அவர்கள் காதலிக்கத் துவங்கியதிலிருந்து

அவனைப்பற்றி அவன் நினைப்பதை
அடியோடு மற்ந்து போனான்
எப்போதும் அவள் குறித்த
நினைவிலேயே இருந்தான்

அவளும் அவளைப்பற்றி
நினைப்பதை அடியோடு விடுத்து
அவனைக் குறித்தே
அதிகம் நினைத்துக் கொண்டிருந்தாள்

அவர்கள் காதலித்த துவங்கிய நாளிலிருந்து

அவளுடைய தேவைகள் குறித்தே
அவன் அதிக கவன்ம் கொண்டான்
அவனது தேவைகளை மறந்தே போனான்

அவளும் அவள் தேவைகளை
முற்றாக மறந்து போய்
அவனது தேவைகளையே
நாளெல்லாம் நினைத்துக் கொண்டிருந்தாள்

அவர்கள் காதலிக்கத் துவங்கிய நிமிடத்திலிருந்து

அவன் அவனுக்காக வாழுதலை
அடியோடு விட்டொழித்து
அவளுக்காகவே வாழத் துவங்கினான்

அவளும் தனக்காக வாழுதலை விடுத்து
அவனுக்காகவே வாழத் துவங்கினாள்

அவர்கள் காத்லிக்கத் துவங்கிய வினாடியிலிருந்து

அவன் அவளைக் காணும் போதெல்லாம்
இமையாது ஏதோ அதிசயத்தை பார்ப்பதுபோல்
பார்த்துக் கொண்டே இருந்தான்

அவளும் அவனைக் காணும் போதெல்லாம்
ஏதோ அபூர்வப் பொருளைப் பார்ப்பதுபோல்
பார்த்துக் கொண்டே இருந்தாள்

இந்த அதிசய் மாறுதலுக்கு காரணம் புரியாது
தவித்துக் கொண்டிருந்த வேளையில்
காதலித்துக் கொண்டிருந்த நண்பன்
இப்படிச் சொன்னான்

"பிறந்தது முதல் ஓரிடத்திலே இருந்த உயிர்கள்
இடம் மாறியதால் உண்டாகிற பிரச்சனை இது
தானிருந்த உடலை அதிசயித்து
அசையாது பார்த்துக் கொள்ளுவதும்
மீண்டும் அதற்குள் குடியேற முயன்று
காலமெல்லாம் தோற்கிற துயரமும்
அது காதலர்களுக்கு மட்டுமே புரியும்
தேவ ரகஸியம்
அவரவர் உயிர்களை
அவர்களிடமே வைத்திருப்போருக்கு
நிச்சய்ம இது புரியாது"என்றான்

நான் புரிந்து கொள்ள முயன்று கொண்டிருக்கிறேன்