டெங்கு:தமிழகம் முழுவதும் நிலவரம் என்ன?

by **சிவா** Tue Oct 16, 2012 11:22 am

""தமிழகத்தில், கடந்த 10 நாட்களில், டெங்குவால் 5 பேர் மட்டுமே இறந்துள்ளனர். 200 பேருக்கு பாதிப்பு கண்டறியப்பட்டுள்ளது. பெரும்பாலும் குழந்தைகள் அதிகளவு பாதிக்கப்படுகின்றனர்,'' என, சுகாதாரத்துறை அமைச்சர் விஜய் கூறியுள்ளார். ஆனால், தமிழகம் முழுவதும் வரும் தகவல்கள் வேறுமாதிரியாக உள்ளன.

சென்னை, ஸ்டான்லி மருத்துவமனையில்,நிருபர்களிடம் அமைச்சர் விஜய் கூறியதாவது: டெங்குவால் கடந்த 10 நாட்களில் வேலூரில் இருவர், மதுரையில் ஒருவர் மற்றும் நாகப்பட்டினத்தில் இருவர் என, 5 பேர் உயிரிழந்துள்ளனர். 200 பேர் பாதிக்கப்பட்டுள்ளனர். அதில், 120 பேர் குழந்தைகள், 80 பேர் பெரியவர்கள் அவர்களுக்கான சிகிச்சைகள் தொடர்ந்து அளிக்கப்பட்டு வருகிறது. பெரும்பாலும் குழந்தைகளே காய்ச்சலால் பாதிக்கப்படுகின்றனர்.

ஸ்டான்லியில் 16 பேர்:

ஸ்டான்லியில் இரண்டு ஆண்கள் உட்பட ஆறு பெரியவர்களும் குழந்தைகள் பத்து பேரும் டெங்கு காய்ச்சலால் பாதிக்கப்பட்டுள்ளனர். அவர்கள் தகுந்த சிகிச்சை பெற்று குணமடைந்து வருகின்றனர்.டெங்கு தொடர்பாக, வீண் பீதியை கிளப்பி வருகின்றனர்.அரசு மருத்துவமனையில் ரத்த அணுக்கள் சேகரிப்பு உள்ளிட்ட அனைத்து போதிய வசதிகள் சிறப்பாக செய்யப்பட்டிருக்கிறன்றன. அரசு மருத்துவமனையில் அனுமதிக்கப்பட்டவர்கள், டெங்குவால் உயிரிழந்தார் என்ற நிலை இல்லை; அதற்கு நான் பொறுப்பு.இவ்வாறு விஜய் கூறினார்.

சென்னையில்:

சின்னகாஞ்சிபுரம், சி.என். செட்டி தெருவைச் சேர்ந்தவர் ஜெயினுல்லா பாதீன். வேலூர் மாவட்டம், ஒச்சேரியில் ஓட்டல் நடத்தி வருகிறார். இவரது மகள் பவுசியா, 7. காய்ச்சல் காரணமாக, இம்மாதம், 12ம் தேதி, சென்னை, எழும்பூர், குழந்தைகள் நல மருத்துவமனையில், சிகிச்சைக்காக சேர்க்கப்பட்டாள். இந்நிலையில், சிகிச்சை பலனின்றி, சிறுமி பவுசியா, நேற்று காலை இறந்தார்.சிறுமியின் இறப்பு குறித்து, மருத்துவமனை நிர்வாகம் கூறுகையில், ""சிறுமிக்கு, "டெங்கு' அறிகுறிகள் இருந்ததால், அதை உறுதிபடுத்துவதற்கான பரிசோதனைகள் மேற்கொள்ளப்பட்டன. அவற்றின் முடிவுகள் இன்று(நேற்று) தெரியவரும். அதன்பின் தான், சிறுமியின் இறப்புக்கான காரணத்தை கூற முடியும்,'' என்றனர்.பவுசியாவுடன் சேர்த்து, கடந்த ஒரு வாரத்தில், சென்னை, திருவள்ளூர் மற்றும் காஞ்சிபுரம் மாவட்டத்தைச் சேர்ந்த, நான்கு பேர் இறந்துள்ளனர். இவர்களில் இருவர், சிறுமியர்.

நல்லகண்ணு மனைவிக்கு டெங்கு?

இ.கம்யூ., மூத்த தலைவர் நல்லகண்ணு. இவரின் மனைவி ரஞ்சிதம், 77. காய்ச்சல் காரணமாக, சென்னை, ராஜிவ்காந்தி அரசு பொதுமருத்துவமனையில், நேற்று, உள்நோயாளியாக அனுமதிக்கப்பட்டுள்ளார். இவருக்கு, டெங்கு காய்ச்சலை உறுதி செய்தவற்கான பரிசோதனைகள் மேற்கொள்ளப்பட்டு, தேவையான சிகிச்சைகள் அளிக்கப்படுகிறது என, மருத்துவமனை வட்டாரங்கள் தெரிவித்தன.

