பெண்களுக்கான அதிகாரம்: 115-வது இடத்தில் இந்தியா-ஆஸ்திரேலியாவுக்கு முதலிடம்

by **சிவா** Wed Oct 17, 2012 3:36 pm

பெண்களுக்கான பொருளாதாரம் மற்றும் அதிகாரத்தில் இந்தியா 115-வது இடத்தில் மிகவும் பின்தங்கி உள்ளது.

உலகில் உள்ள 128 நாடுகளில் பெண்களின் சமூக, பொருளாதார, கல்வி, சுகாதார, சொத்துரிமை போன்றவை எந்த நிலையில் உள்ளது என சர்வதேச ஆலோசனை மேலாண்மை மையம் ஆய்வு நடத்தியது.

இதில் முதல் இடத்தை ஆஸ்திரேலியா பெற்றுள்ளது. நார்வே, ஸ்வீடன், பின்லாந்து ஆகிய நாடுகள் அதற்கு அடுத்த நிலையில் உள்ளன. இந்தியா மிகவும் பின் தங்கி 115-வது இடத்தில் இருப்பது ஆய்வில் தெரிய வந்துள்ளது.

மக்கள் தொகையில் உலகின் 2-வது பெரிய நாடான இந்தியாவில், உலக மக்கள் தொகை அடிப்படையில் 14 சதவீதம் திறமைசாலிகள் உள்ளனர். ஒவ்வொரு ஆண்டும் 55 லட்சம் பெண்கள் புதிதாக வேலையில் சேர்கின்றனர். அறிவு வளம் பெருகிய அளவிற்கு இந்திய பெண்களின் பொருளாதார வளம் பெருகவில்லை.

கலாசார கட்டுப்பாடுகள், பாலியல் ஏற்றத்தாழ்வுகள், போன்றவற்றால் இந்திய பெண்களின் முன்னேற்றம் தடுக்கப்படுகின்றது. ஆண்டு தோறும் சுமார் ஆயிரம் பெண்கள் கவுரவ கொலைக்கு ஆளாகுகிறார்கள். பெண் கருக்கொலைகள், சிசுக் கொலைகள், ஆசிட் வீச்சு, கற்பழிப்பு போன்றவை பெண்கள் முழுமையான அதிகாரம் பெறுவதை தடுக்கும் முட்டுக் கட்டைகளாக உள்ளன.

பெண் என்ற காரணத்தால் வேலை செய்யும் இடங்களில் தாங்கள் அநீதியாக நடத்தப்படுவதாக 45 சதவிகிதம் பேர் நம்புகின்றனர். பிரசவத்திற்கு பிறகு பெண்களுக்கு மீண்டும் வேலை கிடைப்பது சிரமமாக உள்ளது.

இந்தியா, தனது வளர்ச்சி நிலையை தக்க வைத்துக் கொள்ள வேலை வாய்ப்பு, பெண்களுக்கான பொருளாதார அதிகாரம் போன்றவற்றில் அக்கறை செலுத்தி, தற்போதைய நடைமுறைகளில் மாற்றம் செய்ய வேண்டும் என்று அந்த ஆய்வு அறிக்கையில் குறிப்பிடப்பட்டுள்ளது.

மாலைமலர்