஹுனான், குய்ஷோ, மற்றும் யுனான் ஆகிய மாகாணங்களுக்கு அழைத்து சென்று சுற்றிக் காட்டினார். இரவில் ரோட்டோரம் கூடாரம் அமைத்தும், மலிவான ஓட்டல்களில் தங்கியும் பொழுதை கழித்தனர்.

இந்த சுற்றுலாவுக்காக ரூ.70 ஆயிரம் செலவானது. இதற்கிடையே ஸ்ஷுயாங் பான்னா சென்ற தாய் மகனை இந்த நகர மக்கள் ஆடல், பாடலுடன் உற்சாகமாக வரவேற்றனர். கால் ஊனமுற்ற தாயின் சுற்றுலா ஆசையை நிறைவேற்றிய பான்மெங்கை பாராட்டினார்கள்.

நன்றி தமிழ் source