தமிழக மின் நிலைமை : ஆய்வு செய்து அறிக்கை அளிக்க 9 பேர் கொண்ட குழு

by **சிவா** Wed Oct 17, 2012 9:48 pm

சென்னை: தமிழகத்தில் நிலவி வரும் கடுமையான மின்வெட்டை சமாளிக்கவும், மின்நிலைமை குறித்து வாரந்தோறும் அரசுக்கு அறிக்கை அளிக்கவும் 9 பேர் கொண்ட குழுவை முதல்வர் ஜெயலலிதா நியமித்துள்ளார்.

தமிழகத்தில் மின்வெட்டு பிரச்னை நாளுக்கு நாள் அதிகரித்துக்கொண்டே வருகிறது. சென்னை தவிர்த்த, மாநிலத்தின் பல்வேறு பகுதிகளிலும் 10 முதல் 16 மணி நேர மின்வெட்டு தற்போது அமலில் உள்ளது. இந்நிலையில், தலைமைச் செயலகத்தில் முதல்வர் ஜெயலலிதா தலைமையில் அவசர ஆலோசனை கூட்டம் இன்று நடந்தது. இதில் அமைச்சர்கள் மற்றும் உயர் அதிகாரிகள் கலந்து கொண்டனர். இதில் மாநிலத்தின் தற்போதைய மின் தேவை மற்றும் புதிய மின்திட்டங்களில் இருந்து கிடைக்கும் மின் அளவு உள்ளிட்டவை ஆய்வு செய்யப்பட்டன. இதன்படி, தற்போது மாநிலத்தின் மின் உற்பத்திக்கும், மின் தேவைக்கும் இடையே 4 ஆயிரம் மெகாவாட் மின் பற்றாக்குறை இருப்பதாக கூறப்படுகிறது.

கூட்டத்திற்குப்பின் தமிழக அரசு சார்பில் வெளியிடப்பட்டுள்ள அறிவிப்பில், தமிழக மின்நிலைமை குறித்து ஆராய மாநில மின்துறை அமைச்சர் நத்தம் விஸ்வநாதன் தலைமையில் 9 பேர் கொண்ட குழு அமைக்கப்படவுள்ளதாக தெரிவிக்கப்பட்டுள்ளது. இக்குழுவில், உள்ளாட்சித்துறை அமைச்சர் முனுசாமி, தலைமைச் செயலாளர் தேபேந்திரநாத் சாரங்கி, தமிழ்நாடு மின்வாரிய தலைவர் ஞானதேசிகன், நகராட்சி நிர்வாகச் செயலாளர் ஷீலா பாலகிருஷ்ணன், எரிசக்தித்துறை செயலர் ரமேஷ் குமார், விவசாயத்துறை செயலர் சந்தீப் சக்சேனா மற்றும் உயரதிகாரிகள் ராஜகோபால், சண்முகம் மற்றும் ராமமோகன் ராவ் ஆகியோர் இடம்பெற்றுள்ளனர்.

இக்குழு வாரந்தோறும் திங்கட்கிழமைகளில் கூடி, தமிழகத்தின் மின்நிலைமை, புதிய மின் உற்பத்தி திட்டங்களை துரிதப்படுத்துதல் உள்ளிட்ட பணிகளை ஆய்வு செய்து, வாரம் தோறும் தமிழக அரசிடம் அறிக்கை அளிக்க உள்ளது. தமிழக அரசின் இந்த நடவடிக்கையால் மின்வெட்டு பிரச்னை குறையத் துவங்கும் என எதிர்பார்க்கப்படுகிறது.

தினமலர்

by யினியவன் Wed Oct 17, 2012 11:57 pm

பாமரன் அறிந்த மின் தட்டுப்பாடு அரசு அறிய குழு என்று நேரத்தை வீணடிக்காமல் நாற்காலியை காக்க மின் தட்டுப்பாடு அகற்றும் திட்டங்களை விரைவில் செயல் படுத்தி மக்களைக் காக்க ஆவன செய்யுங்கள்.

குழு உறுப்பினர்களை வாரம் ஒரு முறை மாற்றாமல் இருக்கப் பாருங்கள்.