மேட்டூர் அணை நீர்வரத்து திடீர் அதிகரிப்பு ; விவசாயிகள் - அதிகாரிகள் இன்ப அதிர்ச்சி

மேட்டூர்: காவிரியில் நீர்திறப்பதற்கு எதிர்ப்பு தெரிவித்து நேற்று கர்நாடகாவில் பந்த் நடந்த நிலையில், மதியம் மேட்டூர் அணை நீர்வரத்து திடீரென வினாடிக்கு 26,313 கனஅடியாக அதிகரித்தது. இதனால் அதிகாரிகள் விவசாயிகள் அதிர்ச்சியில் இருந்தாலும் மறுப்பக்கம் மகிழ்ச்சியிலும், ஆச்சரியத்திலும் ஆழ்ந்துள்ளனர்.

மேட்டூர் அணையில் இருந்து டெல்டா பாசனத்துக்கு செப்டம்பர் 17ம் தேதி நீர்திறக்கப்பட்டது. பாசன நீரை பயன்படுத்தி டெல்டா மாவட்டங்களில் 12.18 லட்சம் ஏக்கரில் விவசாயிகள் சம்பா சாகுபடியை துவங்கினர். அன்றைய தினம் அணை நீர்மட்டம் 84.420 அடியாகவும், நீர் இருப்பு 46.504 டி.எம்.சி.,யாகவும் இருந்தது.

காவிரி நடுவர் மன்ற இறுதி தீர்ப்புபடி கர்நாடகா அரசு தமிழகத்துக்கு நீர்திறக்காததால் மேட்டூர் அணை நீர்மட்டம் மளமளவென சரிந்தது. சுப்ரீம் கோர்ட் உத்தரவுப்படி தமிழகத்துக்கு தினமும் 9,000 கனஅடிநீரை கர்நாடகா காவிரியில் திறந்து விட்டது. இதற்கு எதிர்ப்பு தெரிவித்து கர்நாடகாவில் நேற்று பந்த் நடத்தப்பட்டது. அதேநேரம் கர்நாடகா காவிரியில் நீர் திறக்காததால் தமிழகத்தில் ஏற்பட்டுள்ள பாதிப்பு குறித்து டெல்டா மாவட்டங்களில் ஆர்.கே., குப்தா தலைமையிலான மத்திய குழுவினர் கடந்த இரு நாட்களாக ஆய்வு நடத்துகின்றனர்.

இந்நிலையில், இன்று ( ஞாயிற்றுக்கிழமை) காலை வினாடிக்கு 10,940 கனஅடியாக இருந்த மேட்டூர் அணை நீர்வரத்து மதியம் திடீரென வினாடிக்கு 26,313 கனஅடியாக அதிகரித்தது. கர்நாடகா விநாடிக்கு 9,000 கனஅடி நீர்மட்டுமே திறந்த நிலையில், மேட்டூர் அணை நீர்வரத்து திடீரென அதிகரித்தது. காவிரியாறு கர்நாடகாவில் 340 கி.மீ., தமிழக-கர்நாடகா எல்லைப்பகுதியில் 64 கி.மீ., தூரம் பாய்ந்து தமிழகத்தை அடைகிறது. இதில், கர்நாடகாவில் உள்ள கபினியில் இருந்து 241 கி.மீ., தூரத்திலும், கே.ஆர்.எஸ்., அணையில் இருந்து 182 கி.மீ., தூரத்திலும் மேட்டூர் அணை உள்ளது.

அணை நீர்மட்டம் :

கர்நாடகா 9,000 கனஅடி நீர் மட்டுமே திறந்த நிலையில், மேட்டூர் அணை மேல்பகுதியில் கபினி, கே.ஆர்.எஸ்., அணைக்கு இடைப்பட்ட காவிரி நீர்பிடிப்பு பகுதியில் பெய்த மழையால் மேட்டூர் அணை நீர்வரத்து திடீரென அதிகரித்திருக்கும். இந்த நீர்வரத்து விரைவில் குறையும் என அதிகாரிகள் தெரிவித்தனர். மதியம் மேட்டூர் அணை நீர்மட்டம் 70.790 அடியாகவும், நீர் இருப்பு 33.383 டி.எம்.சி.,யாகவும் இருந்தது. கடந்த 18 நாட்களில் மேட்டூர் அணை நீர்மட்டம் 14 அடியும், நீர் இருப்பு 13 டி.எம்.சி., (ஒரு டி.எம்.சி., என்பது நூறு கோடி கனஅடி) குறைந்துள்ளது.

ஆச்சரியம் கலந்த மகிழ்ச்சி:

காவிரி நீருக்காக இருமாநிலங்கள் இடையே மோதல் நீடிக்கும் நிலையில், காலை எதிர்பாராத வகையில் மேட்டூர் அணை நீர்வரத்து 26,313 கனஅடியாக அதிகரித்தது. வழக்கமாக தண்ணீர் திறந்து விட்டால் அங்கிருந்து தகவல் பெறப்படும் . இன்று விடுமுறை என்பதால் தகவல் கிடைக்கவில்லை. இதனால் நீர் வரத்து அதிகரித்தது தமிழக பொதுப்பணித்துறை அதிகாரிகளையும், டெல்டா விவசாயிகளையும் அதிர்ச்சியிலும், ஆச்சரியத்திலும் ஆழ்த்தியுள்ளது. இருப்பினும் தண்ணீர் வரத்து மகிழ்ச்சியை தந்துள்ளது.

தினமலர்

இரண்டு நாட்களாக அந்த இடைப்பட்ட பகுதியில் நல்ல மழை பெய்துள்ளது. அதுவே காரணமாக இருக்கும்.

Dr.சுந்தரராஜ் தயாளன் wrote:இரண்டு நாட்களாக அந்த இடைப்பட்ட பகுதியில் நல்ல மழை பெய்துள்ளது. அதுவே காரணமாக இருக்கும்.

---

நிச்சயமாக இதுதான் காரணமாக இருக்கும். அவர்களாகவா திறந்துவிட்டு இருப்பார்கள். அது நடக்கிற காரியமா

வானம் பார்த்த பூமி என்பது போய்
கர்நாடகம் பார்த்த பூமி என ஆகிவிட்டதே!!!

அனாவசிய அலுச்சாட்டியம் செய்பவரை ஆண்டவன் அலெக்காக ஆப்பு வைப்பான் என்பது சத்தியம்.......!!

யினியவன் wrote:வானம் பார்த்த பூமி என்பது போய்
கர்நாடகம் பார்த்த பூமி என ஆகிவிட்டதே!!!

வானம் பார்த்தால் என்ன
கர்நாடகா பார்த்தால் என்ன
இப்போ எல்லாம் விவசாயி கண்ணீர் பூமி தான் ....