நீலகிரி:

நீலகிரி மாவட்டம், கூடலூர் காந்திநகரை சேர்ந்தனர் ராமய்யா,50. இவர், கடந்த மாதம் 20ம் தேதி,கோவையில் உள்ள தனது உறவினர் வீட்டுக்கு சென்றுவிட்டு, 24ம் தேதி கூடலூர் திரும்பியுள்ளார். அவருக்கு, கடந்த இரண்டு வாரங்களாக காய்ச்சல் இருந்துள்ளது. சிகிச்சைக்காக, கூடலூர் தேவர்சோலை சாலையில் உள்ள தனியார் மருத்துவமனையிலும், பின்னர், கேரள மாநிலம் சுல்தான் பத்தேரியில் உள்ள தனியார் மருத்துவமனையிலும் அனுமதிக்கப்பட்டார். அங்கு பரிசோதனை செய்ததில், ராமய்யாவுக்கு டெங்கு காய்ச்சல் இருந்தது தெரியவந்தது.இதையடுத்து, கூடலூர் அரசு மருத்துவமனைக்கு கொண்டு வரப்பட்ட ராமய்யா, அங்கிருந்த டாக்டர்களின் அறிவுரைப்படி, கோவை அரசு மருத்துவ கல்லூரி மருத்துவமனையில் அனுமதிக்கப்பட்டார்.

சேலம்:

சேலம் மாவட்டத்தில், 69 பேர் டெங்கு காய்ச்சலால் பாதிக்கப்பட்டுள்ளனர். இரண்டு சிறுமிகள் உயிரிழந்துள்ளனர். டெங்குவை கட்டுப்படுத்த, சுகாதாரத்துறைக்கு மாவட்ட கலெக்டர் உத்தரவிட்டுள்ளார். இதற்காக, கிராமப்புறங்களில், சுகாதாரப்பணிகள் துணை இயக்குனர் ஜெகதீஸ்குமார் மேற்பார்வையில், வீடு, வீடாக சென்று, "அபெட்' எனும், கொசு ஒழிப்பு மருந்து வழங்கப்படுகிறது. மேலும், கொசு ஒழிப்பு மிஷின் மூலம், கொசு உற்பத்தியாகும் இடங்களில் மருந்து புகை அடிக்கப்படுகிறது.டெங்கு காய்ச்சல் பாதிப்புள்ள நபர்களின் விபரங்களை சேகரித்து, சுகாதாரத்துறை அதிகாரிகள் வசம் தெரிவிக்க வேண்டும் என, ஆரம்ப சுகாதார நிலைய டாக்டர்களுக்கு, துணை இயக்குனர் தரப்பில் அறிவுறுத்தப்பட்டுள்ளது. இதேபோன்று, மாநகராட்சி, நகராட்சி பகுதிகளில், கமிஷனர் உத்தரவின் பேரில், கொசு ஒழிப்பு மருந்து அடிக்கப்பட்டு வருகிறது.

மதுரை:

""மதுரை மாவட்டத்தில், 12 பேர் "டெங்கு' காய்ச்சலினால் பாதிக்கப்பட்டு சிகிச்சை பெற்று வருகின்றனர். தடுப்பு நடவடிக்கைகள் தீவிரப்படுத்தப்பட்டுள்ளதால், "டெங்கு' குறித்து பொது மக்கள் பீதியடையத் தேவையில்லை,'' என கலெக்டர் அன்சுல் மிஸ்ரா தெரிவித்தார்.

"டெங்கு' தாக்கி இருவர் பலியாகி உள்ளனர். தனியார் மருத்துவமனையில் சிகிச்சை பெற்று, கடைசியாக அரசு மருத்துவமனையில் சிகிச்சை பெற்ற ராஜபிரியா, இடையமேலூர் மோகனப்பிரியா ஆகிய இருவர் இறந்தனர். உரிய காலத்தில் இங்கு சிகிச்சைக்கு வந்திருந்தால் உயிர் இழப்பை தடுத்திருக்க முடியும்' என, அன்சுல்மிஸ்ரா தெரிவித்தார்.

12 பேர் "அட்மிட்':

கோவை அரசு மருத்துவமனையில் டெங்கு காய்ச்சலால் பாதிக்கப்பட்ட 12 பேர் சிகிச்சை பெற்று வருகின்றனர்.நேற்றுவரை, கோவை அரசு மருத்துவமனையில், டெங்கு காய்ச்சல் பாதிக்கப்பட்ட , ஆறு குழந்தைகள் உட்பட மொத்தம், 12 பேர் சிகிச்சை பெற்று வருகின்றனர்.டெங்கு காய்ச்சல் பாதிப்பு அதிகரித்து வரும் நிலையில், பொதுமக்களிடையே ஏற்பட்டுள்ள அச்சத்தை போக்க கோவை மாநகராட்சியும், சுகாதார துறையும் நடவடிக்கை எடுத்ததாக தெரியவில்லை.

தினமலர்