மதுக் கடைகளை மாலை 5 மணிக்கு பின்னர் திறக்க வேண்டும்: கேரள உயர் நீதிமன்றம்

பூவன் · பூவன் Sat Sep 29, 2012 9:39 am

மதுப் புழக்கத்தைக் குறைக்கும் நோக்கில், மதுபானக் கடைகளை மாலை 5 மணிக்குப் பின்னர் திறக்க வேண்டும் என்று கேரள உயர் நீதிமன்றம் கருத்து தெரிவித்துள்ளது.

இது தொடர்பாக உயர்நீதிமன்ற தனி நீதிபதி அளித்த தீர்ப்புக்கு எதிராக தாக்கல் செய்த மனுவை விசாரித்த நீதிபதிகள் சி.என். ராமச்சந்திரன் நாயர் மற்றும் சி.கே. அப்துல் ரஹீம் ஆகியோர் அடங்கிய அமர்வு மனுவைத் தள்ளுபடி செய்து வியாழக்கிழமை உத்தரவிட்டது. மதுபான கடைகளை திறக்க ஊராட்சி மற்றும் மாநகராட்சி பகுதிகளுக்கு என தனித்தனியாக நேரம் ஒதுக்கி கேரள அரசு உத்தரவிட்டது. இதை எதிரித்து பார் உரிமையாளர்கள் மனுதாக்கல் செய்தனர். அவர்களுக்கு ஆதரவாக தனி நீதிபதி தீர்ப்பளித்திருந்தார் என்பது குறிப்பிடத்தக்கது.

இந்த நிலையில், இருநபர் நீதிபதிகள் அளித்த உத்தரவில் கூறியிருப்பதாவது:
பார் வசதியுள்ள ஹோட்டல்களில் காலை நேரங்களில் மது விற்பனைக்கு அனுமதிப்பதன் மூலம் அது வேலையை மட்டும் பாதிக்காது; கூடவே மது புழக்கம் வளர வழிவகுக்கும். காலை நேரங்களில் மது புழக்கத்தை தடை செய்ய சட்ட நடவடிக்கைகளை அரசு உருவாக்க வேண்டும். பணியை முடித்த பின்னர் மாலை நேரங்களில் ஓய்வுக்காக மதுவை பயன்படுத்தலாம்.

காலநேரம் இல்லாமல் மதுபானங்களை விற்பனை செய்வதன் மூலம் அதற்கு அடிமையாகி, மது இருந்தால்தான் இயல்பான நிலையில் இருக்க முடியும் என்ற சூழ்நிலைக்குத் தள்ளப்படுகின்றனர் என்பதை உணர முடிகிறது. எனவே, மக்களின் நலன் கருதி மதுக் கடைகளை மாலை 5 மணி வரை மூடுவது பற்றி அரசு பரிசீலிக்க வேண்டும்.

இந்த பிரச்னையைப் பொருத்தமட்டில், அரசின் கொள்கை முடிவு என்பதால், இதுபற்றி அரசுதான் முடிவு எடுக்க வேண்டும் என்று நீதிபதிகள் உத்தரவில் தெரிவித்தனர்.
கேரளத்தில் கடந்த 2011-ம் ஆண்டு மது விற்பனை ரூ.7,000 கோடியாக இருந்தது. இதுவே 2012-ம் ஆண்டு ரூ.8,000 கோடியாக அதிகரிக்கும் என்று கூறப்படுகிறது.

நன்றி tcn நியூஸ்

**ராஜா** · **ராஜா** Sat Sep 29, 2012 10:40 am

நீதிபதிகளின் தீர்ப்பை வரவேற்கிறேன் , இது போல தமிழ்நாட்டிலும் கொண்டு வரவேண்டும்

பூவன் · பூவன் Sat Sep 29, 2012 10:43 am

ராஜா wrote: நீதிபதிகளின் தீர்ப்பை வரவேற்கிறேன் , இது போல தமிழ்நாட்டிலும் கொண்டு வரவேண்டும்

.

வருமானம் குறைந்து விடும் அதனால கொண்டு வர மாட்டாங்க.....

balakarthik · balakarthik Sat Sep 29, 2012 10:47 am

அஞ்சு மணிக்கு மேல அஞ்சாறு புட்டி வாங்கி வச்சு காலையில குடிச்சா என்ன பண்ணுவாங்களாம் மது புழக்கத்தை தடுக்கிறதை விட்டு மது பழக்கத்தை தடுத்தா புண்ணியமா போகும் சாமி அருமையிருக்கு