வெங்காயம்

by **சிவா** Mon Oct 15, 2012 4:23 pm

உறிக்க உறிக்க ஒன்றுமே இல்லை என்று வெங்காயத்தைப் பற்றிச் சொல்வதுண்டு. ஆனால் அதில் அர்த்தமில்லை. வெங்காயத்தில் எவ்வளவு சத்துக்கள் இருக்கின்றன, அவற்றின் அருமை பெருமை என்ன என்பதை இப்போது உறித்து பார்த்து தெரிந்து கொள்ளலாம், வாங்க...

* வெங்காயம் ஆலியேசி குடும்பத்தைச் சேர்ந்தது. இதன் அறிவியல் பெயர் ஆலியம் சிபா என்பதாகும்.

* வெங்காயம் கலோரி குறைந்த உணவுப் பொருளாகும். 100 கிராம் வெங்காயத்தில் 40 கலோரி ஆற்றல் கிடைக்கிறது.

* குறைந்த அளவே கொழுப்புச் சத்து உள்ளது. அதே நேரத்தில் எளிதில் வளர்ச்சிதை மாற்றம் அடையக்கூடிய நார்ச்சத்து நிறைந்துள்ளது.

* இதிலுள்ள ஆலிசின் மூலக்கூறுகள் புற்றுநோய் எதிர்ப்பு சக்தி மிக்கது. நீரிழிவு பாதிப்பை கட்டுப்படுத்தும் ஆற்றலும் வெங்காயத்திற்கு உண்டு. இவை சில நொதிகளை கட்டுப்படுத்துவதன் மூலம் கெட்டகொழுப்புகள் உடலில் உற்பத்தியாவதை தடுக்கிறது.

* வெங்காயத்தில் பாக்டீரியா மற்றும் வைரஸ், பூஞ்சை போன்ற தீமை விளைவிக்கும் கிருமிகளை எதிர்க்கும் தன்மை இருக்கிறது. அதனால் பல்வேறு மருந்துப் பொருட்களில் வெங்காயம் இடம் பெறுகிறது.

* வெங்காயத்திலுள்ள ஆலிசின், ரத்தத்தட்டுகள் கெட்டிப்படுதலை தடுக்கிறது. மேலும் ரத்த அழுத்தம் அதிகம் ஆகாமலும் கட்டுப்படுத்துகிறது.

* கொழுப்பு படிவதால் ஏற்படும் தமனி சார்ந்த பாதிப்புகளை தடுக்கும். முடக்குவாதம், பி.வி.டி. ஆகிய வியாதிகளையும் தடுக்கும் ஆற்றல் உள்ளது.

* இதிலுள்ள குரோமியம் சத்து, தாதுஉப்புகள் பற்றாக்குறையை போக்கி தோல்செல்கள் அதன் தன்மையை இழக்காமல் காக்கும்.

* வைட்டமின் சத்தான விட்டமின் சி, தாதுஉப்பான மாங்கனீசு ஆகியவை வெங்காயத்தில் உள்ளது. இது சிறந்த நோய் எதிர்பொருளாகும்.

* பான்டோதெனிக் ஆசிட், பைரிடாக்சின், தயமின் ஆகியவையும் இருக்கிறது. பைரிடாக்சின் மத்திய நரம்பு மண்டல செல்கள் நன்றாக வேலை செய்ய உதவும். நரம்பு மண்டல சிக்கல்களில் இருந்தும் காக்கும்.

செய்து சாப்பிடுங்கள்:

* எந்த ஒரு குழம்பும் வெங்காயம் இன்றி வைப்பதில்லை என்பதில் இருந்தும், பழங்காலம் முதலே மருத்துவத்தில் வெங்காயம் பயன்படுத்தப்பட்டு வருவதிலும் இருந்தே அதன் பெருமைகளை உணர முடியும். எனவே தாராளமாக வெங்காயத்தைப் பயன்படுத்தி ஏராளமான பலன்களை பெறலாம்.

* வெங்காய குழம்பு, வெங்காய பச்சடி அனைவரும் விரும்பி சாப்பிடுவர்.

* வெங்காய பக்கோடா, வெங்காய போண்டா, வெங்காய பஜ்ஜி என விதவிதமான பதார்த்தங்கள் செய்தும் ருசிக்கலாம்.

தினத்தந்தி