தமிழ் மந்திரம் என்பது, தம்மைப் பயில்வாரைப் போற்றிக் காப்பது!

சிவபூசை, அடியார் பூசை, குரு பூசை ஆகிய வழிபாடுகளுக்கு எத்துணைப் பயன் உண்டோ அத்துணைப் பயன் திருமுறை வழிபாட்டிற்கும் பாராயணத்துக்கும் உண்டென்பர் பெரியோர். சீலம், நோன்பு, செறிவு, அறிவு எனப் பல படிகளாக வகுத்துச் செய்யப்படும் வழிபாட்டினைத் தவிர உயிர்கள் உய்தி பெறுவதற்கு வேறு சாதனம் இல்லை என்பது சைவ நூல் துணிபு. இறைவனது திருவருளாகிய சிவஅறிவும் ஒன்றினால்தான் அப்பெருமானை உள்ளவாறு உணர்ந்து வழிபடுதல் கூடும். இறைவன் அருளிய திருவருள் அறிவால் அம்முதல்வனை வழிபடும் பதிகப்பெருவழியினை அமைத்துத் தந்த சிவஅறிவர்களாகிய திருவருட்செல்வர்கள் அனைவரும் பொறிவாயில் ஐந்தவித்தானாகிய இறைவன் அறிவுறுத்த பொய்தீர் ஒழுக்க நெறி நின்ற செம்புலச் செல்வர்கள். ஆகவே, அவர்கள் திருவாய் மலர்ந்தருளிய திருமுறைகள் யாவும் உயர்ந்த அறிவுநூல்களாகத் திகழ்கின்றன.

இத்தகைய சைவத் திருமுறைகள் பன்னிரண்டையும் “காதலாகி கசிந்து கண்ணீர் மல்கி” ஓதலும், பிறரை ஓதும்படிச் செய்தலும், பிறர் சொல்லத் தாம் கேட்டலும், பிறரை கேட்கும்படி தூண்டுதலும், அறிவு நூல்களாகிய இவற்றின் பொருள் நலன்களை இடைவிடாது சிந்தித்தலும் என ஐந்து வகையாலும் பயின்று வழிபடுதல் வேண்டும் என்று உணர்த்தியுள்ளனர் பெரியோர்.
“ஞானத்தால் தொழுவார்கள் தொழக்கண்டு, ஞானத்தால் உனை நானும் தொழுவனே” என்றவாறு சிவஅறிவு பெற்ற பெரியோர்கள் அருளிய திருமுறைகளை சாதனமாகக் கொண்டு எல்லாம் வல்ல இறைவனை வழிபட்டுப்போற்றும் முறை ஞானபூசையென நூலகளால் பாராட்டப் பெறுகின்றது. இந்த உண்மை,
ஞான நூல்தனை யோதல்; ஓதுவித்தல்
நற்பொருளைக் கேட்பித்தல், தான் கேட்டல், நன்கு
ஈனமிலாப் பொருளதனைச் சிந்தித்தல் ஐந்தும்
இறைவனடி அடைவிக்கும் எழில்ஞான பூசை
என்ற அருள்நந்தி சிவாச்சாரிய சுவாமிகளின் பொருள் பொதிந்த பொன்னுரையால் தெளியலாம்.

திருமுறைகளை அருளியவர்கள் யாவரும் நிறைமொழி மாந்தர்கள். இவர்கள் வரலாற்றினால் திருமுறைகள் யாவும் மறைமொழிகளாகிய தமிழ் மந்திரங்கள் என்பது தெளிவாகும். தமிழ் மந்திரம் என்பது, தம்மைப் பயில்வாரைப் போற்றிக் காப்பது என்னும் பொருளுடையது என்று கூறுவர் பெரியோர். இத்திருமுறைகளை அன்பினால் ஓதியுணரும் இயல்புடையோர், இவ்வுலக வாழ்வில் நேரும் எல்லாத் தீங்குகளும் நீங்கி எல்லாவித நலன்களையும் பெற்று இன்புறுவர் என்பது ஆன்றோர்களின் அநுபவம்.
இம்மை யேதரும் சோறும் கூறையும்
ஏத்தலும் இடர் கெடலுமாம்
அம்மை யேசிவ லோகம் ஆள்வதற்கு
யாதும் ஐயுறவு இல்லையே
என்ற திருவாக்கால் அறியலாம்.
(நன்றி: பேராசிரியர்.ந.சுப்பு ரெட்டியார் எழுதிய சைவ சமய விளக்கு புத்தகம்)

நன்று சாமி

இனிய பகிர்வுக்கு நன்றி சாமி,

தொடருங்கள் உங்களின் சேவையை...

சாமி wrote: திருமுறைகளை அருளியவர்கள் யாவரும் நிறைமொழி மாந்தர்கள். இவர்கள் வரலாற்றினால் திருமுறைகள் யாவும் மறைமொழிகளாகிய தமிழ் மந்திரங்கள் என்பது தெளிவாகும். தமிழ் மந்திரம் என்பது, தம்மைப் பயில்வாரைப் போற்றிக் காப்பது என்னும் பொருளுடையது என்று கூறுவர் பெரியோர்.

அருமை சாமி !!!