ஆங்கிலேயர் காலத்து நடைமுறைகள் இன்றும் பின்பற்றப்படும் அவலம்

by **krishnaamma** Thu Oct 04, 2012 8:46 pm

இந்தியாவை, ஆங்கிலேயர்கள் ஆட்சி செய்த போது உருவாக்கிய தபால் போக்குவரத்து, மலைப் பிரதேசங்களுக்கு வழித்தடங்கள், வரிவிதிப்பு நடைமுறை, நில அளவை முறை ஆகியவற்றை, இன்றும் நாம் பயன்படுத்தி வருகிறோம்.

ஆங்கிலேயர் காலத்திய, விக்டோரியா மகாராணியின் உருவம் கொண்ட முத்திரை, வருவாய்த் துறையில் இன்றும் பயன்பாட்டில் உள்ளது.பெரும்பான்மையான தாலுகா தலைநகரங்களில், 150 ஆண்டுகளுக்கு முன் கட்டப்பட்ட, தாலுகா அலுவலகம், அதன் அருகிலேயே, அரசின் கருவூலம், கருவூலத்தைத் தொடர்ந்து, ஆவணக் காப்பகமும் அமைந்துள்ளன.
கடைசியாக, தாலுகா சிறை ஆகியவை, வரிசையாக ஆங்கிலேயரால் கட்டப்பட்டன. தாலுகா அலுவலகம் துவங்கி, சிறைக்கூடம் வரை, அதிகாரிகள் சென்று வர, பிரத்யேக வழித்தடமும் இருந்தது.தாலுகா அலுவலகம், கருவூலம், ஆவணக் காப்பகம் ஆகியவற்றில் அன்றாடம் பணிகள் முடிந்ததும், அறைகளைப் பூட்டி, சாவியைத் தோல் பையில் வைத்து, அதன் மீது, "சீல்'வைத்து, தாலுகா கிளைச்சிறை அதிகாரியிடம் ஒப்படைத்துவிடுவர்.

மறுநாள் காலை, சாவியை பெற்றுக்கொள்வர். இந்த நடைமுறை, 150 ஆண்டுகளாகப் பின்பற்றப்படுகிறது.சமீப காலமாக சில தாலுகாக்களில், கருவூல அலுவலகம் இடமாறி இருந்தாலும், தாலுகா அலுவலக ஆவணக் காப்பக அறையின் சாவியை, கிளைச் சிறையின் பாதுகாப்பில் ஒப்படைத்துச் செல்வது வழக்கமாக உள்ளது.முன்பு, நம்மை ஆண்ட வெள்ளைக்காரர்கள், நம் நாட்டின் வரவுசெலவுத் திட்டத்தை அறிய, மாலையில், மத்திய பட்ஜெட் அறிவிக்கும் நடைமுறை, வாஜ்பாய் பிரதமராக இருந்த காலத்தில் மாற்றப்பட்டது.
நடைமுறை நிர்வாகம், எலக்ட்ரானிக் தொழில்நுட்பத்தில் மாறி வரும் போது, இன்னமும் பழைய பந்தாவே பின்பற்றப்படுகிறது ஏன் என, தெரியவில்லை.