கிழித்தெறிந்த காகிதம்; காட்டினை அழித்தது!!!!!!

பூவன் · பூவன் Thu Oct 11, 2012 3:33 pm

எழுதி நிறைந்ததில்
கவிதையானது – கதைகளானது – புத்தகமானது;
கிழித்து கிழித்து எரிந்ததில் -
குப்பையானது; காகிதம்!

கண்ணீரில் மை தீட்டி,
எண்ணம் வார்த்ததில் கடிதமானது;
நினைவுகளை சுமந்து வந்ததில்
பொக்கிசமானது; காகிதம்!

கடவுளை பற்றி எழுதியதில் புனிதமானது
காலம் கடந்ததை எழுதி வரலாறானது
காலிடறி பட்டாலும் தொட்டுக்
கும்பிடவைத்தது; காகிதம்!

எரிந்ததில் சாம்பலானது
எழுதிவைக்க குறிப்பேடானது
நேரம் காலம் குறித்ததில் நாளேடானது
நேற்றையும் இன்றையையும் எழுதி வைத்ததில்
நாட்குறிப்பானது; காகிதம்!

வண்ணம் தீட்டியதில் ஓவியமானது -
கையொப்பமிட்டதில் காசோலையானது
அரசு -
அளவு குறித்து முத்திரை பதித்ததில்
பணமானது; காகிதம்!

நீதிமன்றதில் சட்டமானது
நீதிக்கதைகள் சொன்னதில் இதிகாசமானது
தவறு செய்தவனை தண்டிக்க சாட்சியானது
இன்றையினை எழுத்தாய் சுமந்து
நாளையின் வரலாற்றில் – சுவடுகளாய் மிஞ்சியது; காகிதம்!

காதலி கைபட்டதில் உயிருமானது
காதலியின் உருவம் சுமந்து புகைப்படமானது
கல் மண் காற்று வானத்தின் விவரம் கூட
காகிதமே சொன்னது.

ஆக, இத்தனை ஆனதில்
எத்தனை அழிந்ததென்று
காகிதம் அறிந்திட
வாய்ப்பில்லை, ஆனால் -

மரங்களை அழித்து; காடு வளம் குலைத்து
மழையினை குறைத்து -
இயற்கையின் மொத்த அழிவிற்கும்
மறைமுகமாய் காரணமானது; காகிதமே! காகிதமே!!

பின்குறிப்பு: மகாத்மா காந்தி சொன்னாராம் 'இல்லாத எல்லோருக்கும் நம்மால் உடுத்த ஒரு சட்டையை கூட இனாமாய் கொடுத்துவிட முடியாது, எனினும், இரண்டு சட்டை போதுமான இடத்தில் ஆறு சட்டை வைத்துக் கொள்வதை தவிர்த்தால் – மீதம் நான்கு சட்டையானது 'தானே இல்லாதவர்க்கு போய் சேருமென்று! அதுபோல் – தேவைக்கு மீறிய காகிதத்தின் பயன்பாட்டை தவிர்ப்போம்; அல்லது 'காகிதம் தானே' என்று குப்பையில் எரிவதை குறைப்போம்; மரம் தானே மிஞ்சும் !

நன்றி தமிழ் ஓவியம் வலைதளத்தில் இருந்து எடுக்க பட்டது கவினர் வித்யாசாகர்

யினியவன் · யினியவன் Thu Oct 11, 2012 4:24 pm

காகித ஓடம் போல் கடலலை மீது
அன்றாடம் அல்லாடும் மனுசப் பய புள்ள
அடுத்தவனுக்கு மிஞ்சாம அனைத்தையும்
அபகரிக்க நினைப்பதை நிறுத்திவிட்டால்
மிஞ்சும் அனைத்தும் மிஞ்சும் எஞ்சி இருப்பதாவது...

**கரூர் கவியன்பன்** · 23/09/2012

இங்கு நான் படித்த கோவை கவிதாசன் அவர்களது கவிதை ஒன்று நினைவிற்கு வருகிறது.

எழுதிய தாள்களின்
மதிப்பை விட
வெற்றுத்தாள்களுக்குத் தான்
மதிப்பு அதிகம்
ஏனெனில்
அதில் தான்
அதைவிட
மதிப்புமிக்க கருத்துகளை
எழுதமுடியும்

பகிர்விற்கு நன்றி பூவன்

பூவன் · பூவன் Thu Oct 11, 2012 8:04 pm

யினியவன் wrote:காகித ஓடம் போல் கடலலை மீது
அன்றாடம் அல்லாடும் மனுசப் பய புள்ள
அடுத்தவனுக்கு மிஞ்சாம அனைத்தையும்
அபகரிக்க நினைப்பதை நிறுத்திவிட்டால்
மிஞ்சும் அனைத்தும் மிஞ்சும் எஞ்சி இருப்பதாவது...

நான் எல்லாம் அதான் காகிதமே பயன்படுத்த கூடாது அப்படின்னு
பரிச்சை எழுதல ...