நிலையான மாற்றம் வேண்டும்!

றினா · றினா Mon Oct 15, 2012 9:45 pm

நிலையான மாற்றம் வேண்டும்!

ஏக்கங்கள் அவலங்கள்

இரண்டரவே கலந்திருக்க

சாக்கடையில் நீந்துகின்ற தலைமை! – தினம்

தலைகுனிந்து வாழ்தெங்கள் நிலைமை!!

-௦-

சகவாழ்வு சிதைத்தெம்மை

தனித்தனியாய்க் கூறாக்கி

சுகபோகம் தேடுகின்ற தலைமை! – தினம்

சுயமிழந்து நிற்பதெங்கள் நிலைமை!!

-௦-

மனம்நொந்த மக்களிங்கு

வாழ்வொன்றி வாழ்ந்திருக்க

இனவாதம் காக்கின்ற தலைமை! – தினம்

இடிபட்டுத் துஞ்சுவதெம் நிலைமை!!

-௦-

அபிவிருத்தி மாயையினால்

அனைவரையும் ஏமாற்றி

அபிவிருத்தி யடைந்திட்ட தலைமை! – தினம்

அழிவினிலே சமுதாய நிலைமை!!

-௦-

உரிமைகள் பேசி எம்மை

உணர்வூட்டி வாக்கெடுத்து

அரியாசனம் பெற்ற தலைமை! – இங்கு

அனாதைகளாய் நிற்பதெங்கள் நிலைமை!!

-௦-

வீரமிகு வசனங்கள்

வேற்றுவாய் வேட்டுக்கள்

‘போராளி’க் கதைகூறும் தலைமை! – தினம்

புலம்புவதே மக்களது நிலைமை!!

-௦-

பிரதேச வாதங்கள்

பிரிவினைகள் குரோதங்கள்

உருவாக்கி சுகம்பெற்ற தலைமை! – தினம்

உருக்குலைந்து போவதெங்கள் நிலைமை!!

-௦-

இருப்புகளும் உரிமைகளும்

இழக்கின்ற நிலைவந்தும்

குரலெழுப்பத் தயங்குகின்ற தலைமை! – இன்னும்

குட்டுதற்குக் குனிவதெங்கள் நிலைமை!!

-௦-

ஏங்குவதால் தூங்குவதால்

இவர்களை நாம் தங்குவதால்

வீங்குகிறார் இவர்தாமா தலைமை? – இங்கு

விடிவின்றி நிற்பதெங்கள் நிலைமை!!

-௦-

ஏமாளி தொடர்ந்திருந்தால்

ஏமாற்றம் தொடர்கதைதான்

கோமாளி யாகிநிற்கும் தலைமை! – ஒரு

கொள்கையின்றி நிற்பதெங்கள் நிலைமை!!

-௦-

‘ஏமாற்றம்.. ஏமாற்றம்’

எனப்புலம்பி என்ன பயன்?

நீ, மாற்றம் தேடிவர வேண்டும்! – நமக்கு

நிலையான மனமாற்றம் வேண்டும்!!

-௦-

-மு.மீ. அமீர் அலி-