சாம்பியன்ஸ் லீக் டி20 இன்று தொடக்கம்!!

ஜோகன்னஸ்பர்க் : சாம்பியன்ஸ் லீக் டி20 தொடர் தென் ஆப்ரிக்காவில் இன்று கோலாகலமாகத் தொடங்குகிறது. ஏ பிரிவில் இந்திய நேரப்படி மாலை 5.00 மணிக்கு தொடங்கும் முதல் லீக் ஆட்டத்தில் டைட்டன்ஸ் , பெர்த் ஸ்கார்ச்சர்ஸ் அணிகள் மோதுகின்றன. நான்காவது சாம்பியன்ஸ் லீக் டி20 தொடர் தென் ஆப்ரிக்காவில் நடக்கிறது. இதன் பிரதான சுற்றில் நடப்பு சாம்பியன் மும்பை இந்தியன்ஸ், ஐபிஎல் சாம்பியன் கொல்கத்தா நைட் ரைடர்ஸ், சென்னை சூப்பர் கிங்ஸ், டெல்லி டேர்டெவில்ஸ் மற்றும் தென் ஆப்ரிக்கா, இங்கிலாந்து, ஆஸ்திரேலியா, நியூசிலாந்தை சேர்ந்த உள்ளூர் டி20 சாம்பியன் அணிகள் களமிறங்குகின்றன.

மொத்தம் 10 அணிகள் இரு பிரிவுகளில் லீக் ஆட்டங்களில் மோதுகின்றன. லீக் சுற்றின் முடிவில் ஒவ்வொரு பிரிவிலும் முதல் 2 இடங்களைப் பிடிக்கும் அணிகள் அரை இறுதிக்கு தகுதி பெறும். 25, 26ம் தேதி அரை இறுதி ஆட்டங்களும், 28ம் தேதி பைனலும் நடக்க உள்ளன. செஞ்சுரியன், டர்பன் மற்றும் ஜோகன்னஸ்பர்க் மைதானங்களில் இந்திய நேரப்படி மாலை 5.00 மற்றும் இரவு 9.00 மணிக்கு போட்டிகள் தொடங்கும்.

செஞ்சுரியன் சூப்பர்ஸ்போர்ட் பார்க் மைதானத்தில் இன்று நடக்கும் ஏ பிரிவு தொடக்க லீக் ஆட்டத்தில் டைட்டன்ஸ் , பெர்த் ஸ்கார்ச்சர்ஸ் அணிகள் மோதுகின்றன. இரவு 9.00 மணிக்கு தொடங்கும் போட்டியில் கொல்கத்தா நைட் ரைடர்ஸ் அணியுடன் டெல்லி டேர்டெவில்ஸ் அணி மோதுகிறது. ஐபிஎல் டி20ல் விளையாடும் 4 அணிகள் இந்த தொடரில் இடம் பெற்றுள்ளதால், போட்டிகளை இந்திய ரசிகர்கள் ஆவலுடன் எதிர்பார்க்கின்றனர்.

அதிரடி வீரர் வீரேந்திர சேவக் முழு உடல்தகுதியுடன் விளையாடத் தயார் என்று டெல்லி அணி நிர்வாகம் அறிவித்துள்ளது. சர்வதேச போட்டிகளில் தொடர்ச்சியாக தடுமாறி வரும் இந்திய அணி கேப்டன் டோனி, சென்னை சூப்பர் கிங்ஸ் ராசியால் மீண்டும் வெற்றிப் பாதைக்குத் திரும்புவாரா என்ற எதிர்பார்ப்பும் எழுந்துள்ளது.

நடப்பு சாம்பியன் மும்பை இந்தியன்ஸ் அணியில் விளையாடும் மாஸ்டர் பேட்ஸ்மேன் சச்சின் ஆட்டமும் ரசிகர்களுக்கு விருந்தாக அமையும் என நம்பலாம். ஓய்வு பெறுவது பற்றி அடுத்த மாதம் முக்கிய முடிவு எடுக்க உள்ளதாக சச்சின் கூறியுள்ளதால், இந்த தொடரில் அவரது ஆட்டம் மிக உன்னிப்பாகக் கவனிக்கப்படும் என்பதில் சந்தேகமில்லை.
எல்லா அணிகளிலுமே அதிரடி வீரர்கள் பலர் இடம் பெற்றுள்ளதால், ஆட்டங்களில் அனல் பறப்பது உறுதி. வேகப் பந்துவீச்சுக்கு சாதகமாக இருக்கும் தென் ஆப்ரிக்க மைதானங்களின் ரன் குவிப்பது பேட்ஸ்மேன்களுக்கு சவாலாகவே இருக்கும்.

2009ல் நடந்த முதலாவது சிஎல் டி20 தொடரில் ஆஸ்திரேலியாவை சேர்ந்த நியூ சவுத் வேல்ஸ் அணி சாம்பியன் பட்டம் வென்றது. 2010ல் சென்னை சூப்பர் கிங்சும், கடந்த ஆண்டு ஹர்பஜன் தலைமையிலான மும்பை இந்தியன்ஸ் அணியும் பட்டம் வென்றுள்ளன. இந்த ஆண்டும் ஐபிஎல் அணிகளில் ஒன்றே கோப்பை வெல்லும் என எதிர்பார்க்கப்படுகிறது. இந்த தொடரில் மொத்தப் பரிசுத் தொகையாக ஸி13 கோடி வழங்கப்பட உள்ளது. போட்டிகளை ஸ்டார் கிரிக்கெட் சேனல் நேரடியாக ஒளிபரப்புகிறது.

தினகரன்

பத்தில் நான்கு நம்முடையது...

அணைத்து அணிகளுக்கும் வாழ்த்துக்கள். எனக்கு பிடித்த அணி மும்பை இந்தியன்ஸ். அதற்கு கூடுதல் வாழ்த்துக்கள் .